Ang Pagtamod sang Biblia

Dapat Mo Bala Kahadlukan ang Armagedon?

ANO ang “Armagedon”? Sa simple nga hambal, nagapatuhoy ini sa kahimtangan ukon sitwasyon diin ang mga manuggahom sang kalibutan ginatipon sa pagpakigsumpong sa Dios kag sa iya Ginharian nga ang Hari amo si Jesucristo. Sa tulun-an sang Biblia nga Bugna, si apostol Juan nakakita sing palanan-awon diin ang mga manuggahom nagatipon kag nagapakigsumpong sa Dios sa simbuliko nga duog nga ginatawag Armagedon.

Ang tinaga nga “Armagedon” mabasa sing makaisa lamang sa Kasulatan, apang ginagamit ini karon sing lapnag subong metapora. Halin sa nuklear nga pagpapas sa rasa pakadto sa virus sa kompyuter, ang tinaga ginagamit sa pagpatuhoy sa dalagku kag magagmay nga mga kalamidad. Ang pila ka pinakamabakal nga mga libro ginbase sa ginatawag nga katapusan sang kalibutan, ukon sa tion antes sang Armagedon. Ang isa ka serye sang mga nobela tuhoy sa sini nga tema nakabaligya sing kapin sa 60 milyones ka kopya sa sulod sang nagligad nga napulo ka tuig.

Ang iban nga mga tawo nahadlok sa Armagedon. Nagapati sila nga ang mga terorista, manugpaaway nga mga pungsod, ukon mga kalamidad nga indi makontrol sang tawo magadul-ong sa bug-os kalibutan nga kalaglagan, nga bangod sini, wala na sing mahimo nga mabuhi pa sa duta. Nagapati ang iban nga ang Dios mismo maakigon nga magalaglag sang aton planeta kag sang tanan nga yari sa sini sa gintalana nga tion. Makahaladlok gid ini! Apang ano ang husto nga paghangop sa “inaway sang daku nga adlaw sang Dios nga Labing Gamhanan” sa Armagedon?​—⁠Bugna 16:​14, 16.

Laglagon Bala ang Duta?

Indi tanan nga tawo laglagon sa Armagedon. Paano naton ini nahibaluan? Ang Biblia nagapasalig sa aton nga “makahibalo si Jehova kon paano luwason ang mga tawo nga may diosnon nga debosyon gikan sa pagtilaw, apang magtigana sang di-matarong nga mga tawo para sa adlaw sang paghukom agod laglagon.” (2 Pedro 2:9) Gani, makasalig kita nga kontrolon sang Dios sing himpit ang iya labing gamhanan nga gahom. Ang “mga nagasumpong lamang sa pagkasoberano sang Dios ang magaatubang sang iya kasingkal sa Armagedon. Wala sing aksidente lamang nga mga biktima.​—⁠Salmo 2:​2, 9; Genesis 18:​23, 25.

Ang Biblia nagasiling sa aton nga ang Dios ‘magalaglag sang mga nagalaglag sang duta.’ (Bugna 11:18) Maathag, kon amo, nga indi katuyuan ni Jehova  nga Dios nga laglagon ang aton planeta. Sa baylo, laglagon niya ang malauton nga tawhanon nga katilingban nga nagapamatok sa iya paggahom. Kaanggid ini sa natabo sa Anaw sang panahon ni Noe.​—⁠Genesis 6:11-​14; 7:⁠1; Mateo 24:37-​39.

