Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

MAGMATA! NOBIEMBRE 2007

 Mga Rason Kon Ngaa Masaligan ang Biblia

2. Tampad kag Bunayag

2. Tampad kag Bunayag

Ang sadsaran sang pagsalig amo ang pagkabunayag. Masaligan mo ang isa ka tawo nga bunayag, apang kon magbinutig sia bisan sing makaisa lang, mahimo nga madula na ang pagsalig mo sa iya.

ANG mga manunulat sang Biblia bunayag nga mga tawo nga nagsulat sing tampad. Ang ila pagkatampad isa ka ebidensia nga matuod ang ila ginpanulat.

Mga sayop kag mga kakulangan.

Ginbaton sang mga manunulat sang Biblia ang ila mismo mga kapaslawan kag mga kaluyahon. Ginsugid ni Moises ang iya sala nga ginbayaran niya sing daku. (Numeros 20:7-13) Ginpaathag ni Asaf nga ginkahisaan niya anay ang mahamungaya nga kabuhi sang mga malauton. (Salmo 73:1-14) Ginsugid ni Jonas ang iya paglalis kag ang iya malain nga panimuot sang primero sang ginkaluy-an sang Dios ang naghinulsol nga mga makasasala. (Jonas 1:1-3; 3:10; 4:1-3) Gin-asoy ni Mateo nga ginbiyaan niya si Jesus sang gab-i nga gindakop si Jesus.—Mateo 26:56.

Ginsulat sang mga manunulat sang Biblia, kasubong ni Jonas, ang ila mismo mga sayop

Ginbuyagyag sang mga manunulat sang Hebreo nga Kasulatan ang sulit-sulit nga pagreklamo kag pagrebelde sang ila mismo mga kasimanwa. (2 Cronica 36:15, 16) Wala ginpuera sang mga manunulat bisan ang mga manuggahom sang ila pungsod. (Ezequiel 34:1-10) Tampad man nga ginsugid sang mga sulat sang mga apostoles ang serioso kag indi nagakaigo nga mga panimuot nga ginpakita sang indibiduwal nga mga Cristiano, lakip ang mga may katungdanan, subong man sang pila ka Cristiano sa mga kongregasyon sang nahauna nga siglo C.E.—1 Corinto 1:10-13; 2 Timoteo 2:16-18; 4:10.

Hublas nga kamatuoran.

Wala gintabunan sang mga manunulat sang Biblia ang mahimo ginkabig sang iban nga isa ka makahuluya nga kamatuoran. Prangka nga ginbaton sang mga Cristiano sang nahauna nga siglo nga wala sila gindayaw sang mga tawo sa palibot nila sadto kundi ginpakanubo sila subong mga buangbuang kag talamayon. (1 Corinto 1:26-29) Nagsiling ang mga manunulat nga ang mga apostoles ni Jesus gintamod subong “wala sing tinun-an kag kinaandan lamang.”—Binuhatan 4:13, NW.

Wala ginretoke sang mga manunulat sang Ebanghelyo ang mga katunayan agod patahumon ang impresyon kay Jesus. Sa baylo, bunayag nga ginsugid nila nga natawo sia sa isa ka kubos lamang nga pamilya, nga wala sia makaeskwela sa kilala nga mga eskwelahan sang panahon niya, kag ginsikway sang kalabanan ang iya mensahe.—Mateo 27:25; Lucas 2:4-7; Juan 7:15.

Maathag nga nagahatag ang Biblia sing madamo nga ebidensia nga ginsulat ini sang bunayag nga mga manunulat. Saligan mo bala ang Biblia bangod sang ila pagkabunayag?