Magdiretso sa kaundan

Magdiretso sa listahan sang kaundan

Kon Ngaa Naghalin Ako sa Sirkos

Kon Ngaa Naghalin Ako sa Sirkos

 Kon Ngaa Naghalin Ako sa Sirkos

Panugiron ni Marcelo Neím

NATAWO ako sa Montevideo, Uruguay. Bisan pa mahinadlukon sa Dios ang akon mga ginikanan, wala sila sing relihion. Napatay si Nanay sa isa ka aksidente sang mga kuatro anyos ako, kag ginpadaku ako sang akon mga paryente nga amo ang nagtudlo sa akon sing maayo nga mga prinsipio. Sa edad nga 20 anyos, nagdesisyon ako nga maglakbay agod may ideya ako tuhoy sa nanuhaytuhay nga mga pungsod kag mga kultura.

Sa Colombia, nagsugod ako sa pag-obra sa sirkos subong isa ka kabulig. Napanilagan ko nga malipayon gid ang mga nagapasundayag kon magpinalakpak ang mga tumalan-aw, gani luyag ko man nga mangin isa sa ila. Ginpraktisan ko ang pagsakay sa gamay kag pagamay pa gid nga mga bisikleta tubtob nga makasakay ako sa isa ka bisikleta nga 12 sentimetros lamang ang kalabaon—isa sang pinakagamay sa bug-os nga kalibutan. Makaigo ini sa akon palad. Nagbantog ako sa halos bug-os nga Bagatnan nga Amerika. Sa edad nga 25 anyos, nakalambot ako sa Mexico kag nakaobra sa pila ka sirkos.

Hinali nga Nagbag-o ang Akon Kabuhi

Nagustuhan ko gid ang kabuhi sa sirkos. Pirme kami nagabiyahe, nagatulog sa matahom kaayo nga mga hotel, kag nagakaon sa malahalon nga mga restawran. Apang sa amo man nga tion, daw wala sing pasingadtuan ang akon kabuhi, kag wala ako sing paglaum. Isa ka hapon, nagbag-o ang akon kabuhi. Ginhatag sa akon sang nagadumala sa pasundayag sa sirkos ang libro nga iya nabaton, nga natig-uluhan Bugna—Malapit Na ang Mahimayaon nga Talipuspusan Sini! * Pagkatapos namon magpasundayag, naagahan ako sa pagbasa sini. Bisan pa daw indi ko mahangpan ang ginabasa ko, napukaw ang akon interes sa paathag sang libro tuhoy sa duag-eskarlata nga mabangis nga sapat kag sa makihilawason nga babayi nga ginasambit sa Bugna. (Bugna 17:3–18:8) Nian, nakakita ako sing isa pa ka libro nga gikan sa amo man gihapon nga mga manugbalhag, ang Mahimu Ka Mabuhi Sing Dayon sa Paraiso sa Duta.* Mas mahapos ini mahangpan, kag narealisar ko dayon nga dapat ako magbantala. Gani ginsugdan ko gilayon nga isugid man sa bisan sin-o nga masumalang ko ang akon mga natun-an.

Samtang nagaligad ang tion, narealisar ko nga dapat ko makontak ang mga Saksi ni Jehova. Nalista sa libro nga Talipuspusan Sang Bugna ang numero sang telepono sang Saksi nga lin-ay nga naghatag sang libro sa akon abyan. Gani gintawgan ko sia, kag gin-agda ako sang iya amay nga magtambong sa isa ka kombension sang mga Saksi ni Jehova sa Tijuana, Mexico. Natandog  ako sang gugma nga ginpakita didto kag nakumbinsi ako nga amo ini ang matuod nga relihion. Bisan diin magkadto ang sirkos, nagatambong ako sa lokal nga Kingdom Hall kag nagakuha ako sing mga magasin kag mga libro nga mapanghatag ko sa di-pormal nga paagi.

May butang pa nga natabo nga nagkumbinsi sa akon sing labi pa nga husto ang ginahimo ko. Gin-agda ako sang mga Saksi sa Memoryal sang kamatayon ni Cristo kag ginpaathag nila sa akon nga importante gid nga tambungan ini sang mga Cristiano. Apang una yadto nga gab-i sa sirkos, kag daw imposible gid nga makatambong ako. Nangamuyo ako sing hugot kay Jehova tuhoy sini, kag isa ka makapakibot nga butang ang natabo. Duha ka oras na lang antes magsugod ang pasundayag, napatay ang koryente! Sa amo, nakatambong ako sa Memoryal kag nakabalik pa sang ulihi agod magpasundayag sa sirkos. Para sa akon, daw ginsabat gid ni Jehova ang akon pangamuyo.

Isa ka bes, nagapanghatag ako sing magagmay nga mga balasahon samtang nagalinya ako sa bangko. Nakita ako sang isa ka Cristiano nga gulang kag ginmuno niya ang akon kakugi. Ginpalig-on niya ako nga magbantala sa isa ka organisado nga paagi, sa idalom sang pagtuytoy sang isa ka kongregasyon. Mahigugmaon nga ginpaathag niya sa akon nga dapat ko bag-uhon ang akon kabuhi agod mahimo ko ini. Samtang ginabinagbinag ko ang mga pagbag-o nga dapat ko himuon, gintanyagan man ako sing mataas sing sueldo nga obra sa isa ka sirkos sa Estados Unidos. Nagsalangisag ako. Luyag ko nga makakadto sa Estados Unidos, apang kon magsugot ako, ambot kon mapadayon ko pa ang dalanon sa kabuhi nga bag-o ko lang masugdan. Amo ini ang una nga pagtilaw sa akon, kag indi ko luyag nga mapaslawan si Jehova sa akon. Walay sapayan nga daw indi makapati ang mga kaupod ko sa sirkos sa himuon ko, naghalin ako sa sirkos, nagbuylog kag nagtambong ako sa isa ka kongregasyon, nagpautod sang akon malaba nga buhok, kag naghimo ako sing iban pa nga mga pagbag-o sa akon pagkabuhi agod makaalagad kay Jehova.

Isa ka Makaalayaw nga Kabuhi nga Wala Ko Ginhinulsulan

Sang 1997, sang manugpabawtismo na ako subong isa sa mga Saksi ni Jehova, may ikaduha nga pagtilaw nga nag-abot sa akon—isa pa gid ka kahigayunan nga makakadto ako sa Estados Unidos, sini nga tion mapasundayag ako sa isa ka bantog nga programa sa telebisyon sa Miami nga libre tanan nga gasto. Apang luyag ko na magpabawtismo kag tumanon ang akon dedikasyon kay Jehova. Gani, ginpangindian ko ang tanyag, nga ginkatingala gid sang mga tiglawas sang programa sa telebisyon.

May pila nga nagapamangkot sa akon kon bala ginhinulsulan ko ang paghalin sa sirkos. Ang akon sabat amo nga indi ko gid pag-ibaylo ang akon pagpakig-abyan kay Jehova karon sa sahi sang kabuhi nga nagustuhan ko gid anay. Bisan pa sa akon bag-o nga karera karon subong isa ka bug-os tion nga Cristiano nga ministro, wala ako ginapalakpakan, indi ako bantog, ukon wala sing daku nga manggad, may direksion na ang akon kabuhi. Ginapaabot ko gid ang isa ka hamili nga paglaum nga mabuhi sa isa ka paraiso nga duta kag abiabihon ang akon iloy kon banhawon na sia.—Juan 5:28, 29.

[Nota]

^ par. 6 Ginabalhag sang mga Saksi ni Jehova.