Ang Akon Gugma sa Musika, sa Kabuhi, kag sa Biblia

Panugiron ni Boris N. Gulashevsky

Handurawa ang isa ka bulag nga tawo nga mga 65 anyos na kag duha ka beses na nga nakaagi sing grabe nga atake sa tagipusuon. Nagatululagay ang iya mga luha samtang nagapasalamat sia sa Dios bangod gintugot sang Dios nga makilala niya Sia. Amo sina ang akon kahimtangan sang nagligad nga 11 ka tuig lamang.

NATAWO ako sang 1930 sa minuro sang Tsibulev, sa distrito sang Cherkassy, sa Ukraine. Sang 1937, sa isa ka pagpamigos sang mga sumalakdag ni Stalin, naaresto ang akon amay kag ginpamatbatan nga “kaaway sang Estado.” Ginkumpiskar ang amon apartment kag ginlikawan kami sang halos tanan nga kilala namon. Sang ulihi, madamo sa ila ang gin-aresto man. Lapnag sadto ang pagsuspetsahanay, pagluibay, kag kahadlok.

Duha ka bulan sa tapos maaresto ang akon amay, natawo ang akon manghod nga si Lena. Sadto nga tigtulugnaw, nag-istar kami ni Nanay, ni Lena, kag ni Manong Nikolai sa isa lamang ka gamay nga kuarto nga wala sing mga bintana ukon pugon. Pagkatapos, nagsaylo kami sa balay ni Lolo. Kami ni Manong Nikolai ang nag-atipan sa balay, nagpamis-ak sing inuggatong nga mga kahoy, kag nagpangay-o sang mga kalay-uhon sa balay. Mapisan ako manghimo sing kon ano lang. Makabalo ako maghimo sing sapatos kag mamanday. Maluyagon man ako sa musika, gani naghimo ako sing plywood nga instrumento nga ginatawag balalaika kag gintun-an ang pagtokar sini. Nagtuon man ako sa pagkuskos sing gitara kag mandolin.

Bata pa ako sang mabunyagan ako sa Katoliko. Apang, bangod wala ko mahangpan ang mga panudlo ukon mga kustombre sang Katoliko, daw rasonable pa sa akon ang pagtamod sang mga ateista nga wala nagapati sa Dios. Pagkatapos sang Bug-os Kalibutan nga Inaway II, nag-entra ako sa Komsomol (isa ka Komunista nga organisasyon sang mga pamatan-on), kag kon may higayon gani ginadebate namon sang  akon mga kaupod ang mga nagapati sa Dios agod pamatud-an sa ila nga wala sing Dios.

Sang Mabulag Ako

Pagkatapos sang pag-atake sang Aleman sa Unyon Sobyet sang 1941, makapila nga ang mga soldado nagbombahanay sa amon mismo minuro sa tion sang ikaduha nga bug-os kalibutan nga inaway. Naigo ako sang bomba sang Marso 16, 1944, amo nga nabulag ako. Daw nagdulom ang akon paglaum kag may ginabatyag pa ako nga masakit sa akon lawas.

Sang magsaylo ang pagbombahanay pakatundan kag napilitan ang mga Aleman sa pag-isol, nagsugod ako sa pagdayandayan sa hardin kag mamati sa hinuni sang mga pispis. Bangod naluoy sila sa akon, ginapainom ako ni Nanay sing vodka kag ginaagda ako sang mga tumandok sa ila mga sinalusalo, diin ginatukaran ko sila sing musika. Nanigarilyo ako, kag nag-inom agod lumsan ang akon kasubo. Wala madugay, narealisar ko nga indi ini makalubad sang akon problema.

Nabalitaan sang akon tiya nga maestra ang mga eskwelahan para sa mga bulag, gani ginkumbinsi niya si Nanay nga paeskwelahon ako sa isa sini. Sang 1946, nag-eskwela ako sa ginatawag karon nga Kam’yanets’-Podil’s’kyy. Nakatuon ako sa pagbasa kag sa pagmakinilya sa Braille (para sa mga bulag). Ginpadayon ko man ang pagtuon sa musika kag nagahinguyang ako sing pila ka oras agod matun-an ko sing maayo ang pagtokar sing concertina. Isa ini ka sahi sang instrumento nga kaanggid sa accordion. Sang makita sang assistant principal nga interesado gid ako, ginpagamit niya sa akon ang iya accordion. Nakatuon man ako sa pagpiano.

