Ang Kueba sang mga Marmol

SUNO SA MANUNULAT SANG MAGMATA! SA MEXICO

NAGATINDOG sa minilyon ka nagahanig nga “marmol” sang kueba, isa ka Amerikano nga speleologist, ukon manuglagulad sang kueba, ang wala makapugong sa pagtuaw, “Salamat gid, Dios ko, nga ginhatagan mo ako sing kabuhi agod makita ini nga katingalahan!” Ginduaw niya ang Kueba Sang mga Marmol, isa ka kueba sa nabagatnan-sidlangan nga Mexico nga nagalaba sing 529 metros kag nagadalom sing 17 metros. Sa sulod, sarang makita sang isa ang tumalagsahon nga mga dagway sang bato. Sang nabalitaan namon ang tuhoy sa kueba, luyag namon nga mag-asawa nga makita ini.

Ang kueba yara sa isa ka pribado nga rantsuhan, gani maayo na lang kay nakilala namon ang asawa sang tag-iya. Samtang nagasulod kami sa ganhaan padulong sa pasilyo sang mga marmol, nakita namon ang mga 200 milyones nga mga calcite ball, ukon mga perlas sang kueba. Nagahanig ini sa salog sa kadamulon nga tubtob sa 12 sentimetros sa kalawigon nga mga 50 metros. Indi gid mapunggan sang isa nga indi maghakop sang mga perlas kag pabay-an ang mga magagmay gid​—⁠subong kagamay sang mga liso sang lentejas​—⁠nga maglusot sa iya mga tudlo. Ang pinakadaku sini daw diutay nga kahil. Kon wahigon ang mga marmol tubtob makita ang salog, masapwan sang mausisaon nga ginahuman ini sang natabon sing alalangay nga mga perlas.

Paano naporma ang mga perlas sa kueba? Mabaskog nga nagailig ang tubig pakadto sa mga linawlinaw. Ining pag-ilig nagapaasik sang calcite, nga nagaputos sa magamay nga butang, subong sang balas, mga tipik sang tul-an, ukon bisan gani sang mga straw sa ilimnon. Sa sining paagi, samtang amat-amat nga nagadamol ang calcite, nagaporma ang perlas.

Bisan pa nga ining kueba madugay na nga natukiban sang mga tumandok, sining karon lang ini naduaw sang mga espesyalista halin sa iban nga pungsod, nga nabalani sa kadamuon sang perlas sini. Sa karon, ginapanikasugan nga tun-an ining tumalagsahon nga kueba kag amligan ini.

Ang mga duog subong sang Kueba Sang mga Marmol nagapahanumdom sa aton sang mga pinamulong sang Salmo 111:2: “Ang mga binuhatan ni Jehova dalagku, ginapangita sang tanan nga nahamuot sa sini.”