Ang mga Pamatan-on nga Katoliko Ginsugo nga Magpanaksi

SUNO SA MANUNULAT SANG MAGMATA! SA AUSTRALIA

SANG nagligad nga Hulyo, ang mga Romano Katoliko halin sa lainlain nga lugar sa kalibutan nagtipon sa Sydney, Australia, para selebrahon ang World Youth Day 2008. Isa ini ka relihioso nga selebrasyon nga ginadumalahan sang Katoliko nga Simbahan.

Ang mga bisita, ukon mga deboto, nga naghalin sa 170 ka pungsod nagtipon sa dalan nga nagawagayway sang ila mga bandera samtang nagahinugyaw, nagakinanta, kag nagaselebrar sa bilog nga siudad. Linibo ka tumalan-aw ang naghulat sa pantalan sang Sydney para sa pag-abot ni Pope Benedict XVI sakay sa lantsa upod ang 12 pa ka matahom sing kolor nga sakayan. Mga 500 milyones ka tawo sa bug-os nga kalibutan ang nakatan-aw sini sa TV.

Ang katapusan nga Misa ginhiwat sa isa ka racecourse. Mga 400,000 ang nagtambong lakip na ang 4,000 ka opisyales sang simbahan kag 2,000 ka katapo sang media. Amo ini ang pinakadaku nga pagtilipon nga nasaksihan sa Australia, kay ang mga nagtambong mas madamo pa sangsa nagtambong sa 2000 Sydney Olympic Games.

Ano ang World Youth Day? Ngaa ginaselebrar ini? Ano ang mga ginahimo sa sini nga selebrasyon? Kag ano ang ginapakita sini parte sa pagtuo sang mga pamatan-on sa Sydney?

“Nagaluya ang Pagtuo”

Ang World Youth Day ginaselebrar kada tuig para pabakuron ang pagtuo sang mga pamatan-on nga Katoliko. Ginaselebrar man ini pirme sang mga Katoliko sa ila lang lokal nga diosesis. Pero kada duha ukon tatlo ka tuig, ginaselebrar ini sa isa ka daku nga siudad kag ginaimbitar ang mga pamatan-on nga Katoliko sa bilog nga kalibutan nga magtambong. Pulo ka siudad sa lima ka kontinente ang nag-organisar na sini nga pagtinipon, kag minilyon ang nagtambong.

Ang World Youth Day ginaselebrar man para punggan ang pagdiutay sang mga sumilimba sa Katoliko  nga Simbahan kag ginabaton ini sang mga opisyales sang simbahan. “Nagaproblema gid kami bangod amat-amat nga nagakadula ang Katolisismo kag nagaluya ang pagtuo sang mga tawo,” siling ni George Cardinal Pell, lider sang Katoliko nga klero sa Australia. “Gani, ang World Youth Day ginaselebrar para masolusyunan ini nga problema.”

Ang kadamuon sang mga pari sa bug-os nga kalibutan nagnubo suno sa report sang Vatican. Sang nagligad nga mga dekada ginabulubanta nga indi magkubos sa 150,000 ang nag-untat sa pagkapari para mangasawa. Ang kadamuon sang nagaeskwela sa seminaryo sa Australia nagnubo man sing sobra 70 porsiento sa sulod sang 30 ka tuig. Sang 1977, mga kuarentahon ang edad sang kalabanan nga pari sa pinakadaku nga diosesis sa Australia, pero subong mga sisentahon na ang kalabanan nga pari didto.

Sa madamo nga pungsod, diutay na lang ang nagasimba. Mga 25 porsiento sang mga Australiano ang nagapangangkon nga Katoliko pero mga 14 porsiento lang sa ila ang regular nga nagasimba. Wala kalab-ot sa 10 porsiento sang mga pamatan-on nga Katoliko ang nagasimba. Sa karon, madamo nga Katoliko ang wala nagatuman sa mga ginatudlo sang simbahan parte sa seksuwal nga moralidad, mga kontraseptibo, kag diborsio. Ang iban nadulaan na sing pagsalig sa simbahan bangod sa mga iskandalo nga nagakatabo pareho sang mga pari nga nagaabuso sa mga kabataan.

Ang World Youth Day “amo na gid lang ang paglaum para masolusyonan ini nga problema,” siling sang The Sydney Morning Herald. “Ang mga nagadumala sang simbahan sa Australia kag Roma nagapaabot gid nga mapasag-uli kag mapabakod liwat ang pagtuo paagi sa mga pamatan-on.” Paano kumbinsihon sang mga lider sang simbahan ini nga mga pamatan-on?

