Magdiretso sa kaundan

Magdiretso sa listahan sang kaundan

Isa ka Malig-on nga Palaabuton sa Idalom sang Paggahom sang Dios

Isa ka Malig-on nga Palaabuton sa Idalom sang Paggahom sang Dios

 Isa ka Malig-on nga Palaabuton sa Idalom sang Paggahom sang Dios

MALAPIT na madula ang aton mga kabalaka tuhoy sa palaabuton kay ang Dios na ang magadumala sa bug-os nga duta paagi sa iya kaugalingon nga panguluhan nga ginatawag Ginharian sang Dios. Amo sini katahom nga palaabuton ang ginahunahuna ni Jesucristo sang gintudluan niya ang iya mga sumulunod nga mangamuyo: “Magkari ang imo ginharian. Matuman ang imo kabubut-on sa duta, subong sang sa langit.”​—Mateo 6:9, 10.

Ang Ginharian sang Dios indi magakooperar sa mga pulitiko ni magagamit sa ila. Sa baylo, dulaon sini ang tanan nga pagginahom sang tawo, subong sang ginapakita sang tagna ni Daniel tuhoy sa “katapusan nga mga adlaw,” ang panahon nga aton karon ginakabuhian. (2 Timoteo 3:1) “Sa mga adlaw sadto nga mga hari magapatindug ang Dios sang langit sing ginharian nga dili gid malaglag. . . . Dugmokon sini kag papason ini tanan [nga ginhimo sang tawo] nga ginharian kag ini magapadayon sa gihapon.” (Daniel 2:44) Ining mga pulong indi gid makahatag sing lugpay ukon paglaum sa mga nagadampig sa panguluhan sang tawo. Apang, para sa tanan nga nalipay nga ipatuman sang Dios ang iya soberanya paagi sa iya Ginharian, ining mga pulong makapalig-on gid.

Isa ka Matahom nga Palaabuton!

Kon maggahom na ang Ginharian sang Dios sa bug-os nga duta, ang mga sakop sini indi na mabahinbahin sang pulitika, rasa, relihion, ukon sang mga linya sang mapa. Sa baylo, mangin isa sila ka bug-os globo nga paghiliutod nga ginahiusa sang kamatuoran tuhoy sa Dios kag tunay nga gugma. (Juan 13:34, 35; 17:3, 17) Huo, sa idalom sang paggahom sang Ginharian, “magalambo ang matarung, kag ang bugana nga paghidait, tubtub nga wala na ang bulan!”​—Salmo 72:7.

Wala labot sini, buligan sang Ginharian sang Dios ang mapinasakupon nga katawhan nga malab-ot ang pagkahimpit sa hunahuna kag lawas. Dulaon man sini ang tanan nga balatian, pag-antos, kag kamatayon. (Bugna 21:3, 4) Ano ang mangin resulta? Ang aton planeta mangin paraiso sa tanan nga aspekto, kag sa amo, matuman na ang orihinal nga katuyuan sang Dios nga ginsambit sa Eden. *​—Genesis 1:28.

Ang Lamang Matuod nga Maayong Balita

Sang ginhatag niya ang pangkabilugan nga tanda “sang katapusan sang sistema sang mga butang,” ginlakip ni Jesus ang isa ka talalupangdon gid nga elemento. (Mateo 24:3-7) Nagsiling sia: “Ining maayong balita sang ginharian ibantala sa bug-os napuy-an nga duta subong panaksi sa tanan nga pungsod; kag nian magaabot ang katapusan.”​—Mateo 24:14.

Bilang pagtuman sa kabubut-on sang Dios, sang 2007 halos pito ka milyon ka Saksi ni Jehova sa 236 ka kadutaan ang nagpaambit sang mensahe sang Ginharian sa ila mga isigkatawo. Malipayon sila nga naghinguyang sing kapin sa 1.4 bilyones ka oras sa sining hilikuton sa baylo nga ihinguyang sa iban nga mga hilikuton. Ngaa nagasalig gid ang mga Saksi sa mga saad sang Biblia? Simple lang ang sabat. Ipaathag sang masunod nga artikulo nga ginatuman gid sang Dios ang iya ginapangako.​—Roma 3:4.

[Nota]

^ par. 6 Tan-awa ang artikulo nga “Mangin Paraiso Pa Bala ang Duta?” sa pahina 10.

[Blurb sa pahina 7]

Ang Biblia nagasiling nga may “bugana nga paghidait” sa palaabuton