Ang Pagtamod sang Biblia

Ginasuportahan Bala sang Dios ang mga Inaway Subong?

SI Hari David, nga isa ka soldado sang dumaan nga Israel, nagsiling: “[Ang Dios] magatudlo sang akon mga kamut sa pag-away, sa bagay nga ang akon mga butkon nagabingat sang pana nga saway.”—Salmo 18:34.

Si apostol Pablo nagsulat parte sa mga Cristiano: “Bisan pa nagakabuhi kami subong unod, wala kami nagapakig-away suno sa undanon nga paagi. Kay ang mga hinganiban sang amon pagpakig-away indi undanon.”—2 Corinto 10:3, 4.

Nagasumpakilay bala ini nga mga teksto? Ukon may rason bala ang Dios kon ngaa gintugutan niya nga makig-away ang dumaan nga Israel pero gindilian niya ang mga Cristiano? Nagbag-o bala ang iya pagtamod sa inaway? Mangin maathag ang mga sabat sini kon mahibaluan naton ang tatlo ka kinatuhayan sang Israel sa matuod nga mga Cristiano.

Tatlo ka Kinatuhayan

1. Ang dumaan nga Israel isa ka pungsod nga ginhatagan sang Dios sing teritoryo kag ginapalibutan ini sang mga pungsod nga masami nagakontra sa ila. Gani ginsugo sang Dios ang iya katawhan nga proteksionan ang ila pungsod, kag ginpadaug pa gani sila sa ila mga kaaway. (Hukom 11:32, 33) Sa pihak nga bahin, ang mga Cristiano wala sing literal nga teritoryo kag sa bisan diin lang nga pungsod sila nagaistar. Gani kon mag-entra sa inaway ang mga sumulunod ni Cristo batok sa iban nga pungsod, makig-away sila sa ila mga masigkatumuluo, ang ila mga utod sa pagtuo, nga ginsugo nga higugmaon nila.—Mateo 5:44; Juan 15:12, 13.

2. Tawo ang hari sang dumaan nga Israel nga yara sa Jerusalem. Pero, ang matuod nga mga Cristiano ginagamhan ni Jesucristo, nga karon isa ka gamhanan nga espiritu nga tinuga nga ang trono ara sa langit. (Daniel 7:13, 14) Si Jesus mismo nagsiling: “Ang akon ginharian indi bahin sini nga kalibutan. Kon ang akon ginharian bahin sini nga kalibutan, ang akon mga alagad nakig-away kuntani agod indi ako matugyan sa mga Judiyo. Apang, ang matuod, ang akon ginharian indi gikan sa sini.” (Juan 18:36) Gani wala sing ginharian ukon paggahom sa duta ang masiling nga iya ni Cristo. Ngaa importante ini sa “mga alagad” ukon sumulunod ni Jesus? Ipaathag ini sang masunod.

3. Ang dumaan nga Israel, pareho sa iban nga pungsod, masami nga nagapadala sing mga mensahero, ukon ginatawag karon nga mga embahador. (2 Hari 18:13-15; Lucas 19:12-14) Amo man sini ang ginahimo ni Cristo, pero may duha lang ka kinatuhayan. Una, ang tanan niya nga sumulunod mga embahador ukon mga tiglawas. Gani nagsulat si apostol Pablo sa mga Cristiano: “Mga embahador kami nga salili para kay Cristo.” (2 Corinto 5:20) Bangod mga embahador sila sang paghidait wala sila sing mga armas. Ikaduha, ginaistorya sang mga sumulunod ni Jesus ang tanan nga gusto mamati. Nagsiling si Jesus: “Ining maayong balita sang ginharian ibantala sa bug-os napuy-an nga duta subong panaksi sa tanan nga pungsod.” (Mateo 24:14) Nagsiling man sia: “Busa lakat kamo kag maghimo sang mga disipulo sa mga tawo sang tanan nga pungsod, . . . nga nagapanudlo sa ila nga tumanon ang tanan nga butang nga ginsugo ko sa inyo.”—Mateo 28:19, 20.