Mga Palaguaon kag mga Party

Sa World Youth Day 2008, may mga palaguaon sa simbahan, workshop, religious pilgrimage, kag dalagku  nga mga Misa. Bisan pa nagpabakod ini sa pagtuo sang madamo nga pamatan-on, naobserbahan sang pila sa ila ang lain nga paggawi sang mga tawo sa sini nga kahiwatan. Ang isa ka pamatan-on nga Katoliko nga si Alexandra nga naghalin sa Estados Unidos nagsiling nga ang World Youth Day, “daw isa lang ka daku nga party.”

Ining anom ka adlaw nga pagtilipon sa Sydney may 450 tanan ka palaguaon, subong sang mga konsierto, mga pelikula, mga eksibit, kag mga kinanta kag sinaot sa kalye. Lainlain nga mga musika ang ginapatokar. May musika nga ginapatokar sa simbahan, may opera music, heavy metal, kag rap. Ang mga rock concert gindugok sang linibo ka magalong nga mga pamatan-on.

Daw indi komporme ang pila ka Katoliko sa sini nga mga palaguaon. Ang okasyon “nangin isa na lang ka party—isa ka semana nga pagsinadya kag mga konsierto sang kalibutan, kag halos wala na sing pagkabalaan kag pagkasagrado diri,” siling sang pari nga si Peter Scott sa ABC News sang Australia. Ang matuod, sang tuig 2000, si Cardinal Ratzinger nga Pope Benedict XVI na subong, nagsulat: “‘Ang Rock’ [nga musika] isa ka paagi sang mabaskog nga pagpabutyag sang balatyagon, kag ini nga mga musika sa magahod nga mga kapiestahan nagapakita sang . . . isa ka porma sang pagsimba nga kabaliskaran gid sa pagsimba sang mga Cristiano.”—The Spirit of the Liturgy.

Gani mahimo mamangkot ang isa, “Makapabag-o gid bala sing kabuhi ang World Youth Day?” “Mahimo makapabag-o ini para sa pila ka tawo,” siling sang isa anay ka pari nga si Paul Collins. “Pero ang kalabanan mabalik man gihapon sa ila naandan na nga pagkabuhi,” siling niya. “Mahimo lang ang daku nga pagbag-o indi paagi sa masadya nga mga kahiwatan, kundi paagi sa pagpamalandong, maayo nga pagplano, kag pagbaton nga kinahanglan atubangon ang mabug-at nga mga problema.”

“Kamo Mangin mga Saksi Ko”

Nahibaluan gid sang mga lider sang simbahan nga matuod ini nga pinamulong. Amo nga ang World Youth Day 2008 may tema: “Magabaton kamo sang gahum sa pag-abot sang Espiritu Santo sa inyo, kag kamo mangin mga saksi ko.” *

 Ginsugo sang mga obispo ang mga pamatan-on nga “ipanaksi sing mapisan sa mga tawo ang mga panudlo ni Cristo, pareho man sa ginhimo sang mga apostoles sadto.” Ginpalig-on pa gid sila ni Pope Benedict XVI nga mangin “isa ka bag-o nga henerasyon sang mga apostoles.” Kag sa iban pa nga okasyon, ginsilingan niya sila nga ipalapnag “ang Maayong Balita sa ila mga abyan, mga pamilya, kag sa tanan nila nga makilala.”

Ini nga mga pangabay nagpahulag sa pila ka sinsero nga mga pamatan-on. Ang 20 anyos nga si Ramido halin sa Estados Unidos nagsiling sa isa ka reporter: “Ginakabig ko gid nga serioso ang pagpanaksi.” Pero ang 18 anyos nga si Beatrice halin sa Italya, nagsiling: “Ang mga pamatan-on subong wala na nagaistorya parte sa Dios. Kag para sa ila mabudlay gid magpanaksi.” Madamo sini nga mga pamatan-on ang nagaugyon sa ginsiling sang duha ka tin-edyer nga babayi halin sa Texas, U.S.A., “Ang mga Saksi ni Jehova lang ang nagapanaksi sa amon lugar!”

Mga Pamatan-on nga Nagapanaksi

Matuod nga kilala gid ang mga Saksi ni Jehova, bata man ukon tigulang, sa ila mapisan nga pagpanaksi. Ngaa ginahimo nila ini? Bangod ini sa ila “gugma sa Dios, gugma sa mga tawo, kag gugma sa Biblia,” siling ni Sotir, nga isa ka 22 anyos nga Saksi sa Sydney.

Sang World Youth Day 2008, mga 400 ka pamatan-on nga Saksi sa Sydney ang wala nagtambong sa sini nga selebrasyon. Sa baylo, nag-upod sila sa pinasahi nga kampanya sang pagsugid sang kamatuoran sang Biblia sa mga nagbisita nga Katoliko nga mga pamatan-on. “Nalipay gid ako nga maistorya ining diosnon nga Katoliko nga mga pamatan-on,” siling sang 25 anyos nga si Travas. “Madamo sa ila ang may mga pamangkot parte sa Biblia, kag nalipay gid ako nga ipakita sa ila ang mga sabat.”

