“Indi Kamo Magpalibog Parte sa Buwas”

Daw indi na gid makaagwanta si Renée. Ang iya bana nga si Matthew sobra na tatlo ka tuig nga wala sing permanente nga obra. “Nagalalain na gid ako,” siling ni Renée. “Nagaluya ang akon buot kay wala kami makahibalo kon ano ang matabo sa amon!” Gin-uluuluhan ni Matthew ang iya asawa paagi sa pagpaathag sa iya nga wala man sila nawad-an sang ila mga kinahanglanon. “Pero wala ka gihapon obra!” sabat ni Renée. “Dapat may ginakita kita!”

MABALAKA ka gid man kon madulaan ka sing obra. ‘Asta san-o nga wala ako sing obra?’ pamangkot sang isa nga wala obra. ‘Paano namon masagod ang amon pamilya?’

Bisan natural lang nga mabalaka, may ginlaygay si Jesucristo para mabuhinan ang kabalaka. Nagsiling sia: “Indi kamo magpalibog parte sa buwas . . . Ang buwas may kaugalingon nga palaligban.”—Mateo 6:34, Ang Pulong sang Dios, APD.

Hibalua Kon Ano ang Imo Ginakabalak-an

Wala nagsiling si Jesus nga balewalaon na lang naton ang aton mga problema. Pero, magadugang lamang ang aton kabug-atan subong nga adlaw kon magkabalaka kita sa mahimo matabo buas. Isa pa, wala kita sing kontrol sa mahimo matabo buas, maayo man ini ukon malain. Pero may mahimo kita para maatubang ang mga nagakatabo subong.

Mahapos lang ini ihambal pero mabudlay himuon. Ang bana ni Rebekah 12 na ka tuig sa iya obra pero ginpahalin sia. Si Rebekah nagsiling: “Kon  grabe ang imo kabalaka, indi ka makapamensar sing maayo. Pero dapat gid kami mamensar. Gani ginatinguhaan ko nga kontrolon ang akon kaugalingon. Sang wala man matabo ang akon ginakahadlukan, narealisar ko nga wala sing pulos ang pagkabalaka. Kon ang mga problema lamang sini nga adlaw ang aton pensaron, malikawan naton ang stress.”

Pamangkuta ang imo kaugalingon: ‘Ano gid ang akon ginakabalak-an? Ano ang posibilidad nga matabo ini? Ano kadamo nga kusog ang ginagamit ko sa pagkabalaka sa matabo ukon indi mahimo matabo?’

Mangin Kontento

Ang aton pagtan-aw sa mga butang may epekto sa aton emosyon. Gani, ginalaygayan kita sang Biblia: “Kon kita may pagkaon, panapton kag pasilungan, mangin kontento na kita sa sini nga mga butang.” (1 Timoteo 6:8) Ang pagkakontento nagakahulugan nga indi naton pagpasugtan pirme ang aton mga gusto kundi nalipay na kita kon matigayon na naton ang aton mga kinahanglanon kada adlaw. Ang handum nga matigayon ang imo mga gusto magabalabag lamang sa imo pagtinguha nga pasimplehon ang imo kabuhi.—Marcos 4:19.

Natun-an ni Renée nga mangin kontento sa tapos niya mabinagbinag sing maayo ang iya sitwasyon. Nagsiling sia: “Wala man kami nautdan sing koryente ukon nawad-an sing gatong, kag may ilistaran gihapon kami. Ang matuod gali nga problema amo nga namag-o kami sa amon kabuhi subong kag gusto ko nga ibalik ang amon kahimtangan sang una, kag amo ini ang nagapadugang sang akon kabalaka.”

Narealisar ni Renée nga ang nagapabudlay sa iya indi ang iya sitwasyon, kundi ang iya pagtamod. “Dapat ko atubangon ang matuod namon nga sitwasyon kag kalimtan kon ano ang gusto ko matabo,” siling niya. “Sang matun-an ko nga mangin kontento sa ginahatag sang Dios kada adlaw, nangin mas malipayon ako.”

Pamangkuta ang imo kaugalingon: ‘Natigayon ko bala ang akon mga kinahanglanon subong nga adlaw? Kon amo, puede bala nga ang subong lang ang akon pensaron, kag magsalig nga matigayon ko man ang akon mga kinahanglanon buas?’

Ang husto nga pagtamod amo ang una nga paagi sa pag-atubang sang kabudlayan kon madulaan sing obra. * Pero anong praktikal nga mga paagi ang mahimo mo kon mabuhinan ang inyo ginakita?

[Nota]

^ par. 14 Para sa dugang nga impormasyon kon paano makakita kag makapabilin sa obra, basaha ang Hulyo 8, 2005 nga Magmata!, pahina 3-11.

[Kahon sa pahina 5]

Sigeha Lang!

Pagkatapos sang pila ka semana nga wala gihapon makakita sing obra si Fred, abi niya wala na sia sing paglaum. “Daw pareho ini nga nagahulat ka nga may masugat sa imo sa terminal, pero wala sing nag-abot,” siling niya. Pero ginhimo gihapon ni Fred ang masarangan niya. Nagpadala sia sing résumé sa mga kompanya bisan pa daw diutay lang ang posibilidad nga mabaton sia. Ginbalikbalikan niya ini kag ginhandaan niya sing maayo ang mga interbyu, kay nagapati sia nga “kon magplano ka sing maayo kag magmapisan, sigurado nga magauswag ka.” (Hulubaton 21:5, APD) Si Fred nagsiling: “Sa isa ka kompanya, duha ka beses ako nga gin-interbyu kag ginhimbisan sang mga manedyer.” Pero maayo ang resulta sang pagtinguha ni Fred. “Nabaton ako!” siling niya.

 [Kahon/Retrato sa pahina 6]

Mas Importante Sangsa Sueldo

Ano ang mas importante, ang imo pagkatawo ukon ang imo sueldo? Binagbinaga ang duha ka hulubaton sa Biblia.

“Maayo pa ang imol nga nagalakat sa iya pagkadungganon sang sa balingag sa iya mga dalanon bisan sia manggaranon.”—Hulubaton 28:6.

“Maayo pa ang pagkaon nga mga utan diin may gugma sang sa pinatambok nga baka kag may dumut sa sini.”—Hulubaton 15:17.

Ginapakita sini nga ang pagkatawo sang isa wala nagakadula kon madulaan sia sing obra. Gani, sang nadulaan sing obra ang bana ni Renée, ginsilingan niya ang ila kabataan: “Madamo nga amay ang nagbiya sa ila pamilya. Pero wala ina paghimua ni Tatay ninyo. Nahibaluan gid ninyo kon daw ano niya kamo kapalangga kag ginabuligan gid niya kamo sa inyo mga problema. Sia ang pinakamaayo nga amay para sa inyo.”