Luyag Mo Bala Tilawan ang Bulak sang Kalabasa?

SUNO SA MANUNULAT SANG MAGMATA! SA MEXICO

KON mamulak ang kalabasa, daw kabulakan ang talamnan sang mga utan. Ang matahom nga dalag nga bulak​​—⁠⁠nga may elegante apang simple nga desinyo​​—⁠⁠wala sing humot, apang manamit ini. Ginakaon gid bala sang mga tawo ang mga bulak? Huo. Ang matuod, suno sa magasin nga Cuadernos de Nutrición, ang Mexico kuno amo ang pungsod nga may pinakadamo nga resipe diin nalakip sa ingrediente ang mga bulak.

Madugay na nga ginakaon sa Mexico ang bulak sang kalabasa. Sa madamo nga sahi sang kalabasa, ayhan ang bulak sang zucchini amo ang pirme ginalakot sa pagkaon. Apang dapat siguraduhon nga laki lamang nga mga bulak ang utanon kon luyag man naton magkaon sing kalabasa. Tan-awon lang naton ang pungango. Kon may putot nga kalabasa sa sini, buot silingon bayi ini nga bulak kag indi ini dapat puksion.

Ang sabor sang bulak sang kalabasa nagapanamit sa madamo nga linuto. Sa masami, ginagisa ang ahos kag sibuyas kag ayhan diutay nga katumbal. Kon natimpla na ini kag mahumok na ang ahos, ginalunod naton ang nahugasan kag gin-utod-utod nga mga bulak nga ginpanguhaan sing pungango. Takloban dayon ini kag pasurusuruan sa sulod sang pila ka minuto. Mahimo man ilakot sa mga bulak ang nakihadkihad nga kalabasa, mais, diutay nga mantikilya, kag rekado. Ginabutang ini sa tortilla kag ginatakop. Ginaprito dayon ini sa kalaha, kag mangin manamit nga quesadilla nga bulak sang kalabasa.

Indi lamang manamit ang quesadilla kundi masustansia man, kay ang bulak sang kalabasa may diutay nga protina, calcium, iron, thiamine, niacin, ascorbic acid, kag retinol.

Makahimo man kita sing manamit nga sabaw sa sini nga bulak. Sundon lang naton ang ginsambit nga pagluto kaina, dugangan ini sang kaldo sang manok kag iserbe samtang mainit pa. Puede naton ini laktan sing keso kag pinirito nga tortilla strips.

Madamong iban pa nga linuto ang malaktan sining mapuslanon nga bulak. Tilawi bala nga magluto sing bulak sang kalabasa. Manamitan gid ikaw sa sini!