Nagpatindog Ako sing Balay

Sang 1948, ginpakaslan ko ang isa sa mga maestra sa eskwelahan, nga nakabulig sa akon pagtuon. Napatay ang iya bana sa inaway, kag may duha sila ka anak nga babayi. Sang makatapos ako sa pag-eskwela, nagsaylo ako sa iya balay. Nagpanikasog gid ako nga mangin isa ka maayo nga bana kag amay. Pagtokar sing musika ang nangin palangitan-an ko. Nian, sang 1952, natawo ang amon anak nga lalaki.

Nagplano ako sa pagpatindog sing balay. Ang pundasyon kag mga dingding sang balay ginpahimo ko sa iban, apang ako na ang naghimo sang madamo nga butang sa balay. Bangod bulag ako, matanda ang akon mga kamot sa paghikaphikap sa mga butang, gani gingamit ko ini pati ang akon imahinasyon. Ginauyatan ko ang kahoy, ginahikaphikap ini, kag ginalaragway ini sa akon hunahuna. Pagkatapos, maporma ko na ini nga mangin isa ka butang. Makahimo gani ako sing kahoy nga mga kasangkapan. Ang asero nga mga kasangkapan gin-order ko sa isa ka pabrika. Naghimo ako sing tisa nga pugon, sing mga muebles, kag sing iban pa nga mga butang.

Orkestra nga Puro Plawta

Dugang pa nga ginhanas ako sa musika kag nangin isa ako ka propesyonal nga musikero. Sang sampaton na ako sa lainlain nga instrumento sa musika, nagtuon ako sa pagtokar sing plawta. Isa ka bes, ginkay-o ko ang isa ka gamay nga kawayan nga plawta. Sang ulihi, nakatuon ako sa paghimo sang akon kaugalingon nga mga plawta. Wala sadto maghunahuna ang mga eksperto sa musika nga posible  nga makahimo sing bajo nga plawta, kay kon dakuon ang plawta, ang tunog sini magahinay. Amo kon ngaa wala sing orkestra nga puro plawta.

Apang nakahimo ako sing isa ka pinasahi nga plawta nga makapadaku sang tunog. Ginbutangan ko ini sing ginatawag nga resonator. Gani bisan pa bajo ang plawta, mabaskog gihapon ang tunog sini. Sang ulihi, nakahimo ako sing lainlain nga grupo sang plawta nga may matahom nga mga lanton.

Nag-organisar ako anay sing mga orkestra nga ang ginagamit puro tradisyonal lamang nga mga instrumento sa musika. Ang isa sa akon mga orkestra puro bulag lamang nga mga musikero. Nian, sang 1960, nag-organisar ako sing isa ka orkestra nga ang ginagamit lamang amo ang plawta​—isa lang ang subong sini sa Unyon Sobyet kag ayhan sa bug-os nga kalibutan.

Mga Natukiban kag mga Pagduhaduha

Sang 1960, ginpakay-o ko ang pila ka instrumento sa musika sa isa ka eksperto, nga nakigsugilanon sa akon tuhoy sa relihion. Subong sang kinaandan, nakigbais ako sa iya nga wala sing Dios. Nangabay sia nga pamatian ko lang ang ginabasa niya sa Biblia. Sanglit wala pa gid ako sadto makabasa sing Biblia, namat-od ako nga mamati.

Natandog gid ako sang kasaysayan tuhoy kay Jacob nga nangabudlay sing lakas agod masagod ang iya pamilya. Nakahibi ako sa pagpamati sa kasaysayan sang ginbaligya si Jose sang iya mga utod sa pagkaulipon kag sang mga pagtilaw nga iya gin-atubang, kag sang ulihi ginpatawad niya ang iya mga utod. (Genesis, kapitulo 37, 39-45) Naluyagan ko man ang talaksan nga ginasambit sa Biblia nga kon ano ang luyag mo nga himuon sa imo sang iban amo man ang himuon mo sa ila. (Mateo 7:12) Bangod sini, naluyagan ko na ang Biblia kay may nahibaluan na ako sa sini.

