Malipayon Bisan May Malala nga Kasablagan

Panugiron ni José Godofredo Várguez

Maayo ang akon panglawas sang natawo ako, kag normal ako nga bata. Sang 17 anyos ako, ang akon obra amo ang pagpang-welding. Duha ka tuig ang nagligad, samtang nagaobra ako malapit sa mayor nga linya sang koryente nga mga 14 metros ang kataason, gulpi lang nag-ulan. Nakoryente ako, nahulog, kag nadulaan sang animo. Nakabugtaw lang ako pagkatapos sang tatlo ka bulan nga coma. Ulo ko lang ang akon mahulag. Naglalain gid ako sang indi ko na mahulag ang akon tiil kag kamot!

SANG una, akig ako sa Dios kay ngaa gintugutan pa niya ako nga mabuhi. Nagpensar pa gani ako nga maghikog. Nangayo ako sing bulig sa pila ka relihion, pero wala nila ako malugpayan kag wala nila masabat ang akon mga pamangkot parte sa Dios. Wala gani nila ginapalig-on ang mga tawo nga sundon ang mga talaksan kag mga ginatudlo sang Biblia! Sang napatay si Nanay sang 1981, nangin palahubog ako kag sugarol. Sa pensar ko, basi maluoy man ang Dios sa akon bangod sa akon kahimtangan kag patawaron niya ako sa akon pagkapalahubog. Nangin imoral man ako kay may ginpuyopuyo ako nga babayi.

Nagbag-o ang Akon Panimuot

Trentay siete anyos ako sadto sang una ko nga nakilala ang mga Saksi ni Jehova. Bangod sa malain nga mga istorya sang iban parte sa mga Saksi, pirme nagasiling si Nanay nga sila ang pinakamalain nga relihiyon. Bisan pa sini, ginbaton ko sila sa balay para pamatud-an nga sala sila, kay abi ko madamo na gid ako sing nahibaluan sa Biblia. Pero, nakibot ako kay gamay lang gali ang akon nahibaluan kon ikomparar sa ila! Nagdayaw pa gid ako sang gingamit nila ang Biblia para sabton ang tanan ko nga pamangkot. Sugod sadto, kumbinsido ako nga nasapwan ko ang kamatuoran.

Makapasubo nga wala ginbaton sang akon ginapuyopuyo ang akon bag-o nga ginapatihan, gani nagbulagay kami. Padayon ko nga gintinluan ang akon pagkabuhi kag ginpahisuno ko ang akon batasan kag panghunahuna sa ginatudlo sang Biblia. Ginbuligan gid ako sang Dios nga  malampuwasan ang halit sa akon hunahuna kag balatyagon bangod sa aksidente. Gani sa sulod sang 20 ka tuig, nangin malipayon ako sa pag-alagad paagi sa paghatag sang akon daku nga tion sa pagwali. Bangod dis-ebol ako, natingala ang mga tawo kon ngaa madamo gihapon ako sing mahimo kag pirme malipayon. Kay man, wala ako nagaisahanon. Upod ko ang akon manghod nga lalaki nga si Ubaldo, nga may Down syndrome. Ginbaton man niya ang kamatuoran sa Biblia, kag kaupod ko sia nga nagaalagad kay Jehova.

Nagabuligay kami nga duha. Kon upod kami sa ministeryo, sia ang nagatulod sang akon wheel chair kag nagapanuktok sa puertahan. Kon nagaistorya na ako sa tagbalay, sia ang nagabukad sang Biblia kag nagapakita sang literatura. Ginabuligan man niya ako sa iban pa nga buluhaton. Dayon, ako naman ang nagasuportar sa amon mga kinahanglanon paagi sa pagbaligya sang mga kosmetiko. Dugang pa, ginabuligan kami sang mga Saksi ni Jehova sa amon lugar sa pagdigamo, sa mga ulubrahon sa balay, kag sa pagpakonsulta sa doktor. Ginapasalamatan gid namon ini ni Ubaldo!

Isa man ako ka gulang sa Cristianong kongregasyon, kag ginabuligan ako sang iban sa kongregasyon sa pag-research sang mga topiko sa Biblia. Paagi sa akon baba, ginakuritan ko sing lapis ang importante nga mga punto sa amon ginatun-an.

Kon pamangkuton gani ako kon malipayon ako, nagasabat gid ako dayon nga huo! Ngaa abi masubuan ako? Nahibaluan ko ang matuod nga katuyuan sang kabuhi, kag ginahulat ko ang promisa sang Dios sa iya matutom nga mga sumilimba, ang perpekto nga panglawas sa Paraiso sa duta.—Isaias 35:5, 6; Lucas 23:43.

[Retrato sa pahina 24]

Sang 18 anyos si José, isa ka tuig antes sia maaksidente

[Retrato sa pahina 25]

Nagabuligay kami ni Ubaldo sa pagministeryo sa Mexico

[Retrato sa pahina 25]

Ginabukad sang isa ka Saksi ang akon Biblia samtang nagapamulongpulong ako sa Kingdom Hall

[Retrato sa pahina 25]

Ginabuligan kami sang mga Saksi sa amon lugar sa pagdigamo kag sa mga ulubrahon sa balay