Ang Pagtamod sang Biblia

Katutom sa Pag-asawahay​—Ano Gid Bala ang Buot Silingon Sini?

Ginapaabot gid sang kalabanan nga tawo nga ang pagpakigsekso para lamang sa mag-asawa. Ining katutom sa pag-asawahay nahisanto gid sa ginasiling sang Biblia: “Ang pag-asawahay mangin dungganon sa tanan, kag ang hiligdaan sang pag-asawahay mangin wala sing dagta.”​—Hebreo 13:4.

ANG katutom bala sa pag-asawahay nagapahangop lamang sa indi pagpakigsekso sa iban? Kamusta naman kon ginapantasyahan mo ang isa nga indi mo asawa ukon bana? Ang pagpakigsuod bala sa tuhay nga sekso isa na ka “pagluib sa imo tiayon”?

Makahalalit Bala ang Pagpantasya sa Sekso?

Ginapakita sang Biblia nga ang pagpakigsekso natural lang nga bahin sang pag-asawahay, kag nagahatag ini sing kalipay kag kaayawan sa ila nga duha. (Hulubaton 5:18, 19) Apang madamo nga eksperto sa karon ang nagapati nga normal lamang, ukon maayo pa gani, ang paghanduraw ukon pagpantasya sang pagpakigsekso sa iban. Indi bala ini makahalalit kon wala mo ini ginahimo sing aktual?

Ang pagpantasya sa sekso nagapahalipay lamang sa isa nga nagahanduraw sini. Ang pagpahalipay lamang sa imo kaugalingon wala nahisanto sa ginalaygay sang Biblia para sa mag-asawa. Parte sa pagpakigsekso, ang Pulong sang Dios nagsiling: “Ang asawa wala sing awtoridad sa iya kaugalingon nga lawas, kundi ang iya bana; subong man, ang bana wala sing awtoridad sa iya kaugalingon nga lawas, kundi ang iya asawa.” (1 Corinto 7:4) Ang pagsunod sa laygay sang Biblia magabulig nga malikawan ang pagpantasya sa sekso agod lamang nga mapahalipay ang kaugalingon. Subong resulta, mangin mas malipayon ang mag-asawa.​—Binuhatan 20:35; Filipos 2:4.

Kon ang isa nagahanduraw sa pagpakigsekso sa indi niya tiayon, daw nagahanda sia sa paghimo sini nga magaresulta sing kasakit sa iya asawa ukon bana. Ang pagpantasya bala sa sekso nagapadaku sing posibilidad nga makapanghilahi ka? Huo. Ang Biblia nagsiling parte sa kaangtanan sang hunahuna kag buhat: “Ang kada isa ginatilawan kon ginaganyat sia kag ginahaylo sang iya kaugalingon nga kailigbon. Nian ang kailigbon, kon nakapanamkon na, nagabun-ag sang sala.”​—Santiago 1:14, 15.

Si Jesus nagsiling: “Ang tagsatagsa nga padayon nga nagatulok sa isa ka babayi nga may kaibog sa iya nakapanghilahi na sa iya sa tagipusuon niya.” (Mateo 5:28) Kon likawan mo ini, ‘mabantayan mo ang imo tagiposoon’ kag maproteksionan mo ang inyo pag-asawahay.​—Hulubaton 4:23.

Ngaa Palanggaon Mo Gid ang Imo Asawa?

Ang madinalag-on nga pag-asawahay nagakinahanglan sing “pagkamainunungon” sa imo asawa ukon bana. (Ambahanon ni Solomon 8:6, NW; Hulubaton 5:15-18) Ano ang buot silingon sini? Bisan pa normal lamang nga makig-amigo  ka ukon makig-amiga, dapat mo hatagan sing mas daku nga tion, atension, kag pagpalangga ang imo tiayon. Kon ihatag mo sa iban ang isa ka butang nga para gid lang sa imo tiayon, isa na ini ka “pagluib,” bisan pa wala sing may natabo sa inyo. *

Ngaa nagakatabo ini? Mahimo nga mas guapa ukon guapo kag mas mahinangpanon sia sangsa imo asawa ukon bana. Ang pagpakig-upod sa iya sa trabaho ukon sa mga pagtilipon mahimo magresulta sa pag-istoryahanay ninyo parte sa personal nga mga butang, lakip na ang mga problema kag kapaslawan ninyo nga mag-asawa. Mahimo nga sa iya ka na magpabulig kon may problema ka. Mahimo nga maistorya mo sa iya sing personal, paagi sa telepono, ukon paagi sa Internet ang problema ninyo nga mag-asawa. Ginapaabot gid sang mag-asawa nga ang pila ka topiko dapat lamang nila istoryahan kag ang ila “tinago” indi pag-isugid sa iban.​—Hulubaton 25:9.

