Magdiretso sa kaundan

Magdiretso sa segundaryo nga menu

Magdiretso sa listahan sang kaundan

Mga Saksi ni Jehova

Hiligaynon

Magmata!  |  Disiembre 2010

 Pamangkot sang mga Pamatan-on

Paano Ko Ipaathag ang Ginasiling sang Biblia Parte sa mga Agi kag Tomboy

Paano Ko Ipaathag ang Ginasiling sang Biblia Parte sa mga Agi kag Tomboy

Na-shock gid ang mga tawo sa isa ka award ceremony sang naghalukanay ang duha ka kilala nga aktres! Pero dayon, naghinugyaw man sila. Nalipay gid ang mga agi kag tomboy. Nagsiling ang mga kritiko nga ginhimo lang nila ini para makilala pa gid sila. Ano man ang rason, ini nga video sulitsulit nga pagguaon sa TV kag tan-awon sang madamo sa Internet.

GINAPAKITA lamang sini nga daku gid nga balita kon mag-ako ang isa ka artista nga agi sia, tomboy, ukon silahis (bisexual). May nagadayaw sa ila bangod sa ila kaisog; may nagapakalain man bangod sang ila makangilil-ad nga ginahimo. Pero para sa madamo, alternative lifestyle lang ini ukon lain nga klase sang pagkabuhi. “Sang nagaeskwela pa ako,” siling ni Daniel nga 21 anyos, “bisan ang mga kabataan nga indi agi ukon tomboy nagasiling nga kon indi mo mabaton ang mga homoseksuwal may pinilian ka kag ginahukman mo sila.” *

Sa kada henerasyon ukon lugar, lainlain ang panan-aw sa mga agi kag tomboy. Pero ang mga Cristiano wala “ginapalidpalid sang tagsa ka hangin sang panudlo.” (Efeso 4:14) Ginasunod lamang nila ang ginahambal sang Biblia.

Ano ang ginasiling sang Biblia parte sa mga agi kag tomboy? Kon ginasunod mo ang talaksan sang Biblia sa moral, ano ang isabat mo kon silingon ka nga judgmental, may pinilian, ukon nainit sa mga agi kag tomboy? Binagbinaga ang masunod nga pamangkot kag ang puede mo isabat.

Ano ang ginasiling sang Biblia parte sa mga agi kag tomboy?

Maathag nga ginapakita sang Biblia nga ang sex gindesinyo sang Dios para lang gid sa lalaki kag babayi nga mag-asawa. (Genesis 1:27, 28; Levitico 18:22; Hulubaton 5:18, 19) Sang ginpakamalaut sang Biblia ang pagpakighilawas, ginapatuhuyan sini ang mga ginahimo sang homoseksuwal kag heteroseksuwal. *Galacia 5:19-21.

Kon pamangkuton ka: “Ano ang masiling mo sa mga agi kag tomboy?”

Mahimo ka magsabat: “Wala ako nainit sa ila pero nalainan ako sa ila ginahimo.”

✔ Dumduma: Kon ginasunod mo ang talaksan sang Biblia sa moral, buot silingon amo  ini ang ginpili mo nga kabuhi, kinamatarong mo ini. (Josue 24:15) Indi ka mahuya nga ihambal ang imo ginapatihan.—Salmo 119:46.

Indi bala dapat respetuhon sang mga Cristiano ang tanan nga tawo, ano man sila?

Huo. Ang Biblia nagasiling: “Padunggi ang tanan nga sahi sang mga tawo,” ukon suno sa Ang Pulong sang Dios, “Tahura ninyo ang tanan nga tawo.” (1 Pedro 2:17) Gani ang mga Cristiano wala nainit sa mga agi kag tomboy. Maayo sila sa tanan nga tawo, bisan sa mga agi kag tomboy.—Mateo 7:12.

Kon pamangkuton ka: “Indi ayhan nga ang imo pagpati mag-encourage sa iban nga mainit sa mga agi kag tomboy?”

Mahimo ka magsabat: “Indi a. Wala ako nainit sa ila, kundi sa ila lang ginahimo.”

✔ Mahimo magsiling ka pa: “Puede ta ini ikumparar sa pagpanigarilyo. Indi bala wala ako nagapanigarilyo? Ang matuod, nalainan gid ako sini. Pero ibutang ta nga nagapanigarilyo ka ’ya. Siempre nanamian ka sa sini. Mainit bala ako sa imo kay nagapanigarilyo ka? Ukon mainit ka bala sa akon kay wala ko ’ya nagapanigarilyo? Siempre indi, indi bala? Amo man sini sa aton lainlain nga opinyon sa mga agi kag tomboy.”

Indi bala nagsiling si Jesus nga batunon naton ang tanan? Kon amo, upod na diri ang mga agi kag tomboy.