Nagsugod ako sa pagtambong sa miting sang mga Baptist upod sa akon abyan. Ginhatagan nila ako sing “Bag-o nga Testamento” sa Braille kag maukod nga ginbasa ko ini. Apang, natalupangdan ko nga nagasumpakilay ang ginasiling sini kag ang mga panudlo sang mga Baptist. Halimbawa, ginapakita sang Biblia nga ang Dios kag si Jesus duha ka magkatuhay nga mga indibiduwal kag ang Dios mas daku pa kay Jesus. (Mateo 3:16, 17; Juan 14:28; Binuhatan 2:32) Apang, nagainsister ang mga Baptist nga ang Dios kag si Jesus magkatupong, bahin sang isa ka Trinidad. Madamo nga beses nga ginbasa ko ang “Bag-o nga Testamento,” kag literal nga ginhikap ko ang tagsa ka tinaga, kag napat-od ko gid nga ini nga panudlo wala sa Biblia.

Ang Biblia nga ginagamit namon nagagamit sing tinaga nga “impierno.” Gintinguhaan ko nga ilaragway ang impierno suno sa pagtudlo sang mga Baptist​—isa ka duog sang walay katapusan nga pag-antos sa kalayo. Wala ko ini maluyagi! Nagasiling ang Biblia nga ang Dios gugma, kag indi ako makapati nga magtuga sia sini nga sahi sang duog. (1 Juan 4:8) Nagligad ang tion, kag labi pa nga ginduhaduhaan ko ang tuhoy sa impierno, kag ang iban pa nga mga panudlo sang mga Baptist.

Daku nga mga Pagbag-o

Sang 1968, nagpalamana na ang akon mga manak nga babayi kag may mga bata na sila. Sadto nga mga tinion, nagakamog kami sang akon asawa. Kon panumdumon ko yadto nga mga adlaw, naghinulsol ako nga wala kami magpakita sing kapin nga gugma kag pagpailob sa isa kag isa. Nagdiborsio kami, kag nagdul-ong man sa diborsio ang duha pa ka beses nga pagpangasawa ko.

Sang 1981, pagligad sang 35 ka tuig nga pag-istar sa Kam’yanets’-Podil’s’kyy, nagsaylo ako sa Ola, mga 600 kilometros sa sidlangan sang Moscow. Ginpadayon ko didto ang akon pagkamatugahon. Ang isa sa akon mga orkestra may 45 ka miembro nga makatokar sing lainlain nga plawta. May matagsing nga plawta nga 20 sentimetros ang kalabaon kag 1 sentimetro ang diametro. May plawta nga doble ang tunog​—matagsing kag manubo. Tres metros ang kataason sini kag 20 sentimetros ang diametro. Ang amon konsierto ginapalayag sa radyo kag telebisyon, kag nagtokar kami sa bug-os nga pungsod sang Unyon Sobyet.

Sa isa ka paindisanay sang 1986 nga ginpasakupan sang nanuhaytuhay nga mga grupo sang mga musikero sa bug-os nga Unyon Sobyet, nakabaton ako sing sertipikasyon kag medalya bangod sang kalantip nga napalambo ko sa pagplawta. Pagligad sang pila ka tuig, isa ka dokumentaryo nga pelikula ang ginpagua nga natig-uluhan sing Solo for Pipe, or the Fairy Tale of a Musician. Ang pamantalaan nga Mariiskaya Pravda nagreport: “Si Boris Nikolaievich Gulashevsky, nga makita sa sini nga pelikula, nakabaton sing isa ka pinasahi nga sertipikasyon bangod sia ang nagtukod sang orkestra nga puro plawta ang ginatokar kag isa lang ang amo sini nga sahi sang orkestra sa Rusya.”

 Pagpangita sa Kamatuoran

Sang magsaylo ako sa Yoshkar-Ola, nagparehistro ako agod magamit ko ang librarya didto nga may madamo nga materyales para sa mga bulag. Natun-an ko ang mga panudlo sang mga Katoliko, mga Pentecostal, kag mga Metodista. Nagtambong man ako sa mga miting sang Orthodox Church. Nakibot ako nga ang ila ginatudlo pareho lang sa nabatian ko anay sa Baptist Church, nga nahibaluan ko na nga wala napasad sa Biblia.

Ang isa ka Ortodokso nga pari nga si Alexander Men nagsulat nga Yahweh ang personal nga ngalan sang Dios. Nagsiling man sia nga ang pagsimba anay sang mga Judiyo putli, apang gindagtaan ini sang ulihi sang pagano nga mga panudlo kag sang idolatriya. Natandog gid ako sang iya ginsulat kag labi pa nga nagtinguha ako nga pangitaon ang kamatuoran.

