Accessibility setting

Magpili sing lenguahe

Magdiretso sa segundaryo nga menu

Magdiretso sa kaundan

Mga Saksi ni Jehova

Hiligaynon

MAGMATA! ENERO 2004

 Ang Pagtamod sang Biblia

Mapaluntad Bala sang Diplomasya ang Paghidait sa Bug-os nga Kalibutan?

Mapaluntad Bala sang Diplomasya ang Paghidait sa Bug-os nga Kalibutan?

LUYAG mo bala nga madula na ang tanan nga inaway? Siguro may yara gid pila ka diplomatiko nga solusyon sa pungsudnon kag internasyonal nga mga kinagamo. Madamo ang nagapati nga kon magbinuligay lang ang mga lider sang kalibutan, madula na ang inaway. Apang, mahimo nga nalugaw-an ka sa mga resulta sang diplomasya. Sa sulod sang mga siglo ang mga diplomatiko nagratipikar sing mga kasugtanan, naghimo sang mga resolusyon, kag naghiwat sang mga komperensia, apang pila lang ka problema ang permanente nga nasolbar.

Madamo ang masiling sang Biblia tuhoy sa diplomasya kag paghidait. Ginasabat sini ang masunod nga mga pamangkot: Ano nga mga butang ang nagaupang karon agod mapaluntad sang diplomasya ang paghidait? Dapat bala makigbahin ang mga Cristiano sa diplomasya? Paano mapaluntad ang matuod nga paghidait?

Ano ang Nagaupang sa Paghidait?

Madamo nga kasaysayan sa Biblia ang nagailustrar kon paano ang personal nga paghambalanay nagaresulta  sa paghidait. Halimbawa, malantipon nga nakumbinsi ni Abigail si David kag ang iya mga soldado nga indi magtimalos sa iya panimalay. (1 Samuel 25:18-35) Si Jesus naghatag sang ilustrasyon tuhoy sa isa ka hari nga wala na sing rasonable pa nga mahimo sa isa ka mabudlay nga sitwasyon kundi ang magpadala sang mga embahador agod magpakighidait. (Lucas 14:31, 32) Huo, ang Biblia nagakilala nga ang pila ka porma sang diplomasya makasolbar sang mga kinagamo. Ngaa, kon amo, nga may limitado lang nga kadalag-an ang mga negosasyon sa paghidait?

Sibu nga gintagna sang Biblia nga mangin magamo ang aton panahon. Bangod sang malauton nga impluwensia ni Satanas nga Yawa, ang mga tawo mangin “di-malugpayan [indi tampad sa bisan anong kasugtanan, NW], . . . mabangis, madumot sa kaayuhan, maluib, dasudaso, nagahabok sa pagpadayaw.” (2 Timoteo 3:3, 4; Bugna 12:12) Dugang pa, gintagna ni Jesus nga ang palatandaan sang konklusion sang karon nga sistema sang mga butang amo ang “mga inaway kag mga kinunokuno sang mga inaway.” (Marcos 13:7, 8) Sin-o ang makapanghiwala sa paglapnag pa gid sini? Bangod sini, makatilingala bala kon ang mga pagtinguha nga magmahidaiton ang mga pungsod masami nga di-madinalag-on?

Binagbinaga man ini: Samtang ang mga diplomatiko mahimo magtinguha gid nga likawan ang mga inaway, ang panguna nga katuyuan sang kada isa amo nga unahon ang intereses sang iya pungsod. Amo ini ang pinakaimportante nga katuyuan sang politikal nga diplomasya. Dapat bala makigbahin ang mga Cristiano sa sini?

Walay sapayan sang ila mga motibo, ang mga diplomatiko sang kalibutan wala sing ikasarang ukon gahom sa paghatag sing permanente nga mga solusyon

Ang mga Cristiano kag ang Diplomasya

Ang Biblia nagalaygay: “Dili kamo magsalig sa mga prinsipe, ukon sa anak sang tawo, nga sa iya wala sing bulig.” (Salmo 146:3) Ini nagakahulugan nga walay sapayan sang ila mga motibo, ang mga diplomatiko sang kalibutan wala sing ikasarang ukon gahom sa paghatag sing permanente nga mga solusyon.

Sang ginbista si Jesus sa atubangan ni Poncio Pilato, sia nagsiling: “Ang akon ginharian indi iya sining kalibutan. Kon ang akon ginharian iya sining kalibutan, ang akon mga alagad makig-away kuntani, agod indi ako ikatugyan sa mga Judiyo. Apang ang akon ginharian indi gikan sa kalibutan.” (Juan 18:36) Ang mga estratehiya agod mapaluntad ang paghidait masami nga naimpluwensiahan sang nasyonalistiko nga dumot kag politikal nga kakagod. Gani, ginalikawan sang matuod nga mga Cristiano ang pagpakigbahin sa mga kinagamo sang kalibutan kag sa mga diplomatiko nga pagpaninguha sini.

Nagakahulugan bala ini nga ang mga Cristiano wala nagasapak ukon indi interesado sa mga hitabo sa kalibutan? Kabalan bala sila sa pag-antos sang mga tawo? Indi. Sa kabaliskaran, ginalaragway sang Biblia ang matuod nga mga sumilimba sang Dios subong mga indibiduwal nga “nagapanghayhay kag nagabakho” sa malain nga mga butang nga nagakatabo sa ila palibot. (Ezequiel 9:4) Nagasalig lamang ang mga Cristiano nga paluntaron sang Dios ang paghidait subong sang iya ginsaad. Ang paghidait bala para sa imo nagakahulugan nga wala na sing inaway? Ang mga inaway dulaon gid sang Ginharian sang Dios. (Salmo 46:8, 9) Apang dugang pa, paluntaron gid sini ang bug-os nga kalig-unan kag kaayuhan sang tanan nga pumuluyo sa duta. (Miqueas 4:3, 4; Bugna 21:3, 4) Ining superyor nga paghidait indi gid maagom paagi sa diplomasya ukon sa pagpaninguha sang “nagaamlig-paghidait” nga mga organisasyon sang tawo.

Maathag nga ginapakita sang tagna sa Biblia kag sang nagligad nga eksperiensia nga ang pagsalig sa tawhanon nga diplomasya sa pagdala sing paghidait mapaslawan lamang. Makita sang mga nagalaum kay Jesucristo kag nagasuportar sa Ginharian sang Dios ang katumanan sang ila handum para sa matuod nga paghidait. Subong man, maagom nila ini tubtob sa walay katubtuban!Salmo 37:11, 29.