Gikan sa Amon mga Bumalasa

Malampuwasan Bala sang Pag-asawahay ang Unos? (Hulyo 2006) Pirme ako nagabasa sing magasin nga Magmata! Bisan pa Katoliko ako, nanamian ako magbasa sang inyo magasin kay madamo ako sing natun-an diri. Apang, indi ako ugyon sa ginsiling ninyo: “Sang 1983, ginpahugak sang simbahan ang kasuguan sini may kaangtanan sa pag-asawahay kag ginpahapos para sa mga Katoliko ang pagtapos sa pag-asawahay.”

G.V.M., Zambia

Sabat sang “Magmata!”: Ang ginapatuhuyan namon amo ang pagligwat sa 1983 Code of Canon Law. Daku ang epekto sini ilabi na sa Estados Unidos. Sang 1968, suno sa Romano Katoliko nga obispo nga si Mark A. Pivarunas, sa mga nagpakanselar sang ila kasal, 338 lamang ang gin-aprobahan sa Estados Unidos. Apang, sang 1990, hinali ini nga nagtimbuok sa 62,824. Ngaa hinali ini nga nagdamo?

Ang abogado nga batid sa kasuguan sang simbahan nga si Edward Peters nagsiling: “Sang nagligad nga 30 ka tuig, may pila ka daku nga pagbag-o sa kasuguan sang simbahan. Bangod sini nga mga pagbag-o, mas mahapos magpakanselar sang kasal kag mas daku ang tsansa nga aprobahan ini.” Sa tapos mahinambitan ang pila ka mga pagbag-o sa kasuguan, si Peters nagsiling pa: “Ang tagsa ka pagbag-o nga ginhimo sang Batikano nagresulta sa hinali nga pagdamo sang nagapakanselar sang ila kasal.” Ano man ang tuyo sang simbahan, indi maayo ang resulta sining mga pagligwat sa kasuguan ilabi na sa Estados Unidos. Kag subong sang ginsiling sang “Magmata!”: “Ginpahapos [sang simbahan] para sa mga Katoliko ang pagtapos sa pag-asawahay.”

May Yara Bala Manunuga? (Septiembre 2006) Isa gid ka obra maestra ini nga isyu sang Magmata! Ang mga argumento simple, makapakumbinsi, lohiko, kag rasonable. Nanamian ako sa bag-o nga pormat kag estilo sini nga magasin nga nagabinagbinag sang isa lamang ka tema gikan sa lainlain nga anggulo.

A. B., Espanya

Salamat sa sining ekselente kag makawiwili basahon nga magasin. Ang nanuhaytuhay nga mga argumento kag mga ilustrasyon sini nagapadungog kay Jehova. Takus sia nga dayawon sa sini nga paagi.

R. B., Switzerland

Nakumbinse gid ako sa simple apang makahalaylo nga mga pamatuod nga gintuga kita sang Dios. Ang ebolusyon napamatud-an nga sayop sa isa ka paagi nga wala ginapakalain ang siensia kag nagahisanto sa rasonable kag sibu nga talaksan sini.

L. G., Pransia

Ang mga Roma​—Isa ka Libo ka Tuig Sang Kalipay kag Kasubo (Oktubre 2006) May pag-ulikid ako halin sang una sa mga Roma. Apang, makapasubo nga ginaihig-ihig sila gihapon. Napat-od ko nga ini nga artikulo makapahunahuna sa madamo nga tawo. Makalulugpay mahibaluan nga wala sing ginapasulabi si Jehova kag mga sumilimba man niya ang mga Roma!

B. B., Pransia

Mga Roma kami. Ang akon amay indi pa Saksi ni Jehova kag indi sia mahuyugon magbasa. Apang, naluyagan niya ini nga magasin, kag yari ini karon sa iya lamesa!

A. G., Finland