Tikang 5

Maghimo sing Kahimusan kag Sunda Ini

Ngaa importante ini? Ang halos tanan nga ginahimo sang isa ka hamtong na nga tawo may ginasunod nga isa ka kahimusan. Lakip sa sini amo ang trabaho, pagsimba, kag bisan gani ang paglingawlingaw. Gani, mabudlayan gid ang kabataan kon indi sila pagtudluan sang ila mga ginikanan kon paano maghimo sing kahimusan tuhoy sa mga butang nga ila ginahimo kag sundon gid ini nga kahimusan. Sa pihak nga bahin, si Dr. Laurence Steinberg, propesor sa sikolohiya, nagsiling nga “suno sa mga pagtuon, may kompiansa kag mapalambo sang isa ka bata ang pagpugong sa kaugalingon kon may ginasunod sia nga mga pagsulundan kag kahimusan.”

Ngaa mabudlay ini? Masako ang kabuhi. Madamo nga ginikanan ang nagahinguyang sing malawig nga inoras sa pagtrabaho, gani mahimo nga wala sila sing regular nga tion upod sa ila mga anak. Ang paghimo sing kahimusan kag pagsunod sa sini nga kahimusan nagakinahanglan sing disiplina sa kaugalingon kag determinasyon agod malandas ang una nga reaksion sang bata nga indi pagsundon ini nga kahimusan.

Ano ang makabulig? Iaplikar ang prinsipio sang ginalaygay sang Biblia nga “ang tanan nga butang himoon sing nagakaigo kag mahusay [“suno sa kahimusan,” NW].”(1 Corinto 14:40) Halimbawa, samtang bata pa ang ila mga anak, madamo nga ginikanan ang maalamon nga naghimo sing kahimusan kon ano oras dapat magtulog ang mga bata. Apang, indi dapat pagpiliton ang mga bata. Si Tatiana, nga nagapuyo sa Gresya kag may duha ka anak nga babayi, nagsiling: “Kon inugtulog na sang mga bata, ginaangga-angga ko sila anay kag ginaistoryahan kon ano ang ginhimo ko sang didto sila sa eskwelahan. Pagkatapos, ginapamangkot ko man sila kon luyag nila ako istoryahan sang ginhimo nila sa sina nga adlaw. Madula ang ila pagpangalag-ag kag masami nga nagaistorya man sila.”

Ginabasahan ni Kostas, nga bana ni Tatiana, sing mga sugilanon ang ila mga anak. “Nagakomento sila tuhoy sa sugilanon,” siling niya, “kag masami nga ang amon paghambalanay nagakadto sa mga butang nga ila ginakabalak-an. Kon diretsuhon ko gani nga pamangkuton sila kon may problema sila, indi gid sila manugid.” Siempre, samtang nagadaku ang mga bata, nagakaigo nga bag-uhon mo man ang oras nga inugtulog nila. Apang kon padayunon mo ini nga sahi sang kahimusan, mahimo gid nga padayon nga gamiton sang imo kabataan ini nga tion sa pagpakighambal sa imo.

Dugang pa, maalamon kon himuon sang mga pamilya nga batasan ang magdungan sa pagkaon sing bisan isa lang ka beses sa bug-os nga adlaw. Agod mahimo ini, dapat nga sarang mapasibu ang oras sa pagkaon. “Kon kaisa nagakagab-ihan ako sa trabaho,” siling ni Charles, amay sang duha ka bata nga babayi. “Agod indi magutman ang amon mga anak, ginapapamahawan anay sila sang akon asawa. Ginahulat gid nila ako agod dungan kami nga makakaon subong isa ka pamilya. Ginahambalan namon ang teksto para sa sina nga adlaw, ginarepaso ang isa ka teksto sa Biblia, ginahambalan ang amon mga problema, kag kon may kaladlawan gani, nagainutuy-utoy kami tanan. Nakabulig gid ini agod mangin malipayon ang amon pamilya.”

Agod magmadinalag-on ka sa sini nga tikang, indi pagtuguti ang paghimud-os sa materyal nga mga butang nga mag-upang sa imo sa pagsunod sa kahimusan sang inyo pamilya. Iaplikar ang ginalaygay sang Biblia nga ‘pat-uron ang mas importante nga mga butang.’​—Filipos 1:10.

Ano pa ang mahimo sang mga ginikanan agod mapauswag ang komunikasyon sa ila mga anak?

[Blurb sa pahina 7]

“Ang tanan nga butang himoon sing nagakaigo kag mahusay.”​—1 Corinto 14:40