Daku Pa nga Determinasyon

Sa isa sang akon mga orkestra, may isa ka musikera nga ang iya ngalan si Liza. Harapon sia gani kon sa hukmanan pa, bulag gid sia. Nagpakasal kami sang 1990, kag nangin interesado man sia tuhoy sa Dios. Sadto man nga tuig, ginduaw ko si Nanay nga nagapuyo sa akon manghod nga si Lena sa Baranovichi, Belarus. Bangod nangabay si Nanay, nagsimba ako sa Katoliko nga Simbahan, diin nagpangalawat ako. Panahon ini nga nagbag-o ang politika sa Unyon Sobyet, gani halos tuhoy sa politikal nga mga pagbag-o ang sermon sang pari. Nasigurado ko liwat nga indi ini ang ginapangita ko.

Sang 1994, duha ka beses nga naatake ako sa tagipusuon kag naggrabe ako. Napatay si Nanay sadto man nga tuig. Walay sapayan sini nga mga natabo, padayon gihapon ang pagbasa ko sing Biblia. Nabasa ko ang “Bag-ong Testamento” sing 25 ka beses, kag pagkatapos sini nag-untat na ako sa pag-isip. Apang ginabasa ko ini gihapon kag nagdamo pa ang akon mga pamangkot. Nag-athag sa akon nga indi ko mahangpan ang mga kamatuoran sa Biblia kon sa akon lang.

Nasanagan nga Paghangop

Sang 1996, nanuktok sa amon ganhaan ang mga Saksi ni Jehova sa Yoshkar-Ola. Suspetsuso ako sa ila, kay suno sa mga pamantalaan, makatalagam sila nga sekta. Apang, nakasiling ako, ‘Paano nila ako mahalitan?’ Ang una nga ginpamangkot ko sa ila amo ang tuhoy sa Trinidad. Nagsabat sila nga ang tinaga nga Trinidad ukon ang ideya sini, wala sa Biblia. Nalipay ako, kay amo man sini ang akon pagpati.

Daw nagtumbo ang akon tagipusuon sang mabasa ko sa Exodo 6:3 sa Ruso nga Biblia nga aprobado sang konsilyo sang Simbahan ang ngalan sang Dios nga Jehova. Daw indi ako makapati sa pagpangdaya sang mga relihion paagi sa pagtago sini nga ngalan gikan sa mga tawo. Apang nagdayaw gid ako nga ginpili sang mga Saksi nga makilala sila sa ngalan sang Manunuga kag ginapakilala nila ini sa iban!​—Isaias 43:10.

Paagisod nga ginpamangkot ko ang mga Saksi. Halimbawa: “Ngaa ginasambit sang Biblia ang impierno? Ngaa ang popular nga bersion sang Ruso nga Biblia nga aprobado sang konsilyo sang Simbahan nagasiling nga sunugon ang duta?” Madamo ako sang ginpamangkot, apang sang masabat ini tanan gikan sa Biblia, narealisar ko nga nakita ko na ang relihion nga madugay ko na ginapangita. Nakahibi ako sa kalipay. Nagluhod ako kag nagpasalamat sa Dios.

Wala magdugay, ginpaupod ako sang mga Saksi sa ila mga miting. Nagdayaw gid ako nga nagapamati sing maayo ang tumalambong. Kon magsambit gani ang humalambal sing isa ka teksto sa Biblia, ginapangita ini sang tumalambong sa ila Biblia, amo nga mabatian mo nga nagakinalas ang mga pahina sang Biblia. Wala pa gid ako makasumalang sini anay. Pagkatapos sadto nga miting, gin-amba sang mga Saksi ang napasad sa Isaias 35:5 nga ang panugod nga mga tinaga amo: “Kon ang bulag magamuklat.”

