Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

MAGMATA! DISIEMBRE 2010

 Ang Pagtamod sang Biblia

Ngaa Wala Na Lang Dayon Ginlaglag sang Dios ang Yawa?

Ngaa Wala Na Lang Dayon Ginlaglag sang Dios ang Yawa?

KON masarangan mo nga buligan ang mga nagaantos, himuon mo bala ini? Sa tion sang kalamidad, ang mga relief worker nagakadto dayon para buligan ang mga nagaantos kag luwason bisan ang indi nila kilala. Gani mahimo mamangkot ka, ‘Ngaa wala na lang dayon ginlaglag sang Dios ang Yawa, ang ginhalinan sang tanan nga pag-antos sang tawo?’

Para masabat ini nga pamangkot, imadyina nga may isa ka kilala nga kaso sa korte. Para mapadugay ang kaso, nagsiling ang manugpatay nga indi patas ang pagdumala sang hukom. Nagainsister man sia nga ginasuhulan sang hukom ang mga hurado. Gani, madamo nga saksi ang ginpatawag para maghatag sang ila testimonya.

Nahibaluan sang hukom nga ang malawig nga pagbista may daku nga halit, gani gusto niya nga matapos ini dayon. Pero nahibaluan man niya nga ang pamatbat sa sini nga kaso puede gamiton nga basihan sa pareho man nga mga kaso sa ulihi. Gani dapat hatagan sing nagakaigo nga tion ang kada partido nga ipresentar ang ila mga pamatuod.

Para makahimo sing pamatbat nga puede gamiton nga basihan, dapat hatagan sing nagakaigo nga tion ang kada partido nga ipresentar ang ila mga pamatuod

Paano naangot ini nga ilustrasyon sa akusasyon sang Yawa, nga ginatawag “dragon,” “man-ug,” kag “Satanas,” sa “Labing Mataas sa bug-os nga duta” nga si Jehova? (Bugna 12:9; Salmo 83:18) Sin-o gid bala ang Yawa? Ano ang iya mga akusasyon kay Jehova nga Dios? Kag san-o sia laglagon sang Dios?

Isa ka Basihan

Sa ginsuguran, ang Yawa isa ka perpekto nga espiritu, isa ka anghel sang Dios. (Job 1:6, 7) Sia ang naghimo sa iya kaugalingon nga   Yawa sang ginhandum niya nga simbahon sia sang mga tawo. Gani ginkwestyon niya ang kinamatarong sang Dios sa paggahom kag ginpagua niya nga indi dapat pagtumanon ang Dios. Nagsiling man sia nga nagaalagad lang ang mga tawo sa Dios kay ginasuhulan sila ukon ginapakamaayo. Pero kon nagaantos sila, siling niya, “sikwayon” sang tanan nga tawo ang ila Manunuga.—Job 1:8-11; 2:4, 5.

Ining mga akusasyon ni Satanas kinahanglan gid sabton, pero indi ini madala sa puersahanay. Ang matuod, kon ginlaglag dayon sang Dios ang Yawa sa hardin sang Eden, mahimo maghunahuna ang iban nga nagatan-aw nga husto ang Yawa. Gani subong Labing Gamhanan nga Dios, ginsugdan niya ang pagbista para masolbar ini nga isyu.

Bangod sa iya prinsipio kag perpekto nga hustisya, gintugutan ni Jehova nga Dios nga ipresentar sang kada partido ang ila mga saksi para maghatag sing mga testimonya. Ang tion nga ginpahanugot sa kaliwat ni Adan naghatag sa ila sing kahigayunan nga mabuhi kag suportahan ang Dios. Mahimo nila ini paagi sa pagpabilin nga matutom sa Dios bisan pa may mga kabudlayan bangod ginahigugma nila Sia.

Daw Ano Pa Kalawig?

Nahibaluan gid ni Jehova nga Dios nga samtang nagapadayon ang kaso, ang mga tawo padayon man nga magaantos. Pero gusto gid niya nga tapuson na dayon ang kaso. Ang Biblia nagasiling nga sia “Amay nga may mapinalanggaon nga kaluoy kag ang Dios nga may bug-os nga paglugpay.” (2 Corinto 1:3) Maathag nga ang “Dios nga may bug-os nga paglugpay” indi magsugot nga magdugay pa ang Yawa kon indi na kinahanglanon, ukon maglawig pa ang epekto sang iya kalautan. Pero indi man paglaglagon sang Dios ang Yawa kon wala pa natapos ang kaso.

Kon matapos na ang kaso, mapamatud-an na nga si Jehova lang ang may kinamatarong sa paggahom. Ini nga kaso batok kay Satanas mangin basihan asta sa walay katubtuban. Kon may akusasyon liwat nga matabo pareho sini, ang halimbawa ni Satanas mahimo gamiton nga basihan para indi na ini masulit liwat.

Sa nagakaigo nga tion, suguon ni Jehova nga Dios ang iya ginbanhaw nga Anak para laglagon ang Yawa kag dulaon ang tanan nga kalautan sini. Ginasugid sang Biblia nga itugyan ni Cristo “ang ginharian sa iya Dios kag Amay, kon nalaglag na niya ang tanan nga panguluhan kag ang tanan nga awtoridad kag gahom. Kay kinahanglan sia maggahom subong hari tubtob mabutang sang Dios ang tanan nga kaaway sa idalom sang iya mga tiil. Subong katapusan nga kaaway, ang kamatayon dulaon.”—1 Corinto 15:24-26.

Nagpromisa ang Biblia nga mangin paraiso ang bilog nga duta. Pareho sa orihinal nga plano sang Dios, magakabuhi ang mga tawo nga may paghidait sa paraiso! “Ang mapainubuson magapanubli sang duta, kag magakalipay sila sa kabuganaan sang paghidait.” Huo, “ang mga matarung magapanubli sang duta, kag magapuyo dira sa gihapon.”—Salmo 37:11, 29.

Binagbinaga ining ginasugid sang Biblia nga matahom nga palaabuton sang mga alagad sang Dios: “Ang tolda sang Dios yara sa mga tawo, kag magapuyo sia kaupod nila, kag sila mangin iya mga katawhan. Kag ang Dios mismo mangin kaupod nila. Kag pahiran niya ang tagsa ka luha sa ila mga mata, kag wala na sing kamatayon, ukon paglalaw ukon paghibi ukon kasakit pa. Ang mga butang sang una nagtaliwan na.”—Bugna 21:3, 4.