“Dapat Basahon sang Tanan Ini nga Libro”

SUNO SA MANUNULAT SANG MAGMATA! SA POLAND

Sugod sang tingadlaw sang 2003, ang libro nga Magtuon Gikan sa Daku nga Manunudlo ginpanagtag sa madamo nga lenguahe sa mga kombension sa bug-os nga duta. Subong sa iban nga duog, ining matahom sing mga ilustrasyon nga libro tumalagsahon nga ginbaton sa Poland. Bisan pa nga gindesinyo ini ilabi na para sa mga kabataan, ginpakita sang mga sulat sang mga tin-edyer kag mga adulto nga naluyagan gid ini sang tanan. Yari ang pila ka kinutlo.

“Ako si Agata. Otso anyos ako. Sang matigayon ko ini nga libro, nabatyagan ko sa gilayon nga nabalaka gid si Jehova sa akon. Ang nanamian ko gid amo ang kapitulo 7, ‘Ang Pagkamatinumanon Nagaamlig sa Imo.’ Wala ko pirme ginatuman ang akon mga ginikanan, apang nagbag-o na ako karon bangod nabal-an ko nga palangga gali ni Jehova ang matinumanon nga mga kabataan.”

Si Marlena, 13-anyos, nagsulat sing pagdayaw: “Nahibaluan ko nga ining publikasyon para sa mga bata, apang sa banta ko para ini sa tanan. Nagbakod ang akon pagtuo kay Jehova kag kay Jesus sang mabasa ko ini. Bisan ang mga butang nga mabudlay mahangpan ginpaathag sing simple. Indi ko mauntatan ang pagbasa. Kag katahom gid sang mga laragway! Ang kaupod nga mga pamangkot magawili gid sa mga lamharon! Kanami gid sang libro, gani ginabasa ko ini sing maayo. Madamo gid nga salamat.”

Si Justyna, 15-anyos, nagsiling kon daw ano kanami sang libro: “Nanamian gid ako sa mga kapitulo nga nabasa ko amo nga luyag ko gid magpasalamat sing tinagipusuon sa inyo tungod sining matahom kag impormatibo nga dulot. Sa banta ko, ini nga libro dapat basahon sang tanan​—⁠bisan sang mga tigulang. Ang mga halimbawa diri simple lamang kag madali mahangpan bisan sang isa ka tuig nga bata. Kag ang mga retrato makatudlo gid. Imposible gid nga ipabutyag sa mga tinaga ang akon nabatyagan kon ginabasa ko ini nga libro.”

Si Eunika nagpasalamat man tungod sini nga publikasyon. Bisan 19-anyos na sia, malangkagon niya nga ginbasa ang bag-o nga libro kag nagsiling sia nga nasapwan niya ini nga “praktikal para sa mga tin-edyer.” Nagsulat man sia: “May maayo ini nga laygay para sa matag-adlaw nga pagkabuhi​—⁠sa puluy-an, sa eskwelahan, kag sa kongregasyon. Salamat gid tungod sini nga dulot.”

Bangod nakita ni Maria, nga isa ka malipayon nga iloy sang isa ka tuig nga si Oliwia, ang reaksion sang iya bata sa maduagon nga mga retrato, sia nagsiling: “Luyag ko kamo pasalamatan gikan sa alibutod sang akon tagipusuon sa sining pinasahi nga bulig sa pagtudlo sa kabataan. Nawili gid si Oliwia sa libro. Nagapasabak sia sa amon kag luyag niya nga istoryahan namon sia kon ano ini ukon ano ina nga kapitulo. Naluyagan gid niya ang retrato sa pahina 83, diin nagahaksanay ang duha ka bata nga babayi nga magkatuhay ang rasa. Ang iban nga mga retrato daw tuodtuod gid amo nga iya ini ginatandog, ginahakos, kag ginayuhuman.”

Ginpadaku man ni Maria ang edukasyunal nga balor sang libro sa pagtudlo: “Ginabinagbinag sini ang serioso nga mga problema subong sang pagpakighirop (pahina 58-60) kag pag-abuso sa bata (pahina 170-1). Daku ini nga bulig sa mga ginikanan nga luyag padakuon ang ila kabataan sing maalamon sa malaut nga kalibutan karon nga puno sang katalagman.”

Ginalauman sang mga manugbalhag sang Magtuon Gikan sa Daku nga Manunudlo nga makabulig man ang libro sa imo kag sa imo kabataan agod makabenepisyo gikan sa mga panudlo nga ginhatag sa katawhan sing halos 2,000 ka tuig na sang Daku nga Manunudlo, si Jesucristo.

[Retrato sa pahina 31]

Si Agata

[Retrato sa pahina 31]

Si Marlena

[Retrato sa pahina 31]

Si Eunika

[Retrato sa pahina 31]

Sanday Maria kag Oliwia

[Retrato sa pahina 31]

Si Justyna