Magdiretso sa kaundan

Magdiretso sa listahan sang kaundan

Halin sa Sekreto nga Pag-alagad Pakadto sa Sagrado nga Pag-alagad

Halin sa Sekreto nga Pag-alagad Pakadto sa Sagrado nga Pag-alagad

 Halin sa Sekreto nga Pag-alagad Pakadto sa Sagrado nga Pag-alagad

Panugiron ni Andrew Hogg

“Kon mag-abot ang tion nga kinahanglan naton buy-an ang aton nuklear nga mga missile,” siling sang kapitan sang amon submarino, “buot silingon napaslawan kita sa aton misyon.” Bangod sini, ginhambalan namon kon bala husto ukon sala ang pag-entra sa mga inaway nga nagagamit sing nuklear nga mga armas. Soldado ako nga naasayn sa isa ka submarino, kag ang amon trabaho ginatawag man nga sekreto nga pag-alagad bangod sa amon pagtinguha nga indi mahibaluan ang amon ginahimo. Pero ngaa amo sini ang akon ginpili nga trabaho?

NATAWO ako sa Philadelphia, Pennsylvania, U.S.A., sang 1944. Mga soldado ang akon lolo, amay, kag tiyo. Samtang nagadaku ako, naimpluwensiahan ako sang ila pagtamod nga ang pagsoldado amo ang pinakamaayo nga mahimo sang isa ka tawo. Sang bata pa ako, nag-tour ako sa lugar nga malapit sa amon diin ginahimo kag ginakay-o ang mga barko kag mga submarino para sa inaway, kag diri ako una nga nakakita sing submarino. Sugod sadto, handum ko gid nga makatrabaho sa isa ka submarino. Sang madali na lang ako makatapos sa hayskul, nabaton ako sa U.S. Naval Academy. Apat ka tuig sang ulihi, naggradwar ako sang Hunyo 1966.

Nagsulod ako sa Naval Nuclear Propulsion Program para maghanas parte sa nuclear engineering kag submarine operation. Dayon, sang Abril 1967, nagpakasal kami ni Mary Lee Carter, ang akon pinalangga nga asawa tubtob subong. Natuman ko gid ang akon handum sang Marso 1968, sang gin-asayn ako sa akon una nga submarino nga USS Jack. Pagligad sang mga isa ka tuig, ginbun-ag ni Mary Lee ang amon subang nga bata nga si Allison.

Sang 1971, nangin Engineer Officer ako sang USS Andrew Jackson. Ang kapitan sini amo ang nagsiling sang mga pinamulong nga ginsambit ko sa umpisa. Samtang yara kami sa dagat, sa sulod sining submarino nga may mga Polaris missile, naeksperiensiahan namon ang isa ka hitabo nga ginakahadlukan gid sang tanan nga nagasakay sa submarino, ang sunog. Mga tungang-gab-i sadto, samtang nagapahuwayhuway kami sang akon mga upod, nabatyagan namon nga daw may nagbunggo sa submarino. Dayon, nabatian namon ang uwang sang sirena, kag ang pahibalo nga, “May sunog sa machinery room one!”

Bangod akon responsibilidad ang halos tanan nga makinaryas kag mga koneksion sang koryente, nagdalidali ako agod tan-awon kon ano ang naguba. Nagkalayo ang isa sa mga oxygen generator, nga amo ang nagapatubas sang mahaklo nga hangin. Apat sa amon ang dalidali nga nagsuksok sing oxygen mask kag ginpasungaw paggua ang gas nga mahimo bangdan liwat sang kalayo. Maayo lang kay wala man sing may nahalitan sa amon. Bisan amo sini ang natabo, nakapabilin kami sa amon asaynment. Pamatuod ini nga maayo gid ang paghanas sa amon.

Nagbasa Ako Parte sa Manugpahidait

Para buligan kami nga maatubang ang stress sa amon obra, ginapalig-on kami nga maghinguyang sing pila ka oras kada semana sa pagtuon parte sa kultura. Sa masami, ginabasa ko ang istorya sang kabuhi sang huwaran nga mga soldado. Pero sa sini nga tion, ginbasa ko ang parte sa isa ka bantog nga manugpahidait, si Jesucristo. Ginbasa ko ang Mga Ebanghelyo sa Biblia nga ginhatag sa akon sang naggradwar ako sa akademya. Pero sa baylo nga maathagan, nagdamo pa gid ang akon pa mangkot. Kinahanglan ko gid ang bulig para mahangpan ko ini.