“Makakulugmat nga Adlaw”

Matuod gid nga ang pila ka tagna sa Biblia tuhoy sa nagapakari nga kalaglagan makahaladlok. Halimbawa, si manalagna Joel nagpamulong tuhoy sa “daku kag makakulugmat nga adlaw ni Jehova.” (Joel 2:31) Ang talaguan sing armas sang Dios nagalakip sang niebe, yelo, linog, makalalaton nga balatian, mabunok nga ulan, nagaulan nga kalayo kag asupre, makamamatay nga pagkagumon, kilat, kag pagkahagas sang unod nga kalalat-an.⁠ * (Job 38:​22, 23; Ezequiel 38:14-​23; Habacuc 3:​10, 11; Zacarias 14:​12, 13) Kag maathag nga ginalaragway sang Biblia ang tion nga ang kadaygan sang duta mapuno sang mga bangkay, nga ginpabay-an lang kaangay sang ipot ukon kalan-on sang mga pispis kag sang iban nga mga sapat. (Jeremias 25:​33, 34; Ezequiel 39:17-20) Ang mga kaaway sang Dios makugmat gid sa sini nga inaway.​—⁠Bugna 6:​16, 17.

Nagakahulugan bala ini nga dapat kahadlukan sang matinumanon nga mga sumilimba sang matuod nga Dios ang makatilingala nga mga hitabo sa Armagedon? Indi gid, kay ang mga alagad sang Dios sa duta indi makigbahin sa sini nga inaway. Dugang pa, amligan sila ni Jehova. Apang, ang matuod nga mga sumilimba mahayanghag sa makakulugmat nga pagpakita sang gahom sang Dios.​—⁠Salmo 37:34; Hulubaton 3:​25, 26.

Apang, si apostol Juan gin-inspirar sa pagpasalig sa aton: “Malipayon ang nagatuman sang mga pulong sang tagna sining linukot,” lakip na ang paandam tuhoy sa Armagedon. (Bugna 1:⁠3; 22:7) Mahimo bala malipay ang isa sa pagpamalandong sa Armagedon? Paano?

Ang Panawagan sang Dios sa Pagpangaman

Kon nagapakari ang isa ka mabaskog nga bagyo, ukon unos, ang lokal nga mga awtoridad nagahatag sing mga paandam agod amligan ang kabuhi. Agod pat-uron nga ang tanan makabati sang paandam, ginapadala pa gani ang mga pulis sa pagrikorida ukon sa pagpamalaybalay. Ginahimo ini tanan agod buligan ang mga tawo nga makapangaman para sa ila kaluwasan kag indi agod pahugon sila. Ang mahinantupon nga mga indibiduwal malipayon nga nagabaton sang paandam kag nagahimo sing mga pagpangaman.

Kaangay man ini sa nagapaandam nga mensahe sang Dios tuhoy sa nagapakari nga “unos” sang Armagedon. (Hulubaton 10:25) Si Jehova nagahatag sing mga detalye tuhoy sa iya inaway sa iya nasulat nga Pulong. Wala sia nagapamahog, kundi luyag niya maghatag sing nagakaigo nga paandam kag pahulagon ang mga tawo nga maghinulsol kag magpanikasog gid nga alagaron sia. (Sofonias 2:​2, 3; 2 Pedro 3:9) Yadtong magahimo sini makalampuwas. Gani, indi naton dapat kahadlukan ang nagapakari nga inaway sang Dios. Sa baylo, atubangon naton ang palaabuton nga may pagsalig nga “ang tanan nga nagatawag sa ngalan ni Jehova maluwas.”​—⁠Joel 2:32.

[Nota]

^ par. 10 Dapat talupangdon nga ang pila ka bahin sang Biblia ginsulat sa simbuliko nga hambal, ukon “mga tanda.” (Bugna 1:1) Gani, indi kita mangin dogmatiko kon daw ano ka literal nga gamiton ang mga elemento nga ginasambit sa sining mga tagna.

[Retrato sa pahina 12]

Kon nagapakari ang mabaskog nga bagyo, ang lokal nga mga awtoridad nagahatag sing mga paandam agod amligan ang kabuhi

[Retrato sa pahina 13]

Ang nagapaandam nga mensahe sang Dios tuhoy sa Armagedon isa ka panawagan sa pagpangaman para sa kaluwasan