Magdiretso sa kaundan

Magdiretso sa secondary menu

Magdiretso sa listahan sang kaundan

Mga Saksi ni Jehova

Hiligaynon

Magmata!  |  Agosto 2010

Mga Pamangkot Parte sa mga Saksi

Mga Pamangkot Parte sa mga Saksi

 Mga Pamangkot Parte sa mga Saksi

Ngaa ginapakalain sang iban ang mga Saksi ni Jehova?

Madamo ang wala makahibalo sa ginapatihan sang mga Saksi ni Jehova. Mahimo nga indi gusto sang iban ang ila pagwali. Pero ang matuod, ginahimo ini sang mga Saksi bangod sa ila gugma sa isigkatawo. Nahibaluan nila nga “ang tagsatagsa nga nagatawag sa ngalan ni Jehova maluwas.”—Roma 10:13.

Ang mga Saksi ni Jehova bala mga Protestante, Pundamentalista, ukon isa ka sekta?

Ang mga Saksi ni Jehova mga Cristiano, pero indi sila mga Protestante kag indi man sila mga Katoliko. Nahibaluan nila nga ang pila ka panudlo sini nga mga relihion wala nabase sa Biblia. Halimbawa, wala ginatudlo sang Biblia nga ang Dios, nga amo ang pinakamaayo nga halimbawa sa pagpakita sang gugma, nagapaantos sa mga tawo sa kalayuhon nga impierno. Wala man sini ginatudlo nga ang tawo may kalag nga indi mapatay ukon ang mga Cristiano dapat mag-entra sa pulitika.—Ezequiel 18:4; Juan 15:19; 17:14; Roma 6:23. *

“Ang Pundamentalismo isa ka daku nga grupo sang Protestantismo sa Estados Unidos,” siling sang The World Book Encyclopedia. Ang pila ka Pundamentalista nga mga organisasyon “nagbaton sing posisyon sa sosiedad kag pulitika bangod sa ila literal nga paghangop sa mga bersikulo sang Biblia.” Pero indi amo sina ang mga Saksi ni Jehova. Subong sang nasiling na, wala sila nagaentra sa pulitika ukon nagagamit sang pulitika para ipilit ang ila pagpati. Sa baylo, ginaistorya nila sing personal ang mga tawo kag ginapaathag ang ila pagpati paagi sa makapakumbinsi nga mga pamatuod, pareho sang mga Cristiano sang una.—Binuhatan 19:8.

Ang sekta isa ka grupo nga nagsipak ukon nagbulag sa isa ka relihion agod magporma sang lain naman nga relihion. Ang mga Saksi ni Jehova indi sekta bangod wala sila naghalin sa iban nga relihion.

Paano ginahiwat sang mga Saksi ang ila pagtilipon?

Nagatipon sila para magtuon sing Biblia kag sa masami puede makapakigbahin ang mga tumalambong. Bukas man ini sa publiko. Ang isa sa ila programa kada semana amo ang Teokratikong Eskwelahan Para sa Ministeryo. Ginatudluan sini ang mga miembro sang kongregasyon kon paano magpanudlo, magbasa, kag mag-research. Ang isa pa amo ang 30-minutos nga pamulongpulong parte sa isa ka topiko sa Biblia nga makabulig pati sa indi mga Saksi. Dayon  ginasundan ini sang pagtuon sa Biblia paagi sa magasin nga Ang Lalantawan. Ini nga mga pagtilipon ginasugdan kag ginatapos paagi sa ambahanon kag pangamuyo kag wala sing may nagapangolekta sing kuarta.—2 Corinto 8:12.

Diin nagakuha sang ila inuggasto ang mga Saksi ni Jehova?

Ang ila hilikuton ginasuportahan sang boluntaryo nga mga donasyon. Wala sing bayad ang ila relihioso nga mga serbisyo para sa bawtismo, kasal, lubong, kag iban pa. Wala man sila sing ikapulo. Ang gusto mag-amot makahulog sang ila donasyon sa kahon para sa donasyon nga ara sa Kingdom Hall. Ang mga Saksi ni Jehova amo ang nagahimo sang ginagamit nila nga mga literatura parte sa Biblia para makakinot sila, kag mga boluntaryo ang nagapatindog sang ila mga Kingdom Hall kag iban pa nga mga pasilidad.

Nagapadoktor bala ang mga Saksi ni Jehova?

Huo. Ginapili pa gani nila ang pinakamaayo nga pagbulong para sa ila kag sa ila mga pinalangga. Magluwas sini, madamo nga Saksi ang mga nars, paramedic, doktor, kag manug-opera. Pero, ang mga Saksi ni Jehova wala nagapatughong sing dugo. ‘Maglikaw sa dugo,’ siling sang Biblia. (Binuhatan 15:28, 29) Makalilipay nga madamo na nga doktor ang nagapati nga ang pagbulong nga wala nagagamit sang dugo amo ang pinakamaayo nga paagi, kay malikawan sini ang madamo nga komplikasyon.

[Nota]

^ par. 5 Ang pagtamod sang Biblia sa sini kag ang madamo pa nga importante nga topiko makita sa libro nga Ano Gid ang Ginatudlo Sang Biblia? nga ginhimo sang mga Saksi ni Jehova.

[Kahon/Retrato sa pahina 7]

ANG LUGAR NGA MAY KAHILWAYAN

Ang banwa nga Bejucal de Ocampo sa nabagatnan nga Mexico talalupangdon gid. “Ang kalabanan nga nagaistar diri mga Saksi ni Jehova,” report sang pamantalaan nga Excélsior. Nagsiling pa gid ini: “Malinong ini nga lugar bisan pa lainlain ang relihion kag panindugan sa pulitika sang mga tawo. . . . Ang mga pumuluyo wala nagapahubog kag nagapanigarilyo kundi nagakanta kag nagabasa sing Biblia. Nagapasakop man sila sa awtoridad.”

Bisan pa lainlain ang relihion sang mga tawo sa sini nga banwa, “wala sing may nagabaisay ukon nagainaway parte sa relihion,” suno sa report. Nagsiling pa ini: “Mainabyanon sila kag nagatamyawanay bisan lainlain ang ila relihion . . . Ang kada pamilya hilway sa paghimo sang ila paagi sang pagsimba, pero indi ini tublag sa ila malinong nga pagkabuhi. Normal na lang para sa mga tawo sa Bejucal nga makakita sing madamo nga Saksi ni Jehova.” Magluwas sini, ang ila kabataan ‘talahuron mamayo, maalam, kag mabuot sa klase,’ siling sang isa ka maestro didto sa hayskul nga indi Saksi.