Sang madali na lang matapos ang amon asaynment, ginmiting kami sang kapitan sa amon kuarto kag may ginpahibalo sia: “Gentlemen, ang aton engineer gin-asayn na sa pinakamaayo nga trabaho sa United States Navy. Sia na ang mangin Engineer Officer sa pinakabag-o nga submarino sang navy.” Daw indi ako makapati!

Bangod sining bag-o nga asaynment, nagsaylo kami sang akon pamilya sa Newport News, Virginia, diin ginahimo pa lang ang USS Los Angeles. Nalakip sa akon obra ang pagtesting sa pagkahuman sini nga submarino kag paghimo sing mga manual kag mga programa para sa paghanas sa pagpaandar sini. Nanamian gid ako sa akon obra bisan pa tuman ini ka komplikado. Sa pihak nga bahin, ginbun-ag ni Mary Lee ang amon bata nga lalaki nga si Drew. Duha na ang akon bata kag napensaran ko liwat ang parte sa Dios: ‘Ano ang iya pagtamod sa inaway? Ano ang nagakatabo kon mapatay ang tawo? May impierno gid bala?’

Nasabat Gid Man ang Akon mga Pamangkot!

Sa sini man nga tion, ang akon asawa nagsugod sa pagpakig-istorya sa duha ka Saksi ni Jehova. Isa ka bes, sang magtawag ako sa balay halin sa akon ulubrahan, si Mary Lee nagsiling, “Ari diri ang duha ka ‘babayi nga naga-Bible.’”

“Ano ang ila relihion?” pamangkot ko.

“Saksi ni Jehova,” sabat niya.

Wala gid ako sing ideya parte sa mga Saksi, pero gusto ko gid nga mahangpan ang Biblia. “Hambala sila nga mabalik sa sunod nga gab-i,” siling ko. Wala magdugay, ang isa sa ila nagbalik upod sa iya bana, kag kami sang akon asawa nagsugod sa pagtuon sing Biblia.

Amat-amat nga nasabat ang mga pamangkot nga tinuig na nga nagpalibog sa akon. Halimbawa, natun-an ko nga ang mga patay “wala makahibalo sang bisan ano,” kag daw nagakatulog lamang sing mahamuok, suno sa ginsiling ni Jesus. (Manugwali 9:5; Juan 11:11-14) Gani, ang mga patay wala nagaeksperiensia sing himaya ukon pag-antos kundi ‘nagakatulog’ sa kamatayon, kag nagahulat nga banhawon.

Nagsugod man kami ni Mary Lee sa pagtambong sa Cristianong pagtilipon sa Kingdom Hall sa amon lugar. Nakita namon diri nga ang mga Saksi ululupod nga nagaalagad sa Dios nga may paghidait kag paghiusa, bisan pa nga lainlain ang ila kultura, tinapusan, kag rasa. “Mapabag-o gid sang Biblia ang kabuhi sang mga tawo,” siling namon nga mag-asawa.—Salmo 19:7-10.

Pagdesisyon

Sang magsugod ang Arab-Israeli War sang 1973, ginpadala ang mga submarino sang U.S. Atlantic Fleet. Posible nga mangin masandukot ang inaway, kag narealisar ko nga ang gobierno sang tawo  indi makadala sing matuod kag dayon nga paghidait kundi ang Ginharian sang Dios lamang. Ang matuod, pirme ko ginapangamuyo nga “Magkari ang imo ginharian. Matuman ang imo kabubut-on sa duta,” pero wala ko mahangpan ang buot silingon sini. (Mateo 6:9, 10) Apang karon, nahangpan ko na nga ang Ginharian sang Dios isa ka gobierno sa langit nga sa indi madugay magagahom sa bug-os nga duta. Dulaon sini ang tanan nga kalautan kag ang mga nagahimo sing malaut.—Daniel 2:44; 7:13, 14.

Ang isa ka bersikulo sa Biblia nga may daku gid nga epekto sa akon amo ang 2 Corinto 10:3, 4. Nagsiling ini nga ang matuod nga mga Cristiano, “wala nagapakig-away suno sa undanon nga paagi. Kay ang mga hinganiban sang amon pagpakig-away indi undanon, kundi gamhanan paagi sa Dios.” Natun-an ko nga nagapatuhoy ini sa espirituwal nga pagpakig-away kag nalakip sa “mga hinganiban” ang “espada sang espiritu,” nga amo ang Balaan nga Biblia.—Efeso 6:17.

