Magdiretso sa kaundan

Magdiretso sa listahan sang kaundan

Ginhimo Ka sing “Makatilingala”!

Ginhimo Ka sing “Makatilingala”!

 Ginhimo Ka sing “Makatilingala”!

KON makita mo ang dalayawon nga mga abilidad sang mga sapat, daw nahisa ka bala sa ila? Mahimo nga nagahandum ka nga makalupad pareho sang dapay, makalangoy pareho sang dolpin, makakita pareho sang agila, ukon makadalagan pareho sang kabayo.

Ang mga sapat may pila ka dalayawon nga abilidad. Pero amo man kita! Ginahambal pa gani nga ang lawas sang tawo isa ka perpekto nga makina. Siempre, mas maayo kita sangsa makina. Mausisaon kita kag grabe ang aton imahinasyon. May ikasarang kita sa paghimo sang gusto naton. Amo ini ang rason kon ngaa nakahimo kita sing mga makina nga mag-obra sang halos tanan nga gusto naton himuon. Makalupad kita nga mas madasig pa sangsa tunog; makapanakayon kita sa ibabaw ukon sa idalom sang kadagatan. Makita naton ang mga butang bisan pa mga 14 bilyones ka light-year ang kalayuon sini. Mausisa naton ang buhi nga selula. Makaimbento man kita sang mga bulong kag mga aparato nga makabulig sa aton para mahibaluan kag mabulong ang mga balatian.

Pero, bisan wala ini nga mga kagamitan, ang mapagros kag nahanas sing maayo nga tawo makahimo man sing daw indi mapatihan nga mga butang. Halimbawa, ang mga nagaentra sa Olympics, pareho sang mga gymnast, makahimo sing mga butang nga makapahalawhaw sa mga nagatan-aw.

Nagapasalamat ka bala kay may amo ka sini nga mga abilidad? Mahimo nga wala ka nakaentra sa Olympics, pero madamo ka man sing abilidad nga dapat mo pasalamatan. Amo man sini ang ginpabutyag sang isa ka manunulat sang Biblia sa iya ambahanon sa Dios: “Magapasalamat ako sa imo, kay ginhimo ako sing makahalangawa kag makatilingala.” * (Salmo 139:14) Pamensari sing maayo ini samtang ginabasa mo ang masunod nga mga artikulo. Ipaathag sini sing detalyado ang pila ka dalayawon nga ikasarang sang aton lawas, kag ang iban pa importante nga mga kinaiya nga nagahimo sa aton nga pinasahi gid.

[Nota]

^ par. 5 Kon interesado ka parte sa pagpanuga kag ebolusyon mahimo mo basahon ang brosyur nga Gintuga Bala ang Kabuhi? kag The Origin of Life—Five Questions Worth Asking. Mahimo mo ini pangabayon sa mga Saksi ni Jehova sa inyo lugar ukon sa manugbalhag sini nga magasin.

[Kahon sa pahina 3]

MAY IKASARANG SA PAGKINOT SING ENERHIYA

Duha ka tiil ang ginagamit naton sa pagtindog, gani makakinot kita sing enerhiya bangod diutay lang nga maskulo ang ginagamit naton. Ang matuod, ‘nagagamit lang kita sing dugang nga 7% nga enerhiya kon nagatindog sangsa nagahigda,’ siling ni John R. Skoyles, nga nagatuon parte sa nervous system. Nagsiling pa sia nga ang ido nagagamit sing dugang nga 70 porsiento nga enerhiya kon nagatindog (sa apat niya ka tiil) sangsa nagahigda.