Ang Epekto sang Musika

ANO ayhan ang kabuhi kon wala sing musika? Wala sing kanta nga pangpatulog, wala sing harana, kag wala sing orkestra. Madamo ang nagasiling nga mangin makatalaka gid ang kabuhi.

Daku gid ang epekto sang musika sa aton. Makapakalma ini, makapapagsik, makapasadya, kag makahatag sing inspirasyon. Makapalipay man ini ukon makapahibi. Nagakatandog kita sa musika bangod may daku ini nga epekto sa aton balatyagon. Ngaa? Kay ang musika isa ka matahom nga regalo halin sa Dios. (Santiago 1:17) Amo nga kinahanglan naton ini pabaloran. Dapat nga maayo man ini kag manamian sang tanan, bata man ukon tigulang.

Madugay na nga may musika. Halimbawa, may nakutkutan ang mga arkeologo nga nagapamatuod nga pila ka siglo antes sang aton panahon, ang mga tribo sa Aprika nagatokar sing tambor, budyong, kag kilingkiling. Ang mga Intsik sang una nagatokar sing silindron kag panpipe. Ang mga taga-Egipto, India, Israel, kag Mesopotamia nagatokar man sing arpa. Mahimo nga ang pinakaespesipiko nga rekord parte sa musika sang una amo ang ginsiling sang Biblia sa Genesis 4:21. Mabasa naton diri nga si Jubal amo ang “amay sang tanan nga nagagamit sang arpa kag lantoy.” Madamo nga siglo sang ulihi, si Hari Solomon sang Israel nanamian gid sa musika kag nagpakuha sia sing pinakamaayo nga kahoy para himuon nga arpa kag iban pa nga de-kuerdas nga instrumento.—1 Hari 10:11, 12.

Sang una, para makapamati ka sing musika kinahanglan nga ikaw ang matokar ukon mamati ka sa nagatokar. Pero subong, bisan sin-o puede na makapamati sa isa lang ka tum-ok. Tanan nga klase sang musika puede na marekord kag ma-download sa gadyet nga masulod sa bulsa. Suno sa surbe sang 2009 sa Estados Unidos, ang mga 8 asta 18 anyos nagapamati sa musika kag mga audio recording sing sobra sa duha ka oras kada adlaw.

Amo ini ang rason kon ngaa maayo gid nga negosyo ang musika kag ang mga gadyet. Daku gid ang kita sa sini. Pero, nahibaluan mo bala kon paano mangin popular ang isa ka musika?

[Kahon/Retrato sa pahina 3]

Musika sa Internet

PAG-DOWNLOAD: Kon mag-download ka, sa masami ginabayaran mo ang kada musika. Kon kaisa, kon magbakal ka sing cell phone ukon iban nga gadyet, may dala ini nga suskripsion para maka-download ka sing musika sa kalawigon nga gintugot nila.

STREAMING: Makapamati ka sing musika sa Internet nga indi mo na kinahanglan i-download. Ang kalabanan sini libre, pero may pila ini ka unod nga kinahanglan sing suskripsion.

[Tsart/Mga Retrato sa pahina 3]

(Para sa aktual nga pormat, tan-awa ang publikasyon)

Kasaysayan sang Rekording

Katuigan 1880

Phonograph

Katuigan 1890

Steel wire

Katuigan 1940

Reel-to-reel tape

Katuigan 1960

Cassette tape

Katuigan 1980

Compact disc (CD)

Katuigan 1990

Digital audio files (MP3, AAC, WAV, iban pa.)