Magdiretso sa kaundan

Magdiretso sa listahan sang kaundan

Matuod nga Solusyon sa Pag-abuso sa Droga

Matuod nga Solusyon sa Pag-abuso sa Droga

 Matuod nga Solusyon sa Pag-abuso sa Droga

SANG si Lena, nga ginsambit sa umpisa, 32 anyos na, ‘nagbatyag sia nga nakasala, wala na sing paglaum, kag ginapamensar niya pirme ang kamatayon.’ Ini tanan bangod sa iya pag-abuso sa droga. “Subong asawa kag iloy, gusto ko nga mangin maayo,” sulat niya, “pero nasubuan gid ako kag natublag sa tanan nga butang nga nagakatabo sa akon kag sa kalibutan, amo nga daw wala na sing pulos nga mangin maayo pa nga tawo. Pila ka beses ko gintinguhaan nga mangin maayo, pero napaslawan lang ako.”

Apang, si Lena nagtuon sing Biblia upod sa mga Saksi ni Jehova. Wala madugay, ang kamatuoran sang Biblia naghatag sa iya sing kalinong kag kaumpawan, nga suno sa iya amo “ang pinakamaayo nga nabatyagan ko sa bug-os ko nga kabuhi.” Bangod nahangpan niya ang mga prinsipio sa Biblia kag ang matahom nga paglaum sa palaabuton, napahulag sia nga tinluan ang iya kabuhi kag untatan ang pagkaadik.

 Mga Prinsipio Para sa Kabuhi

Ang mga kasuguan kag mga prinsipio nga mabasa sa Biblia gindesinyo para sa aton ni Jehova nga Dios, ang aton Manunuga. Ang Salmo 19:7, 8 (APD) nagsiling: “Ang kasuguan sang GINOO wala sing sayop. Nagapabaskog ini sang aton kabuhi. . . . Ang mga pagsulundan sang GINOO husto kag nagahatag sang kalipay. Ang mga sugo sang GINOO wala sing sayop kag nagapasanag sa hunahuna sang tawo.”

Halimbawa, ang 2 Corinto 7:1 naglaygay sa aton nga “tinluan naton ang aton kaugalingon gikan sa tanan nga dagta sang unod kag espiritu.” Ini nga laygay sa Biblia ginsunod ni Lena, kag nakabulig sa iya nga untaton ang iya malain nga bisyo. Amo man sini ang natabo kay Myra, nga ginsambit sa una nga artikulo sa sini nga serye. Dumduma nga naadik sia sa bulong nga ginreseta sa iya para sa sakit sang ulo. Paano ni Myra gin-atubang ang iya problema? Ginsugid niya ini sing prangka sa iya doktor kag ginbuligan sia sini nga tilawan ang lain nga paagi sa pagbulong. * Luwas sa sini, ginbaton man niya ang espirituwal nga bulig nga ginhatag sang Cristianong kongregasyon.

Si Lena kag si Myra nabuligan man sang pangamuyo. Ang Filipos 4:6, 7 nagasiling: “Indi kamo magkabalaka sa bisan ano nga butang, kundi sa tanan nga butang paagi sa pangamuyo kag pag-ampo nga may pagpasalamat ipahibalo sa Dios ang inyo mga pangabay; kag ang paghidait sang Dios nga nagalabaw sa tanan nga panghunahuna magabantay sang inyo tagipusuon kag sang inyo ikasarang sa paghunahuna.” Ang isa ka alagad sang Dios sang una nga nakabatyag sina nga kalinong nagsiling nga sang “nagakabalaka” sia, ang makapalig-on nga pulong sang Dios nagpakalma sa iya kag naghatag sing kaumpawan, kag tudok nga kalipay. (Salmo 94:19, APD) Ining makapaumpaw nga mga pulong makita sa mga pahina sang Biblia kag sa pagpalig-on kag suporta sang maayo nga Cristianong mga kaupod, lakip ang Cristianong mga gulang.

Apang kon kaisa, bangod sa problema sa droga, ang isa ka tawo mahimo magbatyag nga wala na sia sing pulos. Si Janice, isa ka Cristiano nga naadik sa ginareseta nga bulong sa sulod sang madamo nga tinuig, nagsulat: “Ang mga adik mahimo nga wala na sing maayo nga kaangtanan kay Jehova kag akig gid sa ila kaugalingon, amo nga para sa ila mabudlay katama, ukon imposible pa gani nga mangayo sing bulig kay Jehova.” Sa sini  nga mga kahimtangan, importante gid nga mangayo sila sing bulig sa hamtong nga mga Cristiano. Ang ila mahigugmaon, mainayuhon nga pagpalig-on kag mga pangamuyo “magaayo sa isa nga nagamasakit.” (Santiago 5:15) Kon isa ka bata ang adik, ang iya mga ginikanan dapat mangin interesado gid sa iya pag-ayo sa espirituwal kag sa pisikal agod indi sia magbalik sa iya bisyo.

