“Ginapahalin Ka Na Namon”

GINHAYUAN sia sa ila kompanya nga Fantastic Fred. * Sa sulod sang anom ka tuig nga nagtrabaho sia diri, nagdaku ang kita sang kompanya bangod sang iya mga ideya. Gani sang ginpatawag si Fred sa opisina sang iya amo, abi niya i-promote sia ukon taasan ang iya sueldo. Pero ginsilingan sia sang iya amo nga, “Ginapahalin ka na namon.”

Daw indi makapati si Fred sa iya nabatian. “Daku ang akon sueldo kag nanamian ako sa akon obra, pero sa isa ka pisok nadula ang tanan,” siling niya. Sang ginsugid niya ini sa iya asawa nga si Adele, nakibot ini. “Daw tinakluban ako sang langit,” siling niya. “Sa pensar ko, ‘Maano na lang kami?’”

Ang natabo kay Fred nagakatabo man sa minilyon ka tawo, subong sang ginapakita sang graph sa ubos. Pero indi makita sa sini nga mga numero ang kasakit nga naagihan sang mga nadulaan sing obra. Binagbinaga ang natabo kay Raúl, nga halin sa Peru. Ginpahalin sia sa iya obra sa isa ka daku nga hotel sa New York City pagkatapos sang 18 ka tuig. Nangita sing obra si Raúl, pero wala gid sia sing nakita. “Sa sulod sang halos 30 ka tuig, ako ang nagasagod sa akon pamilya,” siling niya. “Pamatyag ko subong, wala ako sing pulos.”

Ginapakita sang eksperiensia ni Raúl ang nagakatabo sa mga nadulaan sing obra. Para sa ila, indi lang obra ang nadula, kundi pati ang ila bug-os nga pagkatawo. Si Matthew wala sing obra sa sulod sang sobra tatlo ka tuig. “Nagbatyag ako nga wala sing pulos,” siling sang iya asawa nga si Renée. “Kon wala ka obra, manubo ang pagtan-aw sa imo sang mga tawo, kag sa ulihi maganubo man ang pagtan-aw mo sa imo kaugalingon.”

Magluwas sa kasakit nga ginabatyag sang mga nadulaan sing obra, dapat pa sila magtuon sa pagpangabuhi nga gamay ang kita. “Sang daku pa ang amon kita, wala namon ginapensar nga magkinot,” siling ni Fred. “Pero sang nadulaan kami sing obra, kinahanglan namon pasimplehon ang amon kabuhi, kay kadaku sang amon mga balayran.”

Samtang nagapangita ka sang bag-o nga obra, kinahanglan mo atubangon ang mga kabalaka. Kinahanglan mo man magkabuhi suno sa kon ano na lang ang masarangan mo. Pero binagbinagon anay naton ang duha ka praktikal nga paagi para maatubang mo ang kabalaka kon madulaan ka sing obra.

[Nota]

^ par. 2 Gin-islan ang pila ka ngalan sa sini nga serye.

[Graph sa pahina 3]

(Para sa aktual nga pormat, tan-awa ang publikasyon)

Mga Nadulaan sing Obra sang 2008 sa Tatlo Lamang ka Pungsod

Japan 2,650,000

Espanya 2,590,000

Estados Unidos 8,924,000