“Relaks ako kag mainabyanon nga nag-istorya sa ila,” siling sang 23 anyos nga si Tarsha. “Gusto ko gid sila nga i-welcome diri sa Sydney kag pamatian man kon ano ang ila ginapatihan.” “Kon ginatugot sang kahimtangan, ginaregaluhan ko ang mga bisita sing libro nga Ano Gid ang Ginatudlo Sang Biblia?” * siling sang 20 anyos nga si Frazer. “Nalipay gid ang tanan ko nga ginhatagan sini.”

Nalipay gid ang madamo nga bisita nga maistorya ang Saksi nga mga pamatan-on. Ginpamangkot ni Suzanne, nga taga-Fiji, ang 19 anyos nga Saksi nga si Belinda kon ngaa ginatugutan sang Dios ang pag-antos. Nagsiling si Belinda nga gamiton nila ang Ginatudlo Sang Biblia nga libro para masabat ini nga pamangkot. Sang matapos ang ila paghambalanay, si Suzanne nagsiling: “Pirme lang ako ginasilingan nga indi naton mahangpan ang ginahimo sang Dios. Pero subong, nahibal-an ko na ang sabat!” Sang ginhatagan sia ni Belinda sang libro, si Suzanne nagsiling: “Ginatinguhaan ko nga sauluhon ang imo ginsiling, kay abi ko indi mo pag-ihatag sa akon ang libro!”

Ginpangabay sang isa ka Filipina nga bisita ang 27 anyos nga Saksi nga si Marina nga kuhaan sia sing piktyur sa atubang sang isa ka landmark sa Sydney. Dayon, nag-istoryahanay sila kag ginhatagan ni Marina ang babayi sing Ginatudlo Sang Biblia nga libro. “Nangamuyo ako sang nagligad nga gab-i nga maintiendihan ko sing maayo ang Biblia,” siling sang babayi. “Siguro ini nga libro amo gid ang sabat sa akon pangamuyo!”

Naistorya sang 27 anyos nga si Levi ang isa ka mag-iloy nga taga-Panama. Ang ila pag-istoryahanay naglab-ot parte sa pagsimba sa Dios, kag dayon ginhambalan nila kon ano ang ginatudlo sang Biblia. Ginbaton sang mag-iloy ang Ginatudlo Sang Biblia nga libro. Sang ulihi, namangkot si Levi, “Ano gid ang indi ninyo malipatan sa inyo pagkadto diri?” “Ang pagkitaay naton,” sabat sang bata samtang hugot niya nga ginauyatan ang Ginatudlo Sang Biblia nga libro.

Matuod, madamo sang Katoliko nga mga pamatan-on ang gusto pa nga makahibalo parte sa Biblia. Kamusta ikaw? Gusto mo bala nga maintiendihan pa gid ang Biblia? Maayo gid nga pangabayon mo ang mga Saksi ni Jehova para tudluan ka nila sa Biblia sa inyo puluy-an sing wala bayad. Nalipay gid sila nga magbulig sa imo!

[Mga nota]

^ par. 19 Ginkuha ini sa Binuhatan 1:8 sa Biblia sang Katilingban sang mga Kristiano.

^ par. 25 Ginabalhag sang mga Saksi ni Jehova.

[Blurb sa pahina 27]

“Nagaproblema gid kami bangod amat-amat nga nagakadula ang Katolisismo kag nagaluya ang pagtuo sang mga tawo.”

—George Cardinal Pell sang Romano Katoliko

[Kahon/Mga retrato sa pahina 25]

MGA BOKASYON NGA GINATANYAG SA SIMBAHAN

Ginhiwat sa World Youth Day 2008 ang pinakadaku nga seminar sa Australia para sa mga bokasyon nga ginatanyag sa simbahan. Ginpalig-on sang sobra 100 ka Catholic order kag mga ahensia ang sobra 50,000 ka debotado nga pamatan-on nga magkuha sing bokasyon sa Katoliko nga Simbahan subong pari, madre, ukon iban pa nga mga trabaho sa simbahan.

[Retrato sa pahina 24, 25]

Mga pamatan-on nga nagasuksok sing de-kolores nga mga bayo kag nagaparada sa mga dalan

[Mga retrato sa pahina 26]

Gin-istorya sang mga Saksi ni Jehova ang mga pamatan-on nga nagbisita sa Sydney

[Credit Line sang retrato sa pahina 24]

Getty Images