Tikang 2

Palambua ang Gugma sa Pamilya

Ngaa importante ini? Kinahanglan gid sang kabataan ang gugma. Sang katuigan 1950, ang antropologo nga si M. F. Ashley Montagu nagsulat: “Kinahanglan gid ang gugma sa pagdaku sang isa ka bata. Masami nga mapagros ang bata kon ginapakitaan sia sing gugma, ilabi na sa una nga anom ka tuig sang iya kabuhi.” Ang mga manugpanalawsaw karon nagaugyon sa ginhinakop ni Montagu nga “problema gid ang mga bata nga kulang sa gugma.”

Ngaa mabudlay ini? Ang kalibutan karon wala sing gugma kag makagod. Ginabangdan ini sang mga problema sa sulod sang pamilya. (2 Timoteo 3:1-5) Ang mga problema sang mag-asawa mahimo nga madugangan pa kon tuhay kag ginapilit nila ang ila luyag kon paano gastuhon ang kuarta para sa kinahanglanon sang ila mga anak. Halimbawa, kon magkatuhay ang opinyon sang mag-asawa sa pagdisiplina sa ila mga anak kag kon paano sila premyuhan kon mabuot sila, mahimo nga maggrabe pa ang problema sang mag-asawa nga wala na nga daan sing maayo nga komunikasyon.

Ano ang makabulig? Maghimo sing kahimusan nga mag-updanay ang inyo pamilya sing regular. Dapat man kamo magtigana sing tion nga kamo lang nga duha ang nagaupuray. (Amos 3:3) Gamita sing maalamon ang tion kon nagtulog na ang kabataan. Indi pagtuguti ang TV nga agawon ining mapuslanon nga mga tinion. Hupti nga mainit ang inyo paghigugmaanay. (Hulubaton 25:11; Ambahanon ni Solomon 4:7-10) Sa baylo nga pirme lang sawayon ang imo tiayon, mangita sing paagi nga hatagan sia sing komendasyon sa kada adlaw.​—Salmo 103:9, 10; Hulubaton 31:28.

Sugiri ang imo mga anak nga ginahigugma mo sila. Nagpakita si Jehova nga Dios sing halimbawa para sa mga ginikanan paagi sa dayag nga pagpabutyag sing gugma sa iya Anak nga si Jesus. (Mateo 3:17; 17:5) Si Fleck, isa ka amay sa Austria, nagsiling: “Narealisar ko nga ang kabataan subong sang pila ka bulak. Subong nga ining magagmay nga mga tanom nagaatubang sa adlaw agod masilakan kag mainitan, ang kabataan nagapaabot man sa ila mga ginikanan nga higugmaon sila kag hatagan sing pasalig nga importante sila nga mga katapo sang pamilya.”

Minyo ka man ukon nagasolo nga ginikanan, magauswag ang pagkabuhi sang inyo pamilya kon buligan mo ang inyo pamilya nga palambuon ang gugma sa isa kag isa kag sa Dios.

Apang, ano ang ginasiling sang Pulong sang Dios tuhoy sa paggamit sang mga ginikanan sang ila awtoridad?

[Blurb sa pahina 4]

“Ang gugma amo ang himpit nga higot sang paghiusa.”​—Colosas 3:14, New World Translation