Ang Pagtamod sang Biblia

Malain Bala ang Mag-ambisyon?

“ANO bala ang malain sa kabantugan, manggad kag gahom?” Mabasa ini nga pamangkot sa isa ka report sang isa ka relihioso nga asosasyon nga may tig-ulo nga “Mga Problema sa Moral.” Ginpatuhuyan sang report ang ginsiling sang Dios kay Abraham: “Himuon ko gikan sa imo ang isa ka daku nga pungsod kag pakamaayuhon ko ikaw kag padakuon ang imo ngalan.”​—⁠Genesis 12:2.

Bisan pa ginsiling sang report nga “indi dapat mag-ambisyon sang makahalit sa iban,” ginkutlo sini ang isa ka bantog nga rabbi sang unang siglo, nga nagsiling: “Kon indi ko pag-itib-ong ang akon kaugalingon, sin-o ang magatib-ong sa akon?” kag nian naghinakop: “Kon indi naton paghimuon ang aton masarangan, wala na sing magahimo sini.” Isa bala ka problema ang ambisyon para sa mga luyag mag-alagad sa Dios? Ano ang nadalahig sa paghimo sang aton masarangan? Malain bala ang mag-ambisyon? Ano ang pagtamod sang Biblia?

Ambisyuso Bala si Abraham?

Ginpakilala si Abraham sa Biblia subong isa ka tawo nga may talalupangdon nga pagtuo. (Hebreo 11:​8, 17) Wala ginpalig-on sang Dios si Abraham nga mag-ambisyon sang ginpangakuan Niya sia nga himuon gikan sa iya ang isa ka daku nga pungsod kag padakuon ang iya ngalan. Ginsiling sang Dios ang iya katuyuan sa pagpakamaayo sa katawhan paagi kay Abraham, isa ka katuyuan nga labi ka importante sangsa ambisyon sang tawo.​—⁠Galacia 3:14.

Agod masimba ang Dios, ginbiyaan ni Abraham ang masulhay kag mahamungaya nga pagkabuhi sa Ur. (Genesis 11:31) Sang ulihi, agod malikawan ang gamo, handa si Abraham nga indi paggamiton ang iya gahom kag awtoridad sang ginhatag niya sa iya hinablos nga si Lot ang pinakamaayo nga bahin sang duta nga pagapuy-an niya. (Genesis 13:​8, 9) Indi gid mabasa sa Biblia nga si Abraham ambisyuso. Sa baylo, bangod sang iya pagtuo, pagkamatinumanon, kag pagkamapainubuson, ginpalangga sia sang Dios subong isa ka matuod nga “abyan.”​—⁠Isaias 41:8.

Tuhay nga Pagtamod sa Posisyon, Kabantugan, kag Gahom

Ginlaragway ang ambisyon subong “daku nga paghandum sing posisyon, kabantugan, ukon gahom.” Sang una nga panahon, natigayon ni Hari Solomon ang posisyon, kabantugan, kag gahom, upod ang daku nga manggad. (Manugwali 2:3-9) Apang, wala gid niya ini ginhandum sa umpisa. Sang napanubli ni Solomon ang pagkahari, ginsilingan sia sang Dios nga magpangayo sing bisan  ano nga luyag niya. Mapainubuson nga ginpangayo ni Solomon ang matinumanon nga tagipusuon kag ang paghantop agod magamhan ang ginpili sang Dios nga katawhan. (1 Hari 3:5-9) Sang ulihi, pagkatapos nga ginlaragway ni Solomon ang kadakuon sang iya manggad kag gahom, nagsiling sia nga “ang tanan walay pulos kag pagpanikasog sa hangin.”​—⁠Manugwali 2:11.

May ginsiling bala si Solomon tuhoy sa paghimo sang mga tawo sang ila masarangan? Huo, sa isa ka punto. Sang mabinagbinag na niya ang iya madamo nga eksperiensia sa kabuhi, naghinakop sia: “Magkahadlok sa matuod nga Dios kag magtuman sa iya mga sugo. Kay amo ini ang bug-os nga katungdanan sang tawo.” (Manugwali 12:13) Ginahimo sang mga tawo ang ila masarangan, indi sa pagtigayon sing posisyon, manggad, kabantugan, ukon gahom, kundi sa pagtuman sang kabubut-on sang Dios.