Si Janice gindala sa isa ka rehabilitation center, nag-ayo sa iya bisyo, kag sugod sadto, wala na sia nagdroga. “Nagsalig ako kay Jehova sa sadtong mabudlay nga mga tion sa akon kabuhi,” sulat niya. “Sa karon, nagabatyag ako sing kalinong, kag amat-amat na nga nagabalik ang akon masinadyahon kag mapinalanggaon nga personalidad.”

Kon Madula na ang Aton mga Problema

Magaabot ang tion nga madula na ang tanan nga sahi sang droga. Paano? Ang Bugna 21:3, 4 nagasabat: “Ang tolda sang Dios yara sa mga tawo . . . Kag pahiran niya ang tagsa ka luha sa ila mga mata, kag wala na sing kamatayon, ukon paglalaw ukon paghibi ukon kasakit pa. Ang mga butang sang una [lakip ang mga problema karon] nagtaliwan na.”

Ginpaanggid sang Biblia ang paglaum sang mga Cristiano “subong angkla para sa kalag, pat-od kag malig-on.” (Hebreo 6:18, 19) Sa dumaan nga tion, kon may bagyo sa dagat, ginahulog sang mga marinero ang angkla sang barko. Kon mag-ungot na ang angkla sa salog sang dagat, indi madala sang mabaskog nga hangin ang barko sa kabatuhan ukon sa manabaw nga baybayon. Sing kaanggid, ang “pat-od kag malig-on” nga paglaum nga ginasiling sang Biblia makabulig sa aton nga mahuptan nga balanse ang aton emosyon, panghunahuna, kag espirituwalidad sa tion nga mag-abot ang kaangay bagyo nga mga pagtilaw—nga pat-od gid nga magaabot!

Maayo gid nga usisaon mo ang Biblia kag hibaluon kon daw ano ka importante kag makapalig-on ang mga laygay kag ang mga ginatudlo sini. Nalipay ang mga Saksi ni Jehova nga buligan ka, kag makahatag gid ini sa imo sing daku nga kaayuhan.

[Nota]

^ par. 6 Indi tanan nga kahimtangan pareho kay Myra. Halimbawa, ang pila ka tawo nga nagaantos sing masakit nga balatian naumpawan lamang paagi sa maisog kag makapaadik nga mga bulong nga ginapadapat sang doktor. Ina nga pasyente wala nagagamit sing bulong para ma-high, ukon bangod isa sia ka adik.—Tan-awa ang Hulubaton 31:6.

[Blurb sa pahina 9]

“Indi kamo magkabalaka sa bisan ano nga butang, kundi sa tanan nga butang paagi sa pangamuyo kag pag-ampo . . . ipahibalo sa Dios ang inyo mga pangabay; kag ang paghidait sang Dios . . . magabantay sang inyo tagipusuon kag sang inyo ikasarang sa paghunahuna.”—Filipos 4:6, 7

[Kahon/Retrato sa pahina 10]

PRAKTIKAL NGA MGA PANUGDA PARA SA IKAAYONG-LAWAS

Ang pag-ehersisyo “temporaryo nga makapaayo sang imo pamatyag kag makapahaganhagan sa imo depresyon,” siling sang libro nga Managing Your Mind—The Mental Fitness Guide. Makabulig man kon bag-uhon mo ang imo mga ginakaon kag mga ginahimo, kag pati ang ginapasulod mo sa imo hunahuna. Binagbinaga ang halimbawa ni Valerie, nga gin-abusuhan anay sa pisikal kag berbal sang bata pa sia. Nangin adik sia sa indi magnubo sa 12 ka lainlain nga ginareseta nga bulong. Wala sapayan sini, nauntat niya ining bisyo kag nagkabuhi na sing normal. Ano ang iya sekreto?

Sa baylo nga maglantaw sia sing TV kag magbasa sang iban pa nga indi maayo nga mga balasahon, regular nga nagtuon si Valerie sa Biblia kag naghatag sing tion sa pagbasa sang mga publikasyon nga base sa Biblia nga ginabalhag sang mga Saksi ni Jehova, lakip ining magasin. Isa pa, pirme sia nagapangamuyo nga hatagan sia sang Dios sing kusog. Ginbaton man niya ang bulig sang Cristianong kongregasyon, kag nangin masako sia sa pagsugid sa iban sang makapaumpaw nga mensahe sang Biblia. Magluwas sini, daku man ang ginhimo niya nga pagbag-o sa iya mga ginakaon, kay sang una, pirme sia nagakaon sing mga junk food. Bangod sini, nag-ayo sia kag nagdayaw pa gani sa iya ang iya mga doktor. Wala na sia karon nagaabuso sa droga sa sulod na sang madamo nga tuig. *

[Nota]

^ par. 21 Kon nagatomar ka sang ginareseta nga bulong para sa clinical depression, bipolar disorder, ukon iban pa nga sakit kaangay sini, mahimo nga ang imo kahimtangan indi pareho kay Valerie. Gani, indi ka maghimo sang bisan ano nga mga pagbag-o nga wala ginakonsulta ang imo doktor.