Magdiretso sa kaundan

Magdiretso sa segundaryo nga menu

Magdiretso sa listahan sang kaundan

Mga Saksi ni Jehova

Hiligaynon

Magmata!  |  Hulyo 2011

Ngaa Grabe Gid ang Pag-antos?

Ngaa Grabe Gid ang Pag-antos?

ANG mga lider sang relihion nga nagasiling nga nakahibalo sila sang sabat sa sini nga pamangkot pirme nagatudlo nga silot sang Dios ang pag-antos. Halimbawa, pila ka adlaw pagkatapos sang linog sa Haiti, ang pari sa kapital sang pungsod nagsiling sa iya mga miembro nga naglinog kay may gusto ipalab-ot ang Dios sa ila. Pero ang iban wala nagapati sini. Suno sa Amerikana nga propesor sang relihion, amo sini ang ginasiling sang madamo nga tawo: “Indi na kita dapat mamangkot kon ngaa ginapahanabo sang Dios ang kalamidad kay isa ini ka misteryo. Dapat lang kita magtuo sa iya.”

Ang Dios bala ang rason sang pag-antos? Indi, ang sabat sang Biblia. Indi katuyuan ni Jehova nga Dios nga mag-antos ang mga tawo. Pero, nagrebelde ang una nga mag-asawa sa Dios, kag sila ang nagdesisyon kon ano ang maayo kag malain. Nagbiya sila sa Dios kag nag-antos bangod sini. Gani apektado kita sang ila sala nga desisyon. Pero ang Dios indi amo ang ginhalinan sang pag-antos. Ang Biblia nagsiling: “Kon yara sa pagtilaw, wala sing isa nga magsiling: ‘Ginatilawan ako sang Dios.’ Kay ang Dios indi matilawan sa malaut nga mga butang kag wala man sia nagatilaw kay bisan sin-o.” (Santiago 1:13) Tanan kita nagaantos, bisan pa ang mga nahamut-an sang Dios. Binagbinaga ang masunod:

  • Si propeta Eliseo may makamamatay nga balatian.—2 Hari 13:14.
  • Nagsulat si apostol Pablo nga pirme sia “ginagutom kag ginauhaw man kag haluson makapanapot kag ginapintasan kag wala sing puluy-an.”—1 Corinto 4:11.
  • Ang Cristiano nga si Epafrodito nagmasakit kag ‘napung-awan.’—Filipos 2:25, 26.

Wala gid kita sing mabasa nga ginsilutan sang Dios ining tatlo ka tawo bangod sa ila mga sala. Gani ginapakita sang Biblia nga ang Dios indi balasulon sa mga pag-antos. Ginasugid sini ang masami nga tatlo ka rason sang pag-antos.

 Personal nga Desisyon

“Kon ano ang ginasab-ug sang tawo, ini man ang iya anihon.” (Galacia 6:7) Halimbawa, kon ang isa nagapanigarilyo, huroshuros magmaneho, kag buhaha, magaantos gid sia sa ulihi.

Mahimo man kita mag-antos bangod sa kakagod sang iban. Halimbawa, ang mga tawo nagahimo sing grabe nga kalainan, pareho sa kapintas nga natabo sa tion sang Nazi kag pag-abuso sa mga kabataan. Gin-abusuhan sang pila ang ila kahilwayan sa pagbuot amo nga nag-antos ang iban sa aton.

Wala Ginapaabot nga mga Hitabo

Sang unang siglo C.E., narumpag ang daku nga torre sa Jerusalem, kag napatay ang 18 ka tawo. Naghambal si Jesus parte sa mga biktima: “Nagahunahuna bala kamo nga mas makasasala sila sangsa iban nga nagapuyo sa Jerusalem? Nagasiling ako sa inyo, indi gid.” (Lucas 13:4, 5) Nahibaluan ni Jesus nga wala sila ginsilutan sang Dios. Nahibaluan man niya nga ang Pulong sang Dios nagsiling: “Ang tion kag ang kahigayonan nagakahanabu sa ila tanan.” (Manugwali 9:11) Natabo ang madamo nga trahedya bangod natabuan nga ato didto ang mga biktima. Halimbawa, ginapakita sang mga report nga grabe ang pag-antos sang mga tawo bangod wala sila namati sa mga paandam. Ang iban naman nagpatindog sing indi mabakod nga mga bilding nga mahimo maguba sa tion sang bagyo ukon linog. Sa sini nga kahimtangan, madamo ang nag-antos bangod sa wala ginapaabot nga mga hitabo.

“Ang Manuggahom Sini nga Kalibutan”

Nagsiling ang Biblia: “Ang bug-os nga kalibutan yara sa gahom sang isa nga malauton.” (Juan 12:31; 1 Juan 5:19) Ang “isa nga malauton” amo si Satanas nga Yawa, ang gamhanan nga espiritu nga tinuga nga ginlaragway subong “manugdumala sang awtoridad sang hangin.” Ginapabaskog ni Satanas “ang espiritu nga nagapanghikot karon sa mga anak sang pagkadimatinumanon.” (Efeso 2:2) Ang pila ka krimen, subong sang pagpapas sa rasa kag pag-abuso sa mga kabataan tama gid kalain. Pamatuod ini sang impluwensia ni Satanas.

Pero buot bala silingon nga wala nagaulikid ang Dios sa aton pag-antos? Masarangan bala kag gusto gid sang Dios nga tapuson ini?

Magtuon sing Dugang Pa

MAAYONG BALITA HALIN SA DIOS!

Ngaa Ginatugutan sang Dios ang Kalautan kag Pag-antos?

Paano nagsugod ang kalautan, kag ngaa gintugutan ini sang Dios nga magpadayon? Madula pa bala ang pag-antos?