Ang Pagtamod sang Biblia

Paano Naton Dapat Pakig-angutan ang mga Tigulang?

SANG tingadlaw sang 2003, linibo ang napatay sa bug-os nga Europa bangod sang isa sa pinakamainit nga panahon nga natabo sa Kontinente sa sulod sang 60 ka tuig. Ang kalabanan nga napatay mga tigulang. Ang iban ginbayaan nga nagaisahanon sang mga paryente nga nagbakasyon. Ang iban naman ginreport nga ginpabay-an ukon ginpatumbayaan sang kapoy na nga mga empleyado sang ospital kag balay-alatipanan. Ginreport sang pamantalaan nga Le Parisien nga sa Paris lamang, 450 ka bangkay ang wala ginkuha sang mga paryente. “Sa ano nga kahimtangan kita nagakabuhi amo nga nalimtan na naton ang aton mga amay, iloy, lolo kag lola?” pamangkot sang pamantalaan tuhoy sa kahimtangan sang mga napatay nga nagaisahanon kag wala makilala.

Sa bug-os nga kalibutan, karon pa lang natabo nga ang kadamuon sang tawo nga kapin sa 65 anyos nagadugang sing 795,000 kada bulan, gani ang pag-atipan sa mga kinahanglanon sang mga tigulang isa sa pinakadaku nga ginakabalak-an karon. “Ang kadamuon sang mga tigulang sa bug-os nga kalibutan nagadugang sa kadasigon nga wala pa gid anay matabo kag kinahanglan talupangdon naton kon ano ang reaksion sang mga pungsod sa mga problema kag oportunidad sang pagtigulang,” siling ni Nancy Gordon, kaupod nga direktor sang mga programa may kaangtanan sa populasyon sang U.⁠S. Census Bureau.

Interesado man ang aton Manunuga sa mga tigulang. Sa katunayan, ang iya Pulong, ang Biblia, nagahatag sa aton sing panuytoy kon paano sila dapat pakig-angutan.

Pagtahod sa mga Tigulang

Ang Kasuguan sang Dios, nga ginhatag kay Moises, nagpalig-on sang pagtahod sa mga tigulang. Ang Kasuguan nagsiling: “Magtindog ka sa atubangan sang ulo nga ubanon, kag magpakita ka sing patugsiling sa pagkatawo sang tigulang nga tawo.” (Levitico 19:32) Ang matinumanon nga mga sumilimba sang Dios ginapaabot nga “magtindog” sa atubangan sang tigulang (1) subong tanda sang pagtahod sa mga tigulang kag (2) subong pamatuod sang masimbahon nga kahadlok sa Dios sang mga sumilimba. Sa amo, ang mga tigulang dapat padunggan kag dapat kabigon nga mapuslanon gid.​​—⁠⁠Hulubaton 16:31; 23:22.

Bisan pa ang mga Cristiano karon wala na sa idalom sang Mosaikong Kasuguan, ginapakita sang mga prinsipio sini ang panghunahuna kag mga prioridad ni Jehova, nga ginapabaloran kag ginaulikdan niya ang mga tigulang. Ini nga mga prinsipio nahangpan sang mga katapo sang unang-siglo nga Cristianong kongregasyon. Ang una nga pamatuod sini ginrekord sa tulun-an nga Binuhatan sa Biblia. Nalakip sa mga Cristiano sa Jerusalem sadto amo ang kubos nga mga balo nga babayi. Wala sing duhaduha nga madamo sa ila ang mga tigulang. Ang mga apostoles nagtangdo sing pito ka “lalaki nga may pamatuod” agod mapat-od nga ining mga babayi makabaton sing matag-adlaw nga rasyon sang pagkaon sa mahim-ong nga paagi, nga ginakabig ining pinasahi nga pag-atipan subong “kinahanglanon nga buluhaton” sang kongregasyon.​​—⁠⁠Binuhatan 6:1-7.

