Pagbantay sa Kalibutan

Ginapunggan sang Teknolohiya ang Paghambalanay

“Madamo nga Britaniko ang nagapangalag-ag nga makighambal sing atubangay bangod sang ila dugang nga pagsandig sa moderno nga teknolohiya,” report sang The Times sang London. Sa 1,000 ka adulto nga ginsurbe sang British Gas, nasapwan sini nga ang ordinaryo nga tawo nagahinguyang lamang sing kubos sa apat ka oras kada adlaw sa “paggamit sa teknolohiya nga una nga gintuyo sa paghatag sa mga tawo sing dugang nga tion agod makalingawlingaw.” Suno sa report, “ang kinaandan nga Britaniko nagahinguyang sing 88 minutos kada adlaw sa landline nga telepono, 62 minutos pa gid sa mobile nga telepono, 53 minutos sa pag-e-mail kag 22 minutos sa pag-text.” Ang surbe naghinakop nga nahalitan ang mga ikasarang sa pagkomunikar, subong sang paghambalanay sing atubangay. Madamo sadtong ginsurbe ang nag-ako nga naga-text sila “agod magpaalinton lamang sing mensahe ukon agod indi na maghambalanay.”

Mahapos nga Pagtigayon sing mga Droga

Sa Poland, ang mga droga para sa kalingawan mas mahapos matigayon sangsa serbesa, report sang Wprost nga magasin. “Matigayon ini sa tanan nga diskohan; sa mga klab, mga ilimnan, kag baratuhon nga mga dalayunan; kag sa mga eskwelahan sang kolehiyo kag hayskul.” Dugang pa, sa mas dalagku nga mga siudad, ang mga droga “sarang maorder paagi sa telepono kag mas madasig pa mag-abot sangsa pizza,” siling sang dyurnal. Ang kabaratuhon, kahapos tigayunon, kag ang katunayan nga ang “sintetiko nga mga droga ginatamod nga indi makahalalit,” siling sang Wprost, amo ang nagpahulag sa kapin sa katunga sang tanan nga mga tin-edyer nga Polaco nga tilawan ini “sa di-magkubos sing isa ka bes.” Suno kay Katarzyna Puławska-Popielarz, pangulo sang isa ka sentro para sa rehabilitasyon sang mga pamatan-on, ang madugay nga pag-abuso sa isa sining mga droga, ang speed, nagresulta sa “mga paghikog, atake sa tagipusuon, pagbuang, kag grabe nga pagniwang.”

Pagbalik sang Latin nga Misa

Sa Alemanya, “ang mga misa sa Latin nagabantog pa gid,” report sang magasin nga Focus. Ang mga pari sa “mga siudad subong sang Frankfurt, Düsseldorf, kag Münster nagbaton nga walay sapayan sang pagdiutay sang nagasimba, nagakapuno ang ila mga simbahan kon maggamit sila sing Latin,” siling sang magasin. Bangod sang pagbantog sang Latin nga Misa, sa baylo nga duha ka beses lamang sa isa ka bulan, ginhiwat sang isa ka simbahan sa Munich ang ila Misa nga nagagamit sing liturhiya sa Latin sing duha ka beses sa isa ka semana, pati na sa mga piesta opisyal.

Isa ka Siglo sang Inaway

“Ang pagpapas sang rasa isa ka rason kon ngaa ang ika-20 nga siglo amo ang labing madugo sa maragtas,” report sang Buenos Aires Herald. Ang pagpapas sang rasa nagakahulugan sing sistematiko kag ginplano nga pagdula sa bug-os nga pungsod, rasa, etniko nga grupo ukon sang politika,. Ginabulubanta nga kapin sa 41 milyones ka tawo ang ginpatay sang ika-20 nga siglo. Ang kasan-o lang nga halimbawa amo ang sa Rwanda, diin mga 800,000 ka tawo ang ginpamatay, nga ginhimo kalabanan sang “mga sibilyan nga ginsugyot sang propaganda sa dumot” sang 1994. Ang mga iskolar nagsiling nga sa sulod sang 100 ka adlaw, may promedyo nga mga 8,000 ka tawo ang ginapatay kada adlaw. Ini nga kadamuon “mas madasig sing lima ka pilo sangsa mga gas chamber nga gingamit sang mga Nazi sadtong Bug-os Kalibutan nga Inaway II,” siling sang Herald.