Ang Pagtamod sang Biblia

Ano ang Pagtamod sang Dios sa mga Bulig sa Pagsimba?

Ang galamiton sa pangamuyo kinaandan na lang sa Budhismo, Hinduismo, Islam, Judaismo, Romano Katoliko, kag Eastern Orthodox. Gani, minilyon ka tawo sa halos tanan nga pungsod ang nagapati nga ini nga mga butang makabulig sa ila pagpalapit sa Dios, pagtigayon sang iya kahamuot, ukon mga pagpakamaayo. Apang, ano ang ginatudlo sang Biblia tuhoy sa sini?

LINIBO na ka tuig nga ginagamit sang mga tawo ang mga bulig sa pagpangamuyo. Halimbawa, nakutkutan sang mga arkeologo sa nahamtangan sang dumaan nga Ninive, ang ‘duha ka babayi nga may mga pakpak nga nagapangamuyo sa atubangan sang sagrado nga kahoy; nagauyat sing rosarito ang ila wala nga kamot.’​—The Catholic Encyclopedia.

Ano ang katuyuan sang mga rosarito? Ginasabat ini sang amo man nga ensiklopedia: “Kon kinahanglan nga sulitsuliton ang pangamuyo sa madamo nga beses, mangin mas mahapos ini isipon kag tandaan kon nagagamit sing pila ka galamiton sangsa isipon ini sa tudlo.”

Mangin mas mahapos pa gid ang pagsulitsulit sang mga pangamuyo paagi sa prayer wheel. Kada tiyog sini, paagi man sa kamot, hangin, tubig, ukon koryente, katumbas sang isa ka pangamuyo. Ginagamit ini may kaangtanan sa mantra ukon mga palangadion. Binagbinaga kon ano ang pagtamod sang Dios sa sini?

“Indi Pagsulitsulita ang Amo Gihapon nga mga Butang”

Si Jesucristo, nga ginakilala bisan sang minilyon nga indi Cristiano subong propeta sang Dios, nagpaathag sang pagtamod sang Manunuga tuhoy sa sulitsulit nga pangamuyo nga nagasiling: “Kon ikaw nagapangamuyo, indi pagsulitsulita ang amo gihapon nga mga butang, subong sang ginahimo sang mga tawo sang mga pungsod, kay abi nila pamatian sila tungod sang ila madamo nga ginahambal.” *​—Mateo 6:7.

Gani, kon wala ginakahamut-an sang Dios ang pagpangamuyo sang “amo gihapon nga mga butang,” indi bala nga ang mga galamiton nga ginagamit subong bulig sa sulitsulit nga pangamuyo  indi man kalahamut-an sa iya? Amo nga wala kita sing mabasa sa Biblia nga may matutom nga alagad sang matuod nga Dios ang nagagamit sing mga rosarito, prayer wheel, ukon iban pa nga galamiton nga kaangay sini sa ila pagsimba. Mangin maathag pa gid ang rason kon mahangpan naton ang matuod nga kahulugan kag katuyuan sang pangamuyo.

Pangamuyo nga Nagapahamuot sa Dios

Sa modelo nga pangamuyo ni Jesus, espesipiko niya nga ginsambit ang Dios subong “Amay Namon.” Huo, ang aton Manunuga indi malayo sa aton ukon isa ka makatalanhaga nga puersa nga mahimo lamang pahamut-an paagi sa mga orasyon, rituwal, ukon mga palangadion. Sa baylo, luyag niya nga kilalahon kag higugmaon naton sia subong Mahigugmaon nga Amay. “Ginahigugma ko ang Amay,” siling ni Jesus. (Juan 14:31) Ang propeta ni Jehova sa Israel sang una nagsiling: “O GINOO, ikaw amon Amay.”​—Isaias 64:8.

Paano kita mangin suod kay Jehova subong aton langitnon nga Amay? (Santiago 4:8) Kaangay sang isa ka relasyon, mangin suod kita sa Dios paagi sa pagpabutyag sang aton balatyagon, kabalaka, kag pagbaton sing sabat gikan sa iya. “Ginasugilanon” kita sang Dios paagi sa Biblia, ang iya nasulat nga Pulong. Ginapakita sini ang iya mga binuhatan, personalidad, kag katuyuan para sa aton. (2 Timoteo 3:16) Makapakigsugilanon man kita sa Dios paagi sa pangamuyo ukon matinahuron nga pagpakig-istorya sa iya. Siempre pa, ini nga pangamuyo dapat nga sinsero kag hugot, indi pakitakita, kag indi rutina lamang.