Apat ka beses kada semana nga ginahiwat sang mga Saksi ang pagtuon sa Biblia upod sa akon kag naluyagan ko gid ini. Wala magdugay, nahangpan ko na kon ngaa ginatugutan sang Dios ang mga kagamo kag mga inaway kag kon paano niya dulaon ang mga resulta sini nga pag-antos. Nalipay gid ako sang matun-an ko ang tuhoy sa mahigugmaon nga saad sang Dios nga paagi sa iya Ginharian, tumanon  niya ang iya kabubut-on nga makatigayon ang matinumanon nga mga tawo sing kabuhi nga walay katapusan sa isa ka paraiso nga duta. (Genesis 1:28; Isaias 65:17-25; Bugna 21:1-5) Labi pa nga nangin maathag sa akon ang mga kamatuoran sa Biblia, gani nagpabawtismo ako sang Nobiembre 16, 1997 bilang simbulo sang akon pagdedikar sa Dios.

Nahiusa sa Pag-alagad sa Dios

Sang mabawtismuhan ako, nagtuon man si Liza sa Biblia. Bisan pa paralisado sia, madasig sia nga nag-uswag sa espirituwal kag ginbawtismuhan sang 1998. Ginhakwat sia padulong sa balawtismuhan apang determinado sia sa pag-alagad sa Dios sing bug-os kalag. Regular nga nagpamasahe si Liza sa isa ka terapista, kag may ginahimo sia nga ehersisyo. Nag-ayo sang ulihi ang iya paralisis. Sa karon, wala lamang sia nagatambong sa tanan nga miting kundi nagapamalaybalay man sia kag nagabantala sa malayo nga mga teritoryo.

Sa kada tion nga maggua ako agod magbantala, nagapangamuyo ako sa Dios nga hatagan niya ako sing kaisog. Pagkatapos ko makapangamuyo, ginakuha ko ang akon baston kag maglakat padulong sa dululugan sang trolleybus (de-koryente nga bus). Nagaagi ako sa dalan nga sunado ko gid. Kon makabati gani ako sing nagapalapit nga mga tikang, nagasugod ako sa pagpakighambal tuhoy sa Biblia. Pagsaka ko sa bus, nagapungko ako sa tunga nayon. Nagapakighambal ako sa mga tawo tuhoy sa Biblia kag nagatanyag sing mga libro kag mga magasin. Kon may magpakita sing interes, nagabayluhanay kami sing numero sang telepono.

Kasan-o lang, nasugilanon ko ang isa ka manunudlo sa musika sa isa ka sanitarium. Nakibot sia sa kaalam nga masapwan sa Biblia. Gani, pagpauli niya, nagtuon sia sa Biblia upod sa mga Saksi ni Jehova. Sa amo gihapon nga sanitarium, nakilala ko ang direktor sang isa ka lokal nga pabrika nga may anak nga bulag. Ginsugid ko sa iya ang akon paglaum kag nangin interesado sia kag gin-apresyar niya ang mga kamatuoran sa Biblia nga nabatian niya.

Halin sang mabawtismuhan ako, walo ka tawo ang nabuligan ko agod mangin mga manugbantala man sang Ginharian kag madamo pa ang nabuligan ko sa pagtuon sa Biblia. Padayon gihapon nga ginagamit ni Jehova ang amon Cristiano nga mga kauturan agod buligan kami sang akon asawa. Ginabasa nila sa amon ang pasad sa Biblia nga mga publikasyon kag ginahambalan namon ini. Ginarekord man nila para sa amon ang mga pamulongpulong sa kombension kag sa kongregasyon. Nakabulig ini tanan agod mapatudok namon sa amon tagipusuon ang mga kamatuoran sang Biblia kag mapaambit man ini sa iban. Gani, nangin isa gid ka “nagapabakod nga bulig” sa amon ang kongregasyon.​—Colosas 4:11.

Madamo nga tinuig ang ginhugod ko sa musika, kag karon, malipayon nga ginaamba ko ang mga ambahanon sang Ginharian. Nasaulo ko ang kalabanan sang mga ambahanon sa Ruso nga libro sang mga ambahanon nga Mag-amba Sing mga Pagdayaw kay Jehova. Nagapati ako nga nakita ako ni Jehova sa sining malaut nga kalibutan kag ginbuligan niya ako nga makita ang dalan pagua sa espirituwal nga kadulom. Amo kon ngaa kumbinsido ako nga sa pila ka adlaw luwason man niya ako gikan sa literal nga kadulom.

[Retrato sa pahina 19]

Nagatokar ako sing bajo nga plawta nga C-major

[Retrato sa pahina 20]

Nagaaccordion ako sang 1960

[Retrato sa pahina 20, 21]

Isa ka orkestra nga puro plawta

[Retrato sa pahina 23]

Ako kag si Liza karon