Diin Mo Makita ang mga Sabat?

ANG isa ka papel sang relihion amo ang pagtudlo sang katuyuan sang kabuhi. Apang, madamo nga tawo ang nalugaw-an bangod wala sila mabuligan sang ila relihion nga makatigayon sing kaangtanan sa Dios. Si Denise nga nagdaku sa Katoliko nga pamilya, nagsiling: “Nalakip sa panudlo sang Baltimore Catechism ang pamangkot nga, ‘Ngaa gintuga kita sang Dios?’ kag ang sabat nga, ‘Gintuga kita sang Dios agod ipakita ang Iya kaayo kag agod makaupod Niya kita sa walay katapusan nga kalipay sa langit.’”

“Wala sini ginapaathag kon ngaa nagakabuhi ako diri sa duta,” padayon ni Denise. “Kon nagahulat man lang gali ako nga mapalangit, nagaano pa ako diri?” Kaangay ni Denise, madamo man ang nagapamangkot sini. Suno sa isa ka surbe, dos-tersia sang mga gin-interbyu ang nagsiling nga ang kalabanan nga mga relihion wala nakabulig agod makita sang mga tawo ang katuyuan sang kabuhi.

Subong resulta, bisan diin na lang nagapangita sing sabat ang mga tawo. Ang iban nagdangop sa siensia ukon sa nanuhaytuhay nga pilosopiya subong sang panudlo nga ginbase sa pamatasan, kinaiya, kag paggawi nga amo gid kuno ang labing maayo sa tawo. Ukon sa panudlo nga ang kabuhi kag maayo nga pamatasan wala sing pulos kag sa pilosopiya nga ang uniberso wala sing katuyuan, bangod nagadepende sa tawo ang iya madangatan. Bisan pa diutay lang ang daw nakakita sing sabat, ngaa ginapangita gihapon ini sang mga tawo?

Duna nga Masimbahon

Suno kay Dr. Kevin S. Seybold, “may huyog nga magsimba ang tanan nga tawo.” Sang nagliligad  nga tinuig, ang mga sientipiko naghinakop nga kinaugali sang mga tawo nga pangitaon kon ano gid ang kahulugan sang kabuhi. Ang iban nagapati nga yara sa pagkahuman naton subong tawo ang handum nga makatigayon sing kaangtanan sa isa nga mas gamhanan sangsa aton.

Ginadebatihan sang mga edukado kon bala kinahanglan gid man sang tawo nga may simbahon. Apang, para sa madamo nga tawo, indi na kinahanglan nga pamatud-an pa ini sang siensia. Kay man, ang aton handum nga makatigayon sing kaangtanan sa Dios amo ang rason kon ngaa nagapamangkot kita sing: Ngaa yari kita diri? Ano ang katuyuan sang aton kabuhi? May salabton bala kita sa labing gamhanan nga Manunuga?

Kon talupangdon mo ang mga butang nga wala ginhimo sang tawo, makita mo ang pila ka sabat sa sini nga mga pamangkot. Halimbawa, binagbinaga ang masibod nga mga butang nga yara sa palibot, halin sa pinakagamay nga organismo tubtob sa grupo sang mga galaksiya nga tuman ka makahalawhaw ang kalayuon. Indi bala nga pamatuod ini nga may isa ka intelihente nga Desinyador, ukon Manunuga? Ang Biblia nagasiling: ‘Kay ang di-makita nga mga kinaiya sang Dios, bisan ang iya dayon nga gahom kag pagka-Dios, maathag nga makita kutob sang pagtuga sa kalibutan, bangod mahantop ini sa mga butang nga gintuga, gani wala sila sing ibalibad.’​—Roma 1:20.

Ang Makahatag sing Sabat

Tuhoy sa pagtuga sang Dios sa tawo, ang Biblia nagasiling: “Ginbutang man niya ang wala sing katubtuban sa ila tagiposoon.” (Manugwali 3:11) Luyag gid naton mabuhi kag indi mapatay. Amo nga luyag gid naton nga masabat ang aton mga pamangkot tuhoy sa katuyuan sang kabuhi.

Natural lang sa tawo nga mangita sing sabat. Sa tapos mabinagbinag ang nahimuan sang tawo sa siensia kag teknolohiya, ang editor sang The Wall Street Journal nagsulat: “Nagapamangkot kita gihapon kon sin-o kita, kon ngaa yari kita diri, kag kon ano ang aton palaabuton.” Maalamon nga magkuha kita sing sabat sa matuod gid nga makahatag sini. Ginapakilala sang Biblia ang makahatag sini, nga nagasiling: “[Ang Dios] ang naghimo sa aton, kag iya kita.”​—Salmo 100:3.

Indi bala nagakaigo lang nga pangitaon naton ang sabat gikan sa Isa nga nagtuga sang tanan nga butang? Ginpanugda ni Jesucristo nga amo gid ini ang himuon naton. Nahibaluan niya nga ang ginhalinan sang aton kabuhi, ang Manunuga, amo lamang ang makahatag sing sabat.​—Salmo 36:5, 9; Mateo 5:3, 6.

Ang masaligan nga sabat sa pamangkot nga, Ngaa yari kita diri? kinahanglanon agod makatigayon kita sing suod nga kaangtanan sa Dios. Palihug binagbinaga ang makapaumpaw nga pagtamod sang aton Manunuga tuhoy sa sini.