Magdiretso sa kaundan

Magdiretso sa listahan sang kaundan

Magtudlo Paagi sa Halimbawa

Magtudlo Paagi sa Halimbawa

 Tikang 7

Magtudlo Paagi sa Halimbawa

Ngaa importante ini? Ang hulag ukon ginahimo makatudlo samtang ang mga tinaga nagapaalinton lamang sing impormasyon. Halimbawa, mahimo nga laygayan sang mga ginikanan ang ila mga anak nga dapat sila mangin matinahuron kag indi magbinutig. Apang, kon ini man nga mga ginikanan nagasinggitanay, nagapaninggit sa ila mga anak kag nagabinutig agod makalikaw sa obligasyon, amo sini ang ginatudlo nila nga dapat himuon sang mga hamtong na. Ang pag-ilog sa mga ginikanan amo ang “isa sa epektibo gid nga paagi sang pagtuon sang kabataan,” siling sang awtor nga si Dr. Sal Severe.

Ngaa mabudlay ini? Indi himpit ang mga ginikanan. “Ang tanan nagpakasala kag nawad-an sang himaya sang Dios,” sulat ni apostol Pablo. (Roma 3:23) Tuhoy sa pagkontrol sa aton ginahambal, nagsulat si disipulo Santiago: “Walay tawo nga makahagup sang dila.” (Santiago 3:8) Dugang pa, masami nga ginaubos sang kabataan ang pagpailob sang isa ka ginikanan. “Natingala gid ako nga madali ako mapaakig sang akon mga anak,” siling ni Larry, isa ka kalmante nga amay nga may duha ka anak.

Ano ang makabulig? Panikasugi ninyo nga mangin maayo kamo nga mga halimbawa, indi himpit nga mga halimbawa. Kon magsala kamo kon kaisa, gamita ini agod tudluan ang inyo kabataan sing positibo nga leksion. “Kon mangakig gani ako sa akon kabataan ukon kon nagsala ako sa pagdesisyon kag naapektuhan sila,” siling ni Chris, isa ka amay nga may duha ka anak, “ginabaton ko nga nagsala ako kag nagapangayo ako dayon sing pasaylo. Nagtudlo ini sa akon mga anak nga nagasala man ang mga ginikanan kag dapat kita tanan manikasog nga pauswagon ang aton paggawi.” Si Kostas, nga ginsambit kaina, nagsiling: “Napamatud-an ko nga bangod nagapangayo ako sing pasaylo kon mangakig ako, nakatuon man ang akon mga anak nga babayi nga mangayo sing pasaylo kon makasala sila.”

Nagsiling si Jehova nga Dios: “Dili ninyo pagpaakiga ang inyo mga anak, kondi sagura sila sa disciplina kag sa pagtudlo sang Ginoo.” (Efeso 6:4) Nagapangakig ang kabataan kag mahimo nga mas labaw pa sa pagpangakig sang mga hamtong na, kon ang ginahimo sang isa nga may awtoridad lain sa iya ginahambal. Busa, pamangkuta ang imo kaugalingon sa paghingapos sang tagsa ka adlaw: Kon wala ako magtingog sa bug-os nga adlaw, ano nga mga leksion ang matun-an sang akon mga anak gikan sa akon mga ginahimo? Pareho man bala ini sa mga leksion nga akon ginatinguhaan nga itudlo sa ila?

[Blurb sa pahina 9]

“Ikaw nga nagatudlo sa iban, wala ka bala nagatudlo sa imo kaugalingon?”​—Roma 2:21

[Mga retrato sa pahina 9]

Kon ang isa ka ginikanan nagapangayo sing pasaylo, makatuon man sini ang isa ka bata