Determinado sa Paglab-ot sang Akon Tulumuron

PANUGIRON NI MARTHA CHÁVEZ SERNA

Isa ka adlaw sang 16 anyos ako, nalipong ako samtang nagaobra sa balay. Sang maulian ako, yara na ako sa katre. Naligban kag masakit katama ang ulo, indi ako makakita ukon makabati sa sulod sang pila ka minuto. Kinulbaan ako. Ano ang natabo sa akon?

GINDALA ako sang akon nahangawa nga mga ginikanan sa doktor kag ginresetahan niya ako sing mga bitamina. Nagsiling sia nga ginkombulsion ako bangod kulang ako sing tulog. Pagligad sang pila ka bulan, ginkombulsion liwat ako, kag ginsundan ini sang isa pa. Nagpakonsulta kami sa lain naman nga doktor, nga nagsigahom nga may nerbios ako kag ginhatagan niya ako sing bulong nga pangpatulog.

Apang, labi pa nga nagsagunson ang akon pagkombulsion. Pirme ako nagakalipong kag nagakatumba kag nagakadisgrasya. Kon kaisa makagat ko ang akon dila kag ang nasulod nga bahin sang akon baba. Kon maulian gani ako, masakit katama ang akon ulo kag daw masuka ako. Nagapalanakit ang akon bug-os nga lawas, kag masami nga indi ko madumduman ang natabo antes kombulsionon. Agod mag-ayo, masami nga kinahanglan ko ang isa ukon duha ka adlaw nga pahuway. Walay sapayan sini, nagpati ako nga temporaryo lamang ini​—⁠nga sa ulihi magaayo ako.

Epekto sa Akon mga Tulumuron

Bata pa ako sang nagtuon sa Biblia ang akon pamilya upod sa mga Saksi ni Jehova. Duha ka espesyal payunir, ukon bug-os tion nga mga ministro, ang nagtudlo sa amon kag nagahinguyang sila sing madamo nga oras kada bulan sa pagtudlo sang kamatuoran sang Biblia sa iban. Nakita ko ang kalipay sang mga payunir sa ministeryo. Sa akon pagpakighambal sa akon maestra kag sa akon mga kabutho tuhoy sa mga saad sa Biblia, nabatyagan ko man ini nga kalipay.

Wala magdugay, madamo sa akon pamilya ang nangin mga Saksi ni Jehova. Nanamian gid ako sa pagbantala sing maayong balita! Sang pito ka tuig ang akon edad, tulumuron ko nga mangin isa man ka espesyal payunir. Sa edad nga 16, ginhimo ko ang daku nga tikang agod malab-ot ina nga tulumuron sang nagpatugmaw ako. Nian liwat ako nga ginkombulsion.

Pagpayunir

Walay sapayan sang akon balatian, handum ko gihapon nga mangin bug-os tion nga ministro sang mga Saksi ni Jehova. Apang bangod ginakombulsion ako sing makaduha sa isa ka semana, naghunahuna ang iban sa kongregasyon nga indi ko dapat pagpas-anon ining mabug-at nga responsibilidad. Nagkasubo ako kag naluyahan sing buot. Apang, sang ulihi, nagduaw sa amon kongregasyon ang isa ka mag-asawa nga nagaalagad sa sanga talatapan sang mga Saksi ni Jehova sa Mexico. Nabalitaan nila ang akon handum nga magpayunir kag ginpalig-on nila ako. Ginkumbinsi nila ako nga ang akon balatian indi dapat magpugong sa akon sa pagpayunir.

Gani, sang Septiembre 1, 1988, gintangdo ako subong regular payunir sa amon banwa sa San Andrés Chiautla, Mexico. Madamo nga oras ang akon ginahinguyang kada bulan sa pagbantala sing maayong balita. Kon indi ako makagua kag makabantala bangod ginkombulsion ako, ginasulatan ko ang mga tawo sa amon lugar tuhoy sa mga topiko sa Kasulatan kag ginapalig-on sila paagi sa sulat nga magtuon sa Biblia.

 Nasayasat ang Akon Balatian

Sini nga tion, bisan pa nga mahal, gindala ako sang akon mga ginikanan sa isa ka neurologo. Nasayasat sini nga doktor nga kuyap gali ang akon balatian. Bangod sang pagbulong sa akon, nakontrol ang akon balatian sa sulod sang mga apat ka tuig. Sini man nga tion, nag-eskwela ako sa Pioneer Service School, diin napalig-on ako nga pasangkaron ang akon handum nga mag-alagad kon diin mas daku ang kinahanglanon para sa mga ebanghelisador.