Kinahanglan ko karon maghimo sing desisyon. Padayunon ko bala ang propesyon nga naluyagan ko gid ukon ipahisuno ko ang akon kabuhi sa kamatuoran sa Biblia? Sa tapos ko ini mapangamuyo, nagsiling ako nga kon matuod nga luyag ko gid nga mangin manugpahidait dapat ko tumanon ang mga sugo sang Dios.

Ang Akon Bag-o nga “Commander in Chief”

Nangamuyo kami ni Mary Lee kag gin-istoryahan namon ang amon palaabuton kag nagdesisyon kami nga alagaron ang matuod nga “Commander in Chief” nga wala sing iban kundi si Jehova nga Dios. Nagdesisyon kami nga idedikar ang amon kabuhi kay Jehova, kag nag-resign ako sa navy. Ginsaylo ako sa Norfolk, Virginia, samtang ginahulat ko ang pormal nga pagpagua sa akon. Ang kalabanan sang akon kaupod nga mga soldado natingala sa akon desisyon kag ang iban naakig pa gani sa akon. Pero may pila nga nagpakita sing interes sa akon pagpati kag gintahod nila ang akon desisyon.

Sang 1974, nabaton ko ang pahanugot nga magbiya sa pagkasoldado. Sina man nga tuig, ginbawtismuhan kami sang akon asawa subong simbulo sang amon dedikasyon sa Dios sa “Divine Purpose” Distrito nga Asembleya sang mga Saksi ni Jehova sa Hampton, Virginia. (Mateo 28:19, 20) Panugod pa lang ini sang amon bag-o nga kabuhi.

Pag-atubang sa Bag-o nga mga Kabudlayan

May duha kami ka gamay pa nga mga bata, wala sing trabaho, kag ang amon sinuptan para lamang sa pila ka bulan. Madamo ako sing gin-aplayan nga obra kag nagsalig nga indi kami pagpabay-an sang Dios. Wala madugay, nabaton ako sa isa ka kompanya. Ang akon sueldo katunga lang sa ginasueldo ko anay, pero nasuportahan sini ang akon pamilya amo nga indi na namon kinahanglan magsaylo sa iban nga lugar.

Samtang nagauswag kami sang akon asawa sa pag-alagad kay Jehova nga Dios, luyag namon dugangan pa gid ang amon pag-alagad sa iya. May kilala kami nga isa man ka Saksi nga pamilya nga nagsaylo sa sentro sang Virginia bangod nagakinahanglan didto sing dugang nga mga manunudlo sang Biblia, kag gin-agda nila kami nga kadtuan sila. Makaisa pa lang kami nagkadto didto, pero nakumbinsi kami dayon nga magsaylo man didto. Nagpangabay ako sa kompanya nga akon ginaubrahan nga i-asayn ako sa lugar nga amon sayluhan para mapadayon ko ang akon trabaho, kag nalipay gid ako nga nagpasugot ang kompanya. Ang matuod, gin-promote pa ako! Kag ang kompanya pa ang naggasto sa amon pagsaylo. Sa pensar namon, ‘Matuod gid nga ginaatipan sang Dios ang mga nagauna sang iya kabubut-on.’—Mateo 6:33.

Gintinguhaan sang amon pamilya nga magkabuhi sing simple, amo nga naggamit namon ni Mary Lee ang amon daku nga tion sa pag-alagad subong Cristiano nga mga ministro. Bangod sini, naatipan namon sing maayo ang amon duha ka bata samtang nagadaku sila. Daku gid nga kalipay ang resulta sini, bangod sanday Allison kag Drew padayon nga “nagalakat sa kamatuoran.”—3 Juan 4; Hulubaton 23:24.

Matuod may mga tion man nga ginakabalak-an namon ang parte sa amon galastuhon, puluy-an, panglawas, kag pagtigulang. Pero wala gid kami ginpabay-an ni Jehova. Naghinulsol bala ako nga ginbiyaan ko ang “sekreto nga pag-alagad”? Wala gid! Kon balikan namon ni Mary Lee ang nagligad, masiling gid namon nga ang pag-alagad kay Jehova amo ang pinakadungganon kag pinakamakalilipay nga butang nga mahimo sang tawo.—Manugwali 12:13.

[Blurb sa pahina 14]

Nagdesisyon kami nga alagaron ang matuod nga “Commander in Chief

[Retrato sa pahina 12, 13]

Ang USS “Los Angeles”

[Credit Line]

U.S. Navy photo

[Retrato sa pahina 13]

Kami ni Mary Lee subong