Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

MAGMATA! AGOSTO 2010

Ang Ginasiling sang Iban

Ang Ginasiling sang Iban

 Ang Ginasiling sang Iban

Pransia “Ang mga Saksi ni Jehova mga pumuluyo nga nagarespeto sa layi sang Republika. . . . Wala sila nagapanggamo. Nagaobra sila, nagabayad sing buhis, nagabulig para mag-uswag ang ekonomiya sang aton pungsod kag nagabulig sa mga nagakinahanglan. Kanami tan-awon nga nagatipon sing mahidaiton ining mga tawo nga lainlain ang rasa kag ginhalinan. . . . Kon ang tanan Saksi ni Jehova, madulaan sing obra kami nga mga pulis.”—Humalambal sang grupo sang mga pulis sa Pransia.

Ukraine “Ginatudluan sang mga Saksi ni Jehova ang ila kabataan sing mataas nga mga prinsipio sa moral. Ginatudluan nila ang ila kabataan nga likawan ang makahalalit nga mga batasan, buhat, kag mga kinaiya nga normal na lang sa kalibutan subong. Gani ginapaandaman nila sila parte sa malain nga epekto sang droga, pagpanigarilyo kag pagpahubog. Bunayag sila kag mapisan. . . . Ginatudluan sang mga Saksi ni Jehova ang ila kabataan sing maayo nga pamatasan, pagrespeto sa awtoridad, sa iban nga tawo kag sa ila propiedad kag mangin pumuluyo nga nagasunod sa kasuguan.”—The History of Religion in Ukraine, gin-edit ni Propesor Petro Yarotskyi.

Italya “May treinta mil ka tawo sa Olympic Stadium nga nagapamati sing maayo . . . Wala sing nagalapta nga basura, wala sing nagaginahod, kag wala sing nagasinggit. Amo sina ang kahimtangan sa Olympic Stadium kahapon . . . Wala sing may nagasenyas sing binastos, wala sing sigarilyo, wala sing nagalapta nga lata [sang ilimnon]. Ang mga tawo nagabasa lamang sing Biblia, nagalista sing nota, kag ang kabataan nagapungko kag nagapamati sing maayo.”—Report sang L’Unità parte sa kombension sang mga Saksi ni Jehova sa Roma.

Britanya “Ang Archdeacon sang Cheltenham nagsiling nga [ang Simbahan sang Inglaterra] nagakinahanglan sang madamo nga debotado nga mga tawo para mamalaybalay pareho sa mga Saksi ni Jehova.”—The Gazette, Gloucester Diocese.

 Netherlands Ang mga pumuluyo nga malapit sa Kingdom Hall sa siudad sang Leeuwarden nagpadala sing sulat sa mga Saksi nga nagasiling: “Gusto namon pasalamatan ang inyo daku nga bulig sa pagpatahom sa Noorderweg [Noorder Road]. Ang inyo mga miembro manami mamayo, kag maayo ang ila pamatasan. Mabuot ang kabataan, ginaparking sang mga adulto ang ila salakyan sa husto nga lugar, wala sila nagahaboy sang basura sa dalan, kag ang palibot sang Kingdom Hall pirme matinlo kag naatipan sing maayo. Kuntani indi lang kamo maghalin diri, kay nalipay gid kami nga mangin kaingod kamo.”

Mexico Si Elio Masferrer, nga propesor kag researcher sa National School of Anthropology and History, nagsiling nga ang mga Saksi nagabulig sa mga tawo nga “nakaeksperiensia sang grabe nga problema sa pamilya, pareho sang paglugos, pag-abuso, pagkapalahubog, kag pagkaadik sa droga.” Suno sa iya, ang ginatudlo sang mga Saksi “nagahatag sing dungog sa mga tawo nga nagabatyag nga wala na sila sing pulos” kag nagabulig nga “mabuhinan ang ila problema paagi sa paghimo sang mga butang nga nagapahamuot sa Dios.”—Excélsior nga pamantalaan.

Brazil Ang isa ka pamantalaan nagreport: “Dalayawon gid ang mga Saksi ni Jehova. Ang ila mga tilipunan pirme matinlo. Organisado ang tanan . . . Mas matinlo ang mga tilipunan pagkatapos nila gamiton. Malinong ang palibot samtang may nagahambal sa tunga. Wala sing may nagadis-uganay. Maayo ang ila pamatasan. . . . Isa gid ini ka organisado nga relihion. Nahibaluan gid nila kon paano simbahon ang Dios.”—Comércio da Franca.

Nagapati gid ang mga Saksi ni Jehova nga mas nahibaluan sang Manunuga kon ano nga mga prinsipio ang dapat sundon sang mga tawo nga iya gintuga. (Isaias 48:17, 18) Gani, sia ang ginadayaw sang mga Saksi kon ang ila maayo nga paggawi matalupangdan sang iban. Si Jesus nagsiling: “Paiwaga ang inyo kapawa sa atubangan sang mga tawo, agod makita nila ang inyo maayong mga buhat kag maghimaya sa inyo Amay nga yara sa langit.”—Mateo 5:16.

[Blurb sa pahina 4]

“Ginatudluan sang mga Saksi ni Jehova ang ila kabataan sang maayo nga pamatasan . . . kag mangin pumuluyo nga nagasunod sa kasuguan”

[Blurb sa pahina 5]

“. . . Nagatipon sing mahidaiton ining mga tawo nga lainlain ang rasa kag ginhalinan . . . ”