Ginkilala sang Korte sang Espanya ang Kinamatarong sang Isa Ka Iloy

● Ano ang batyagon mo kon silingon ka nga indi ka maayo nga ginikanan? Paano kon may magsiling nga ang imo kabataan indi makahibalo makigbagay sa iban, indi makahibalo sang husto kag sala, kag wala sing alam bangod sa imo impluwensia?

Amo sini ang mga panumbungon sang bana anay ni Rosa López, nga iloy sang duha ka bata nga babayi sa Espanya, sang magpasaka ini sang kaso para makuha ang kustodiya sang ila duha ka bata. Si Rosa isa sa mga Saksi ni Jehova, kag suno sa iya bana anay, ang iya relihioso nga mga pagpati may malain nga epekto sa ikasarang sang ila bata nga makig-upod sa iban, sa eskwelahan, kag sa pagkilala sa maayo kag malain. Sang napierde ang bana ni Rosa sa lokal nga korte, nag-apelar ini sa korte sang ila probinsia.

Ang mga kaso parte sa kustodiya sang bata masiling nga nauyatan sing maayo sang korte kon ginatinguhaan sang mga hukom nga mangin patas. Indi isyu kon ano ang relihion sang mga ginikanan. Sa baylo, ginatan-aw lang sini ang mga isyu subong sang: Ano ang pinakamaayo para sa bata? Makahalit bala ang impluwensia sang ginikanan nga nagaatipan sa bata subong? Sin-o nga ginikanan ang mas makahatag sang mga kinahanglanon sang bata?

Para masabat ini nga mga pamangkot, ang korte nagpadala sing psychologist agod interbyuhon ang mga bata kag ang ila mga ginikanan. Ano ang resulta? Nakita sang psychologist nga bisan pa anom ka tuig na ang mga bata sa poder sang iloy, maalam sila sa klase, kag kabalo sila makig-upod sa iban kag sa ila pamilya. Base sa opinyon sang psychologist kag sa pahayag sang mga ginikanan, ang hukom wala sing nakita nga ebidensia nga “nahalitan ang balatyagon kag ikasarang sa pagpakig-upod sang mga bata bangod nagdaku sila upod sa mga Saksi ni Jehova.” Nagsiling pa gid sia nga ang mga alegasyon sang bana ni Rosa “wala gid sing basihan.”

Bangod sa pagpakalain sa relihion kag sala nga mga impormasyon, madamo ang nagpati nga ang kabataan sang mga Saksi ni Jehova wala napadaku sing “normal.” Pero indi sala ang pagpadaku sa kabataan paagi sa mga prinsipio sang Biblia. Sa baylo, ginabuligan sila nga mangin balanse, mapinalanggaon, kag maayo nga mga kabataan.—Efeso 6:4; 2 Timoteo 3:15-17.

[Retrato sa pahina 14]

Ginhatag gihapon kay Rosa López ang kustodiya sang iya duha ka bata