Makapasubo nga indi tanan nagabaton sa mga alagad ni Cristo. Gani si Pablo nagsulat sa Cristianong ebanghelisador nga si Timoteo: “Subong isa ka maayo nga soldado ni Cristo Jesus magpakigbahin ka sa pag-antos sa malaut.”  (2 Timoteo 2:3) Siempre, ang hinganiban ni Timoteo indi literal, kag nagalakip ini sang Pulong sang Dios, nga ginatawag “espada sang espiritu.”—Efeso 6:11-17.

Ngaa Gin-islan ang Pungsod sang Israel sing Cristianong Kongregasyon?

Sa sulod sang mga 1,500 ka tuig, ang pungsod sang Israel may pinasahi nga kaangtanan sa Dios, nga nabase sa katipan ukon kontrata. (Exodo 19:5) Si Moises ang manugpatunga sini nga katipan, kag nagalakip ini sa Napulo ka Sugo kag sa iban pa nga kasuguan. Ini tanan nagpabakod sang matuod nga pagsimba kag sa mataas nga talaksan sa moral. (Exodo 19:3, 7, 9; 20:1-17) Pero makapasubo nga nangin di-matutom sa Dios ang pungsod sang Israel. Ginpatay pa gani nila ang iya mga propeta.—2 Cronica 36:15, 16; Lucas 11:47, 48.

Sang ulihi, ginpadala ni Jehova ang iya Anak nga si Jesucristo nga natawo subong Judiyo. Imbes nga batunon nila sia subong Mesias, ginsikway sia sang kalabanan nga mga Judiyo. Gani, gintapos sang Dios ang iya madugay na nga katipan sa Israel, kag naguba ang simbuliko nga pader nga nagaseparar sa mga Judiyo sa mga di-Judiyo. * (Efeso 2:13-18; Colosas 2:14) Sadto man nga tion, gintukod sang Dios ang Cristianong kongregasyon kag gintangdo si Jesus subong Ulo. Isa pa, antes matapos ang unang siglo, nagdaku ini nga kongregasyon. “Sa tagsa ka pungsod ang tawo nga nagakahadlok sa [Dios] kag nagahimo sang pagkamatarong kalahamut-an sa iya,” siling sang Judiyo nga si apostol Pedro.—Binuhatan 10:35.

Gin-ilog sang mga Saksi ni Jehova ang mga Cristiano sang una. Gani kilala ang mga Saksi sa ila pagbantala kag neutralidad sa pulitika kag mga inaway. (Mateo 26:52; Binuhatan 5:42) Wala gid sila nagapatublag sa ila pagbantala sang maayong balita sang Ginharian sang Dios, ang lamang nga gobierno nga makadula sang kalainan kag makapaluntad sang dayon nga paghidait sa duta. Ginadumdom ining hamili nga paglaum, nagsulat si apostol Pablo: “Subong mga salili para kay Cristo nagapakiluoy kami: ‘Magpasag-uli kamo sa Dios.’” (2 Corinto 5:20) Ginapakita sini ang labi nga pagkahilingagawon karon, kay malapit na ang “katapusan nga mga adlaw” sang malauton nga kalibutan.—2 Timoteo 3:1-5.

[Nota]

^ par. 13 Ang termino nga “Judiyo” amo ang tawag sa mga Israelinhon nga kaliwatan ni Juda. Sang ulihi, amo na ini ang tawag sa tanan nga Hebreo.—Esdras 4:12.

NAMANGKOT KA BALA?

● Anong talalupangdon nga kinaiya ang dapat ipakita sang mga Cristiano sa isa kag isa?—Juan 13:34, 35.

● Ano ang panguna nga “hinganib” sang matuod nga Cristiano?—Efeso 6:17.

● Anong importante nga mensahe ang ginapahibalo sang mga representante ni Cristo?—Mateo 24:14; 2 Corinto 5:20.

[Retrato sa pahina 23]

Ang mga Saksi ni Jehova nagaistar sa lainlain nga pungsod kag wala sila nagaentra sa inaway