Nahibaluan sang akon mga ginikanan nga gusto ko gid pasangkaron ang akon pag-alagad. Sanglit medyo kontrolado na ang akon balatian, gintugutan nila ako nga magkadto sa Zitácuaro, sa Michoacán State, nga mga 200 kilometros ang kalayuon gikan sa amon balay. Bangod sang pagpakig-upod sa iban pa nga mga payunir sa sina nga teritoryo, labi pa nga ginpakabahandi ko ang bug-os tion nga pag-alagad.

Apang, pagligad sang duha ka tuig sa Zitácuaro, ginkuyap liwat ako. Nagpauli ako sa akon mga ginikanan, nga nalugaw-an kag nasubuan kag nagakinahanglan nga magpabulong. Nagkadto ako sa neurologo kag nagsiling sia nga ginapierde sang ginatomar ko nga bulong ang akon atay. Nangita ako sing iban pa nga pamaagi sa pagpabulong, kay indi na namon masarangan ang magpakonsulta sa espesyalista. Naglubha ang akon balatian, kag kinahanglan nga mag-untat ako sa pagpayunir. Ang tagsa ka atake sang kuyap balagbag sa akon pag-ayo. Apang kon mabasa ko ang mga Salmo kag magdangop ako kay Jehova sa pangamuyo, nabatyagan ko ang iya lugpay kag kusog.​—⁠Salmo 94:17-19.

Nalab-ot Ko ang Akon Tulumuron

Sang malubha ako, makaduha ako ginakuyap sa isa ka adlaw. Nian isa ka daku nga pagbag-o ang natabo. Ginresetahan ako sang doktor sing tuhay nga bulong sa kuyap, kag nag-ayuayo ang akon pamatyag sa mas malawig nga tion. Gani, sang Septiembre 1, 1995, nagpayunir liwat ako. Nag-ayo ang akon kahimtangan, gani sang wala na ako ginkuyap sa sulod sang duha ka tuig, nag-aplay ako nga mag-alagad subong espesyal payunir. Nagkahulugan ini sang paghinguyang sing mas madamo pa nga oras sa ministeryo kag sa pag-alagad bisan diin nga kinahanglan ako. Handurawa lamang ang akon ginbatyag sang nabaton ko ang pagtangdo sa akon subong espesyal payunir! Nalab-ot ko ang akon tulumuron sang bata pa ako.

Sang Abril 1, 2001, ginsugdan ko ang akon bag-o nga asaynment, sa isa ka magamay nga minuro sa kabukiran sang Hidalgo State. Nadestino ako karon sa isa ka magamay nga banwa sa Guanajuato State. Dapat mag-ukod gid ako sa pagtomar sang akon bulong kag sa pagtigayon sing nagakaigo nga pahuway. Nagahalong ako sa akon ginakaon, ilabi na sa tambok, caffeine, kag mga de-lata nga pagkaon. Ginalikawan ko man nga magpangakig ukon magkabalaka sing daku. Apang ining estrikto nga rutina naghatag sa akon sing mga benepisyo. Sa tion nga espesyal payunir ako, makaisa lang ako gin-kuyap.

Bangod dalaga ako kag wala sing mga responsibilidad sa pamilya, nalipay ako nga magpadayon sa pag-alagad subong espesyal payunir. Nalugpayan man ako sa pagkahibalo nga ‘si Jehova indi di-matarong nga malipat sa aton binuhatan kag sa gugma nga ginpakita naton tungod sa iya ngalan.’ Mahigugmaon gid sia, kay wala sia nagapangayo sang indi naton mahatag sa iya! Ina nga kamatuoran nagbulig sa akon nga balansehon ang akon panghunahuna, kay pananglit mag-untat liwat ako sa pagpayunir bangod sang indi maayo nga panglawas, nahibaluan ko nga mahamuot gihapon si Jehova sa akon bug-os kalag nga pag-alagad.​—⁠Hebreo 6:10; Colosas 3:23.

Wala sing duhaduha nga ang pagpaambit sa iban sang akon pagtuo kada adlaw nagapabakod sa akon. Nagabulig man ini sa akon nga dumdumon pirme ang mga pagpakamaayo nga ginaaman sang Dios para sa palaabuton. Ang Biblia nagasaad nga sa bag-ong kalibutan, wala na sing balatian, “ukon kalisod ukon paghibi ukon kasakit pa. Ang nahaunang mga butang [magataliwan].”​—⁠Bugna 21:​3, 4; Isaias 33:24; 2 Pedro 3:13.

[Retrato sa pahina 28]

Sang mga 7 anyos ako (ibabaw); sang mga 16 anyos ako, wala madugay pagkatapos nga natugmawan ako

[Retrato sa pahina 29]

Nagabantala upod sa isa ka abyan