“Untati Ninyo ang Pagkabalaka”

“Naubos gid ang amon kuarta sa bangko pati na ang amon sinuptan para sa kabataan. Pila man ka bulan nga wala kami sing kinitaan.”

● Nagadumala ako sang isa ka eskwelahan sa isa ka banwa sa India, kag maayo ang dalagan sini. Nakaagi nga naglab-ot sa 500 ang amon estudyante. Pero sang ulihi, tungod may mga bus na halin sa kilala nga eskwelahan sa siudad nga nagasugat sa mga estudyante sa amon lugar, nangin mahapos na ang pag-eskwela didto. Gani, madamo nga estudyante ang nagsaylo sa amo nga eskwelahan. Ang matuod, mga 60 na lang ang nabilin sa mga 500 namon ka estudyante. Nadugangan pa gid ang akon problema kay sa sina man nga tion, wala gintuman sang isa ka opisyal sang eskwelahan ang amon kontrata, kag may utang pa sia sa akon. Daku gid ang amon problema kay madamo kami sing manunudlo nga dapat suelduhan.

Gin-istoryahan namon nga pamilya ang amon kahimtangan. Ginpakita namon ang pagkamasinakripisyuhon samtang ginatinguhaan namon nga sundon ang ginsiling ni Jesus nga mangin ‘simple ang mata.’ Buot silingon, indi kami maggasto sing sobra sangsa amon masarangan. (Mateo 6:22, 25) Wala namon anay gingamit ang amon salakyan bangod mahal ang gasolina kag ang pagmentinar sini. Para makakinot sa amon gasto sa pagkaon, sa gab-i na kami nagapanindahan kay mas barato ang balaklon kon ginapaubos na lang ini. Ginpasimple man namon ang amon mga ginakaon.

Mga Saksi ni Jehova kami, gani importante gid sa amon ang pagtambong sa Cristiano nga mga pagtilipon upod sa pareho namon nga mga Saksi. (Hebreo 10:25) Gani bisan pa namigado kami kag kon kaisa malayo ang ginahiwatan sang amon dalagku kag gamay nga mga pagtilipon, nagdesisyon kami nga tambungan ini tanan. Ginatudluan man namon ang mga tawo parte sa Biblia bisan pa ang iban sa ila malayo ang ginaistaran. Nagamotor kami imbes nga dalhon ang amon salakyan, amo nga indi puede nga damo ang maangkas.

Pero indi buot silingon sini nga nabuhinan ang amon tion sa pagwali. Kundi nadugangan pa gani ang tion nga ginagamit sang akon asawa kag sang amon bata nga babayi sa pagsugid sa iban parte sa Biblia. Kon kaisa, nagalakat sila sing mga anom asta walo ka kilometro pakadto sa ginaistaran sang mga tawo nga interesado sa pagtuon sing Biblia. Kami sang akon bata nga lalaki nagatinguha man nga madugangan ang amon tion sa pagtudlo sing Biblia sa iban.

Nakatulutibawas na kami subong. Pero ang amon eksperiensia nagtudlo sa amon nga likawan ang sobra nga pagsalig sa materyal nga mga butang. Natun-an man namon nga indi pagkabalak-an sing tuman ang mga butang nga indi namon kontrolado. Napabakod gid kami sang Salmo 55:22, (Ang Pulong sang Dios) nga nagasiling: “Itugyan sa GINOO ang imo mga palaligban, kay atipanon niya ikaw. Indi niya pagpabay-an ang mga matarong hasta san-o.” Napamatud-an gid namon ini sang naeksperiensiahan namon ang problema sa pinansial!—Gin-amot.