Ang Pagkamapainubuson Nagadul-ong sa Kadungganan

Matuod, wala sing malain sa maugdang nga paghigugma sa kaugalingon. Ginasugo kita sang Biblia nga higugmaon ang aton isigkatawo subong sang paghigugma naton sa aton kaugalingon. (Mateo 22:39) Natural lang nga maghandum sing kasulhayan kag kalipay. Apang ginapalig-on man sang Biblia ang kapisan, pagpaubos, kag kaugdang. (Hulubaton 15:33; Manugwali 3:13; Miqueas 6:8) Ang mga tawo nga bunayag kag masaligan kag nagapangabudlay sing lakas masami nga matalupangdan, makakita sing maayo nga trabaho, kag ginatahod. Pat-od gid nga mas maayo ini sangsa pagpamentaha sa iban ukon pagpaindisanay agod matigayon ang posisyon.

Ginpaandaman ni Jesus ang iya mga tagpalamati batok sa pagpili sing prominente nga duog sa sinalusalo sa kasal. Ginlaygayan niya sila nga magpungko sa pinakakubos nga duog kag hulaton nga ang tagbalay amo ang magsaylo sa ila. Maathag nga ginsiling ni Jesus ang prinsipio nga nadalahig: “Ang tagsatagsa nga nagapakataas sang iya kaugalingon paubson, kag ang nagapaubos sang iya kaugalingon pataason.”​—⁠Lucas 14:7-11.

Ginalikawan sang Matuod nga mga Cristiano ang Ambisyon

Ginapakita sang Biblia nga ang matinaastaason nga ambisyon naangot sa pagkadihimpit sang tawo. (Santiago 4:​5, 6) Nag-ambisyon anay si apostol Juan. Daku gid ang handum niya sa posisyon amo nga, upod sa iya utod, maisog niya nga ginpangayo kay Jesus ang prominente nga posisyon sa Ginharian. (Marcos 10:37) Ginbag-o sang ulihi ni Juan ang iya panimuot. Ang matuod, sa iya ikatlo nga sulat, ginsabdong niya si Diotrefes nga, siling niya, “naluyag magtigayon sing nahauna nga lugar.” (3 Juan 9, 10) Ginasunod gid sang mga Cristiano karon ang pinamulong ni Jesus kag ginapaubos ang ila kaugalingon, kag ginasunod man nila ang halimbawa sang tigulang nga si apostol Juan, nga nagsikway sang iya huyog sa pag-ambisyon.

Apang, bisan ang kaalam, ikasarang, maayong mga buhat, kag kapisan sang isa ka indibiduwal indi garantiya nga makilala gid sia. Kon kaisa ginaapresyar ini sang iban nga mga tawo, kag kon kaisa wala man. (Hulubaton 22:29; Manugwali 10:7) Kon kaisa, mabutang sa posisyon nga may awtoridad ang mga tawo nga indi tanto ka kalipikado, samtang indi kilala ang mas may ikasarang nga mga tawo. Sa sining di-himpit nga kalibutan, ang mga yara sa posisyon kag poder indi pirme amo ang labing kalipikado.

Indi isa ka problema sa moral para sa matuod nga mga Cristiano ang topiko nga ambisyon. Ginasikway nila ang ambisyon bangod sang ila konsiensia nga ginhanas sang Biblia. Ginapanikasugan nila nga himuon ang ila bug-os nga masarangan sa tanan nga kahimtangan, sa kahimayaan sang Dios, kag ginatugyan ang resulta sa iya. (1 Corinto 10:31) Ginahimo sang mga Cristiano ang ila masarangan paagi sa pagkahadlok sa Dios kag sa pagtuman sang iya mga sugo.

[Retrato sa pahina 22, 23]

Ginpalig-on bala sang Dios si Abraham nga mag-ambisyon?