Magdiretso sa kaundan

Magdiretso sa secondary menu

Magdiretso sa listahan sang kaundan

Mga Saksi ni Jehova

Hiligaynon

Magmata!  |  Agosto 2010

Ano ang Ginapatihan sang mga Saksi ni Jehova?

Ano ang Ginapatihan sang mga Saksi ni Jehova?

Wala matago ang mga pagpati sang mga Saksi ni Jehova, kay ang ila mga literatura matigayon sa ginatos ka lenguahe. Ang mga masunod amo ang sumaryo sang ila pila ka panguna nga pagpati.

1. Ang Biblia

Nagapati ang mga Saksi nga “ang pagsulat sa bug-os nga Kasulatan gintuytuyan sang Dios.” (2 Timoteo 3:16) Si Jason D. BeDuhn, nga kabulig nga propesor sa mga pagtuon parte sa relihion, nagsulat: “[Ginbase sang mga Saksi ni Jehova] ang ila pagsimba kag mga hilikuton sa ginasiling sang Biblia kag wala nila ginapilit ang ila kaugalingon nga pagpati.” Ginpahisuno nila ang ila pagpati sa Biblia kag wala nila ini ginapatiko para suportahan ang ila interpretasyon. Nahibaluan man nila nga ang iban nga ginasiling sang Biblia indi literal. Halimbawa, ang pito ka adlaw sang pagpanuga nagasimbulo sa malawig nga panahon.—Genesis 1:31; 2:4.

2. Ang Manunuga

Ang matuod nga Dios may kaugalingon nga ngalan—si Jehova (ukon Yahweh, nga amo ang gingamit sa Jerusalem Bible sang Romano Katoliko kag sang pila ka iskolar sa Biblia subong)—para mapatuhay sia sa butig nga mga dios. * (Salmo 83:18) Ang Hebreo nga ngalan sang Dios mabasa sing mga 7,000 ka beses sa orihinal nga mga sinulatan sang Kasulatan. Ginpakita ni Jesus nga importante gid ini nga ngalan sang magsiling sia sa iya modelo nga pangamuyo: “Pakabalaanon ang imo ngalan.” (Mateo 6:9) Gusto sang Dios nga sia lamang ang simbahon. Gani, ang mga Saksi wala nagagamit sing mga larawan ukon imahen sa ila pagsimba.—1 Juan 5:21.

“Ang Amay daku pa sa akon.”—Juan 14:28

3. Jesucristo

Sia ang Manluluwas, “ang Anak sang Dios,” kag “ang panganay sa tanan nga tinuga.” (Juan 1:34; Colosas 1:15; Binuhatan 5:31) Bangod gintuga sia, indi sia bahin sang Trinidad. “Ang Amay daku pa sa akon,” siling ni Jesus. (Juan 14:28) Si Jesus nagkabuhi na sa langit antes sia nagkadto sa duta, kag pagkatapos sang iya paghalad sang iya kabuhi kag pagkabanhaw, nagbalik sia sa langit. “Wala sing makakadto sa Amay kon indi paagi sa [iya].”—Juan 14:6.

 4. Ginharian sang Dios

Isa ini ka matuod nga gobierno sa langit nga may isa ka Hari—si Jesucristo—kag may 144,000 sia nga kaupod nga magagahom, nga “ginbakal gikan sa duta.” (Bugna 5:9, 10; 14:1, 3, 4; Daniel 2:44; 7:13, 14) Magagahom sila sa duta. Pagadulaon sa sini ang tanan nga kalautan kag pagaistaran ini sang minilyon ka tawo nga nagakahadlok sa Dios.—Hulubaton 2:21, 22.

5. Ang duta

Ang Eclesiastes 1:4 nagsiling: “Ang duta nagapabilin sa walay katubtoban.” (Biblia sang Katilingban sang mga Kristiano) Kon malaglag na ang mga malauton, ang duta himuon nga paraiso kag pagaistaran sing walay katubtuban sang mga matarong nga tawo. (Salmo 37:10, 11, 29) Matuman na ang ginsiling ni Jesus sa iya pangamuyo nga “paghimoon ang imo kabubut-on, sa duta.”—Mateo 6:10, Ang Biblia, PBS.

6. Tagna sang Biblia

Ang “Dios . . . indi makabutig.” (Tito 1:2) Gani, ang tanan nga ginsiling niya nga matabo sa palaabuton nagakatuman gid, lakip ang mga tagna sang Biblia parte sa katapusan sini nga kalibutan. (Isaias 55:11; Mateo 24:3-14) Sin-o ang makaluwas sa nagahilapit nga kalaglagan? “Sia nga nagahimo sang kabubut-on sang Dios nagapabilin sing dayon,” siling sang 1 Juan 2:17.

7. Sekular nga mga awtoridad

“Ibayad ninyo kay Cesar ang mga butang nga iya ni Cesar, apang sa Dios ang mga butang nga iya sang Dios,” siling ni Jesus. (Marcos 12:17) Gani, ginatuman sang mga Saksi ni Jehova ang kasuguan sang ila pungsod basta wala ini nagasumpakil sa kasuguan sang Dios.—Binuhatan 5:29; Roma 13:1-3.

“Ining maayong balita sang ginharian ibantala sa bug-os napuy-an nga duta subong panaksi sa tanan nga pungsod; kag nian magaabot ang katapusan.”—Mateo 24:14

8. Pagwali

Si Jesus nagsiling: “Ining maayong balita sang ginharian” ibantala sa bug-os nga duta antes sang katapusan sini nga kalibutan. (Mateo 24:14) Isa gid ka kadungganan para sa mga Saksi ni Jehova nga makigbahin sa sining nagaluwas sing kabuhi nga hilikuton. Siempre, depende na sa mga tawo kon mamati sila ukon indi. Ang Biblia nagsiling: “Ang bisan sin-o nga luyag magkuha sang tubig sang kabuhi nga wala sing bayad.”—Bugna 22:17.

9. Bawtismo

Ginabawtismuhan lamang sang mga Saksi ni Jehova ang gusto mag-alagad sa Dios bilang iya mga Saksi, pagkatapos niya matun-an sing maid-id ang Biblia. (Hebreo 12:1) Ginasimbuluhan nila ang ila personal nga dedikasyon sa Dios paagi sa pagpabawtismo sa tubig.—Mateo 3:13, 16; 28:19.

10. Posisyon sa relihion

“Tanan kamo mag-ulutod,” siling ni Jesus sa iya mga sumulunod. (Mateo 23:8) Sa panahon sang mga Cristiano sang una kag sang mga manunulat sang Biblia, wala sing klero. Amo ini ang ginasunod sang mga Saksi ni Jehova.

^ par. 4 Ang ngalan nga “Jehova” wala ginhimuhimo sang mga Saksi ni Jehova. Ginatos ka tuig na ang nagligad, ang ngalan sang Dios gin-translate nga “Jehova” sa madamo nga lenguahe, lakip ang Ingles kag Aleman. Makapasubo nga gin-islan sang iban nga translator sang Biblia ang ngalan sang Dios sing mga titulo, pareho sang “Dios” kag “Ginuo.” Ginapakita sini nga wala gid nila ginarespeto ang Awtor sang Biblia.