Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

MAGMATA! AGOSTO 2010

Ano ang Nahibaluan Mo Parte sa mga Saksi ni Jehova?

Ano ang Nahibaluan Mo Parte sa mga Saksi ni Jehova?

  Ano ang Nahibaluan Mo Parte sa mga Saksi ni Jehova?

“Madamo ako sing nabasa sa Internet parte sa mga Saksi ni Jehova, kag may nabatian man ako nga mga sugidsugid kag pagpakalain sa ila,” sulat sang isa ka ginahanas nga reporter sa Denmark. “Gani, nangin negatibo ang akon pagtan-aw sa mga Saksi ni Jehova”

GIN-INTERBYU sang ulihi sini nga reporter ang isa ka pamilya nga Saksi. Ano ang resulta? “Pagsulod ko pa lang sa ila balay, nagbag-o na ang akon pagtan-aw sa ila!” sulat niya. “Mahimo nga wala sila makilala sing maayo sang mga tawo, ukon mahimo nga ginhukman lang dayon naton sila. Amo man ako sina sang una, pero nagsala gali ako.”—Cecilie Feyling, sang Jydske Vestkysten.

Parte sa iya pagpakig-upod sa mga Saksi ni Jehova sa trabaho, ang isa ka consultant sang human resources sa balaligyaan nga madamo sing branch sa Europa nagsiling nga bunayag sila nga mga empleyado. Gani, mas gusto niya nga mga Saksi ang maobra sa iya.

Pero mas kilala ang mga Saksi ni Jehova sa ila pagwali. Natalupangdan nila nga ang iban wala nanamian nga istoryahan ang parte sa Biblia, samtang may interesado man. Ang matuod, sobra sa pito ka milyon ka tawo sa halos tanan nga pungsod ang regular nga nagatuon sing Biblia upod sa mga Saksi, kag ang iban sa ila nangin manunudlo man sing Biblia sang ulihi. Halimbawa, sa Estados Unidos, nakita sa report sang National Council of Churches nga sa 25 ka dalagku nga relihion, 4 lamang ang nagadamo, kag isa sa sini ang mga Saksi ni Jehova.

Ngaa minilyon ang nagatuon sing Biblia upod sa mga Saksi? Paano sila nagatuon? Kon magtuon ka upod sa ila, buot bala silingon nga dapat mangin Saksi ka man? Bisan pa indi ka interesado nga mangin Saksi ni Jehova, dapat mahibaluan mo ang sabat sa sini nga mga pamangkot. Indi pagpatihi dayon ang mga pagpakalain, ukon mga sugidsugid parte sa ila, sa baylo hibalua ang matuod. Ang Biblia nagasiling sa Hulubaton 14:15: “Ang tawo nga wala sing alam nagapati sang bisan ano; ang tawo nga nakahibalo magtimbang-timbang kon diin ang husto ukon indi nagabantay gid sang iya mga tikang.”—Ang Pulong sang Dios, APD.

Kabay pa nga ini nga gua sang Magmata! makabulig sa imo nga makilala sing maayo ang mga Saksi ni Jehova. Ang imo pagbasa sini nga magasin nagapakita nga bukas ang imo panghunahuna. Gani samtang ginabasa mo ang apat ka masunod nga artikulo kag ang mga kahon, ngaa indi mo pagbasahon sa imo mismo Biblia ang nalista nga mga bersikulo? * Kon himuon mo ini, ginapakita mo ang kaalam kag ang ginasiling sang Biblia nga ‘maayo nga panghunahuna.’—Binuhatan 17:11.

[Nota]

^ par. 7 Kon wala ka Biblia pero puede ka maka-Internet, mabasa mo ang mga bersikulo sa www.watchtower.org. May makita ka nga kahon nga “Read the Bible Online.” Makita mo man sa sini nga Web site ang mga balasahon parte sa Biblia sa sobra sa 380 ka lenguahe.