“Positibo Gihapon”

● Anemik si Camila, may problema man sia sa nervous system, kag nagkunol ang iya pagdaku. Gani bisan pa walo na sia ka tuig, nagataas lang sia sing 75 sentimetros. Gindala si Camila sang iya ginikanan, nga mga Saksi ni Jehova, sa isa ka seminar parte sa medisina nga mga 500 ang tumalambong. Ginhiwat ini sa isa ka teatro sa ila lugar sa Argentina. Nagpungko sila sa ikaduha nga raya.

Samtang nagalektyur ang isa ka doktor, gintudlo niya si Camila subong halimbawa sang bata nga healthy tan-awon. Wala sia makahibalo sang edad kag sitwasyon sang bata. Gani namangkot sia: “Pila na ang edad sang lapsag?”

“Walo ka tuig,” sabat sang iloy ni Camila nga si Marisa.

“Walo ka bulan?” pamangkot sang doktor.

“Indi, walo ka tuig,” sabat ni Marisa.

Natingala gid ang doktor, gani ginpasaka niya sa entablado si Marisa kag ang iya bata para sabton ang pila ka pamangkot. Sa tapos nga ginsugid ni Marisa kon ano nga mga pagtuon kag pagbulong ang ginhimo sang mga doktor kay Camila, nagsiling ang nagalektyur: “Ang iban nga iloy nagahibi kon ginatrangkaso ang ila bata. Pero sa sulod sang pito ka tuig nga pagpabulong kay Camila, ikaw ‘ya positibo gihapon. Ngaa?”

Ginsugid ni Marisa ang iya paglaum nga mabasa sa Biblia parte sa matarong nga bag-ong kalibutan nga madula na ang tanan nga klase sang balatian, pag-antos, pati na ang kamatayon. (Isaias 33:24; Bugna 21:3, 4) Sang ulihi, ginpaathag ni Marisa ang paghiliutod sang mga Saksi ni Jehova sa bug-os nga kalibutan. Nagsiling man sia nga ang ila gugma sa isa kag isa nakabulig para maatubang nila ang mga problema kag pagtilaw.—Juan 13:35.

Pagkatapos sang programa, ginpalapitan si Marisa sang isa ka babayi kag ginpangabay nga sugiran pa gid sia parte sa ginhambal niya kaina. Interesado gid ang babayi kag ginbaton niya ang libre nga pagtuon sa Biblia nga ginatanyag sang mga Saksi ni Jehova sa bug-os nga kalibutan sa sinsero nga mga tawo nga gusto maintiendihan ang Biblia kag ang katuyuan sang Dios para sa katawhan.

[Retrato sa pahina 25]

Ang walo ka tuig nga si Camila upod sa iya iloy nga si Marisa