Magdiretso sa kaundan

Magdiretso sa listahan sang kaundan

Ang Shell sang Mollusk

Ang Shell sang Mollusk

 Gindesinyo Bala ini?

Ang Shell sang Mollusk

▪ Ang mga shell daw mabuluk-on kon tan-awon, pero ang matuod mabudlay ini buk-on. “Ang pila sa sini kinahanglan ko pa nga martilyuhon para mabuka,” siling sang enhinyero nga si Kenneth Vecchio, sang nadumduman niya ang ginhimo niya sang bata pa sia. Ang halimbawa sang matig-a nga shell amo ang shell sang mga mollusk. *

Binagbinaga: Ang nasulod nga bahin sang shell sang mga mollusk (ginatawag nga nacre, ukon mother-of-pearl) may gamay katama nga mga anib nga tuman kaikit ang distansia. “Nagdayaw gid kami sang gin-obserbahan namon paagi sa nanoscale ang pagkasibod sang nacre kag mahimo nga amo gid ini ang nakabulig kon ngaa matig-a katama ang shell,” siling ni Christine Ortiz, isa ka propesor sang Department of Materials Science and Engineering sa Massachusetts Institute of Technology, U.S.A.

Ginlaragway sang manunulat sa siensia nga si Charles Petit ang ginpadakuan nga laragway sang nacre subong “naplastar gid sing makatilingala.” Nagsiling sia: “Kon tan-awon sa mikroskopyo ang ginpihak nga bahin sini, daw pareho ini sang gintangkastangkas nga mga hollowblock nga matapan kag korte hexagon. Human ini sa matin-aw nga mineral nga calcium carbonate nga nasampawsampaw sing maayo. Nagatapik ini paagi sa gum nga ginaluad sang mollusk.”

Nagapati ang mga sientipiko nga ang shell sang mollusk makabulig para makahimo sing madamo nga butang pareho sang matig-a katama nga mga kasangkapan sa guerra, lawas sang salakyan, pakpak sang eroplano, kag iban pa. “Ang kinaugali naggamit sing tuman kaikit nga mga desinyo para makahimo sing de-kalidad nga mga butang,” siling ni Ortiz. “Sa madamo nga kahimtangan, wala pa gid sing mga enhinyero nga nakahimo sini.”

Ano sa banta mo? Natabuan lang bala ang tumalagsahon nga katig-a sang shell sang mollusk? Ukon may nagdesinyo sini?

[Nota]

^ par. 3 Ang mga mollusk nagapatuhoy sa mga sapat nga mahumok sing lawas kag wala sing tul-an. Sa dagat, ang mga mollusk amo ang mga pakinhason, tahong, talaba, scallop, pugita kag lukos.

[Retrato sa pahina 25]

Ginpadakuan nga laragway sang nasulod nga anib sang shell sang mollusk

[Credit Line]

Inset: © Eye of Science/Photo Researchers, Inc.