Gin-aplikar ni apostol Pablo ang prinsipio nga ‘magtindog sa atubangan sang ulo nga ubanon’ sa Cristianong kongregasyon. Ginsilingan niya ang pamatan-on nga Cristianong manugtatap nga si Timoteo: “Indi pagmulaya ang isa ka tigulang nga lalaki. Sa baylo, pakig-anguti sia subong isa ka amay, . . . ang tigulang nga mga babayi subong mga iloy.” (1 Timoteo 5:​1, 2) Bisan pa may awtoridad ang pamatan-on  nga si Timoteo sa tigulang nga mga Cristiano, ginsilingan sia nga indi niya pagpakanubuon ang isa ka tigulang nga lalaki. Sa baylo, pakig-angutan niya sia sing matinahuron subong isa ka amay. Kag dapat man niya padunggan ang tigulang nga mga babayi sa kongregasyon. Ang matuod, ginlaygayan ni apostol Pablo si Timoteo​​—⁠⁠kag sa pagpasangkad, ang tanan nga katapo sang Cristianong kongregasyon​​—⁠⁠nga ‘magtindog sa atubangan sang ulo nga ubanon.’

Sa pagkamatuod, indi na kinahanglan sang diosnon nga mga tawo ang layi agod pakig-angutan ang mga tigulang nga may dignidad kag pagtahod. Binagbinaga ang halimbawa ni Jose sa Biblia, nga handa manikasog kag maggasto agod madala ang iya tigulang na nga amay sa Egipto, sa amo ginluwas ang 130-anyos nga si Jacob gikan sa lapnag nga tiggulutom. Sang una niya nga nakita ang iya amay pagligad sang kapin sa duha ka dekada, si Jose ‘nagsubsob sa iya liog kag naghibi sa iya liog sing sulitsulit.’ (Genesis 46:29) Madugay pa antes ang pagpakig-angot sa mga tigulang nga may kaawa kag daku nga pagtahod nangin kasuguan sa mga Israelinhon, ginpakita ni Jose ang pagtamod sang Dios paagi sa paghimo sini.

Sa tion sang iya ministeryo ginpakita ni Jesus mismo ang pagkabalaka sa mga tigulang. Matigdas nga ginpakamalaut niya ang relihioso nga mga lider nga nagpakamatarong sang ila pagpatumbaya sa ila tigulang nga mga ginikanan tungod sang ila relihioso nga mga tradisyon. (Mateo 15:3-9) Mahigugmaon man nga gin-atipan ni Jesus ang iya iloy. Samtang nagaantos sing tuman nga kasakit sa usok sang pag-antos, ginpat-od niya nga ang iya nagatigulang nga iloy atipanon sang iya pinalangga nga apostol nga si Juan.​​—⁠⁠Juan 19:​26, 27.

Wala Ginapabay-an sang Dios ang mga Matutom sa Iya

Ang salmista nangamuyo: “Dili ako pagsikwaya sa tion sang katigulangon; dili ako pagbayai kon magluya na ang akon kusog.” (Salmo 71:9) Wala ‘ginasikway’ sang Dios ang iya matutom nga mga alagad bisan pa ginabatyag nila nga indi na sila mapuslanon. Wala ginbatyag sang salmista nga ginpabay-an sia ni Jehova; sa baylo, ginkilala niya ang iya pagkinahanglan nga magsandig sa iya Manunuga ilabi na samtang nagatigulang sia. Ginabalusan ni Jehova ini nga katutom paagi sa pagsakdag sa isa sa bug-os niya nga pagkabuhi. (Salmo 18:25) Sa masami ini nga pagsakdag mabaton paagi sa mga masigka-Cristiano.

Bangod sini, maathag nga ang tanan nga luyag magpadungog sa Dios dapat magpadungog man sa mga tigulang. Ang mga tigulang hamili gid sa aton Manunuga. Sanglit ginhimo kita sa iya larawan, kabay nga ipakita naton pirme ang diosnon nga pagtamod sa ‘pagkaubanon.’​​—⁠⁠Salmo 71:18.

[Retrato sa pahina 23]

Ginapadunggan kag ginatahod sang mga Cristiano ang mga tigulang