Binagbinaga: Sa isa ka suod kag mahigugmaon nga pamilya, paano ang normal kag maalam nga mga kabataan nagapakigsugilanon sa ila mga ginikanan? Sulitsuliton bala nila ang ila ginahambal, ayhan nagaisip sini sa bulig sang pila ka kagamitan? Siempre indi gid! Sa baylo, magahambal sila sing maayo kag matinahuron, gikan sa tagipusuon.

Dapat amo man sini ang himuon kon nagapangamuyo sa Dios. Ang matuod, mahimo naton masugid sa Dios ang bisan ano nga aton ginakabalak-an. Nagasiling ang Filipos 4:6, 7: “Indi kamo magkabalaka sa bisan ano nga butang, kundi sa tanan nga butang paagi sa pangamuyo kag pag-ampo nga may pagpasalamat ipahibalo sa Dios ang inyo mga pangabay; kag ang paghidait sang Dios . . . magabantay sang inyo tagipusuon kag sang inyo ikasarang sa paghunahuna.” Kinaandan lamang nga kon nabalaka kita sa isa ka butang, pirme naton ini ginapangamuyo. Apang tuhay ini sa pagsulitsulit sing amo gihapon nga mga tinaga.​—Mateo 7:7-11.

Nagaunod ang Biblia sing madamo nga halimbawa sang mga pangamuyo nga ginakahamut-an sang Dios, lakip na sing mga salmo ukon mga ambahanon, kag mga pangamuyo mismo ni Jesus. * (Salmo 17 kag 86, mga superskripsion; Lucas 10:21, 22; 22:40-44) Ang isa sa mga pangamuyo ni Jesus mabasa sa Juan kapitulo 17. Basaha ini. Samtang ginabasa mo ini, talupangda kon paano ginpabutyag ni Jesus ang iya balatyagon sa Dios. Talupangda man nga indi makagod ang iya pangamuyo. Ginapakita sini ang iya tudok nga gugma sa iya mga sumulunod. “Balaan nga Amay,” siling niya, ‘bantayi sila bangod sa isa nga malauton,’ si Satanas.​—Juan 17:11, 15.

Wala bala sing balatyagon ukon saulado lang ni Jesus ang iya ginsiling? Indi gid! Isa gid ini ka maayong halimbawa sa aton! Dapat makilala sang tanan nga luyag mangin suod sa matuod nga Dios nga sia isa ka persona. Nian pahulagon sila sang gugma pasad sa sina nga ihibalo nga dapat nila isikway ang mga kustombre kag mga kinabatasan sang relihion nga wala nagapahamuot sa Dios. Nagsiling si Jehova sa mga tawo nga naghimo sini: “Ako mangin inyo amay, kag kamo mangin akon mga anak nga lalaki kag mga anak nga babayi.”​—2 Corinto 6:17, 18.

[Mga nota]

^ par. 8 Sa iya modelo nga pangamuyo, si Jesus wala magsiling: “Gani, mangamuyo kamo sini nga pangamuyo,” nga tuhay gid sa iya ginsambit bag-o lang. Sa baylo, nagsiling sia: “Gani, mangamuyo kamo sa sining paagi.” (Mateo 6:9-13) Ano ang iya buot silingon? Subong sang ginpakita sa modelo nga pangamuyo, dapat unahon naton pangamuyo ang mga butang may kaangtanan sa aton pagsimba sa Dios sangsa materyal nga mga butang.

^ par. 15 Bisan pa ginaamba ang mga salmo sa nanuhaytuhay nga okasyon, wala nila ini ginasulitsulit kaangay sang pangadi, ukon ginalakip sa mga rituwal nga nagagamit sing mga rosarito ukon mga prayer wheel.

NAPAMANGKOT MO NA BALA?

▪ Maaplikar bala ang laygay ni Jesus tuhoy sa sulitsulit nga mga pangamuyo sa paggamit sing mga rosarito kag mga prayer wheel?​Mateo 6:7.

▪ Ano dapat ang ginapakita sang aton mga pangamuyo tuhoy sa aton pagtamod sa Dios?​—Isaias 64:8.

▪ Kon isikway naton ang mga kabutigan sang relihion, ano ang pagtamod sang Dios sa aton?​—2 Corinto 6:17, 18.