Magdiretso sa kaundan

Magdiretso sa listahan sang kaundan

Maayo nga Samaritano Karon

Maayo nga Samaritano Karon

 Maayo nga Samaritano Karon

SUNO SA MANUNULAT SANG MAGMATA! SA MEXICO

Madamo sa aton ang nakabati na sang sugilanon sa Biblia tuhoy sa isa ka mainabyanon nga tawo nga masami ginatawag nga Maayo nga Samaritano. (Lucas 10:29-37) Sa sini nga sugilanon ginsugid ni Jesucristo ang pagpakabudlay gid sang isa ka Samaritano agod ipakita ang gugma sa iya isigkatawo nga nagakinahanglan. May mga tawo pa ayhan karon nga kaangay sining maayo nga Samaritano? Binagbinaga ang masunod nga hitabo sa Mexico.

Sa ila pagbiyahe pauli, mga pila pa ka kilometro ang ila balay sang nakita ni Betuel kag sang iya pamilya ang isa ka grabe nga aksidente sa haywey. Nagdulog sila agod magbulig. Ang isa sa mga drayber nga naaksidente, nga isa ka doktor, nagpangabay sa ila nga ipabulong sa ospital ang iya asawa nga nagabusong kag ang iya duha ka gamay nga bata nga babayi. Ginhimo nila ini, kag pagkatapos nagbalik si Betuel sa duog nga naaksidentehan agod tan-awon kon may mabulig pa sia.

Si Betuel nag-asoy: “Nag-abot ang patrol sa haywey, apang ginhawiran pa ang doktor agod imbestigahon bangod may napatay sa aksidente. Sang ginpamangkot ako sang doktor kon ngaa ginabuligan ko sia, ginpaathag ko nga mga Saksi ni Jehova kami kag natun-an namon sa Biblia nga dapat namon higugmaon ang amon isigkatawo. Ginsilingan ko sia nga indi sia magkabalaka sa iya asawa kag kabataan, kay atipanon namon sila. Nagpasalamat sia nga nagalumawlumaw ang iya mga mata, kag pagkatapos ginpatago niya sa akon ang iya mga alahas.”

Ginsapupo anay nanday Betuel kag sang iya pamilya ang pamilya sang doktor sing pila ka adlaw. Gingamit ni Betuel ang kahigayunan nga tudluan sila sa Biblia. Sang ginbuy-an na ang doktor, ginpasalamatan niya kag gindayaw ang mga Saksi ni Jehova. Nangako sia nga padayunon ang pagtuon sa Biblia sa iya banwa, kag nagsiling sia nga kon lalaki ang ila mangin bata, Betuel ang ipangalan niya sa iya. Si Betuel nagsiling pa: “Pagligad sang duha ka tuig, ginduaw namon sila. Nakibot gid ako kay nagatuon na sila sa Biblia, kag Betuel matuod ang ngalan sang ila gamay nga bata nga lalaki!”

[Retrato sa pahina 30]

Si Betuel