Wala ginsilingan ni Jesus ang iya mga sumulunod nga batunon nila ang tanan nga sahi sang pagkabuhi. Kundi nagsiling sia nga maluwas ang “tagsatagsa nga nagatuo sa iya.” (Juan 3:16) Mapakita sang isa nga nagatuo sia kay Jesus kon ginasunod niya ang talaksan sang Dios sa moral, nga nagasikway sang pila ka buhat pareho sang ginahimo sang mga agi kag tomboy.—Roma 1:26, 27.

Ang mga Cristiano wala nahadlok nga mangin lain sa iban

Kon may magsiling: “Indi na puede nga magbag-o pa ang mga agi kag tomboy. Natawo na sila nga amo sina.”

Mahimo ka magsabat: “Wala sing may ginasiling ang Biblia kon ngaa nangin agi ukon tomboy ang isa. Pero ginabaton sini nga may mga kaluyahon nga mabudlay dulaon. (2 Corinto 10:4, 5) Bisan pa ang iban naluyag sa pareho nila nga lalaki ukon babayi, ang Biblia nagasugo sa mga Cristiano nga isikway ang ginahimo sang mga agi kag tomboy.”

✔ Suhestyon: Sa baylo nga baisan kon ano ang ginhalinan sang mga ginabatyag sang mga agi kag tomboy, ipadaku nga ginasikway sang Biblia ang ila ginahimo. Mahimo magsiling ka: “Madamo ang nagasiling nga nangin mapintas sila kay napanubli nila ini sa ila mga ginikanan. (Hulubaton 29:22) Ano abi kon husto ina? Nahibaluan naton nga ginasikway sang Biblia ang kapintas. (Salmo 37:8; Efeso 4:31) Unfair bala ini nga sugo kay may iban nga madali maakig kag nagapamintas?”

Daw kalain man na ’ya nga hambalon sang Dios ang mga naluyag sa pareho nila nga lalaki ukon babayi nga untatan ini.

Ina nga pangatarungan nabase sa sala nga pagpati nga dapat sundon sang mga tawo ang ila nabatyagan. Ginapasalig sang Biblia ang mga tawo nga puede nila isikway ang ila di-nagakaigo nga mga handum sa sex kon gustuhon gid nila.—Colosas 3:5.

Kon may magsiling: “Bisan indi ka agi ukon tomboy, dapat bag-uhon mo ang imo opinyon sa ila.”

Mahimo ka magsabat: “Ibutang ta nga wala ko nanamian sa pagpanahor pero ikaw ’ya nanamian. Ti, husto bala nga piliton mo ako nga   bag-uhon ko ang akon opinyon kay madamo nga tawo ang nagapanahor?”

✔ Dumduma ini: Ang kalabanan nga tawo (pati na ang mga agi kag tomboy) may mga prinsipio nga ginasunod. Amo gani nga nainit sila sa pila ka kalautan pareho sang korapsion, inhustisya, ukon inaway. Ginasikway man sang Biblia ini mga buhat pati na ang malain nga ginahimo sang mga agi kag tomboy.—1 Corinto 6:9-11.

Rasonable ang ginasugo sang Biblia kag wala sini ginapakalain ang bisan sin-o. Ang sugo sang Dios nga ‘magpalagyo sa pagpakighilawas’ para sa tanan nga tawo, homoseksuwal man ukon indi.—1 Corinto 6:18.

Ang matuod, ginapunggan man sang minilyon ka tawo, nga indi agi kag tomboy, ang ila kaugalingon kon may mga tentasyon. Ginahimo nila ini kay gusto nila sundon ang sugo sang Biblia. Ang iban sa ila mga single kag halos wala na sing tsansa nga makapamana ukon makapangasawa. Ang iban naman may asawa ukon bana nga dis-ebol kag indi na makahatag sang ila seksuwal nga kinahanglanon. Pero bisan pa sa sini nangin malipayon sila gihapon. Mahimo man ini sang mga naluyag sa pareho nila nga lalaki ukon babayi kon gusto gid nila pahamut-an ang Dios.—Deuteronomio 30:19.

^ par. 4 Gin-islan ang pila ka ngalan sa sini nga artikulo.

^ par. 7 Sa Biblia, ang “pagpakighilawas” wala lamang nagapatuhoy sa aktual nga pag-sex kundi pati na sa oral ukon anal sex kag sa pag-masturbate sa iban.

BINAGBINAGA INI

  • Ngaa ginhatagan sang Dios sing kasuguan sa moral ang mga tawo?

  • Ano ang mabulig sa imo kon tumanon mo ang sugo sang Biblia sa moral?

Magtuon sing Dugang Pa

PAMANGKOT SANG MGA PAMATAN-ON

Paano Ko Ipaathag ang Akon Panindugan Parte sa Sex?

Kon may mamangkot: ‘Virgin ka pa gihapon?’ kabalo ka bala maggamit sang Biblia sa pagpaathag sang imo panindugan?

MAGMATA!

Paano Mabatuan ang Pagsulay?

Ang hamtong nga lalaki kag babayi makasarang nga batuan ang pagsulay. Anom ka paagi nga makabulig sa imo para mapabakod ang imo pamat-od kag para malikawan ang stress bangod nagpasulay ka.