Indi magpangatarungan nga wala ka sing luyag sa iya! Dumduma nga “ang tagiposoon malimbongon” siling sang Jeremias 17:9. Kon may suod ka nga abyan nga tuhay sing sekso, pamangkuta ang imo kaugalingon: ‘Ginapanghiwala ko bala kag ginatago ang amon relasyon? Wala bala sing problema kon mabatian sang akon asawa ukon bana ang amon ginaistoryahan? Ano ayhan ang batyagon ko kon amo man sini ang himuon sang akon tiayon?’​—Mateo 7:12.

Ang indi nagakaigo nga relasyon sa iban mahimo magguba sang pag-asawahay, bangod ang sobra nga pagpakigsuod sa iban mahimo magresulta sa pagpakigsekso. Subong sang ginpaandam ni Jesus, “gikan sa tagipusuon nagagikan ang . . . panghilahi.” (Mateo 15:19) Pero, bisan pa wala ini nagaresulta sa pagpanghilahi, ang naguba nga pagsalig mabudlay ibalik. Ang isa ka asawa nga si Karen * nagsiling: “Sang nahibaluan ko nga kada adlaw pirme ginatawgan sing sekreto ni Mark ang isa ka babayi, daw ginkumos ang akon dughan. Daw indi ako magpati nga wala sing may natabo sa ila. Ambot lang kon masaligan ko pa sia liwat.”

Hatagi sing limitasyon ang imo pagpakig-abyan sa tuhay nga sekso. Indi pagpasundi ang imo indi nagakaigo nga balatyagon kag indi pagpakamatarunga ang malain nga mga motibo. Kon sa banta mo makahalit ini sa inyo pag-asawahay, butangi ini gilayon sing limitasyon ukon tapusa ini dayon. Ang Biblia nagsiling: “Ang mahalongon nga tawo nakakita sang malaut kag nagapanago sia.”​—Hulubaton 22:3.

Amligi ang Inyo Pag-asawahay

Katuyuan sang aton Manunuga nga ang pag-asawahay amo dapat ang pinakasuod nga relasyon sa tunga sang duha ka tawo. Nagsiling ini nga ang asawa kag bana ‘mangin-isa ka unud.’ (Genesis 2:24) Ang mangin isa ka unod wala lamang nagalakip sing seksuwal nga relasyon. Nagalakip man ini sing pagpalanggaanay, nga mapabakod sang pag-ulikid, pagsalig, kag pagrespeto sa isa kag isa. (Hulubaton 31:11; Malaquias 2:14, 15; Efeso 5:28, 33) Ang pagsunod sa sining mga prinsipio magaamlig sa inyo pag-asawahay batok sa pagluib.

[Mga nota]

^ par. 11 Dumdumon naton nga suno sa Biblia, ang pagpakigsekso sa indi mo tiayon amo lang ang basihan sang pagbulagay nga puede makapangasawa sa iban.​—Mateo 19:9.

^ par. 14 Gin-islan ang mga ngalan.

NAMANGKOT KA BALA?

▪ Ang paghanduraw bala sa sekso makadul-ong sa aktual nga paghimo sini?​—Santiago 1:14, 15.

▪ Ang pagpakigsuod bala sa tuhay nga sekso mahimo makahalit sa inyo pag-asawahay?​—Jeremias 17:9; Mateo 15:19.

▪ Paano mo mapalig-on ang inyo pag-asawahay?​—1 Corinto 7:4; 13:8; Efeso 5:28, 33.

[Blurb sa pahina 29]

“Ang tagsatagsa nga padayon nga nagatulok sa isa ka babayi nga may kaibog sa iya nakapanghilahi na sa iya sa tagipusuon niya.”​—Mateo 5:28