Ang Pagtamod sang Biblia

Paano Mo Mapamatukan ang Malain nga mga Handum?

“Kon luyag ko maghimo sing husto, ang malain yari sa akon.”​—⁠ROMA 7:21.

AYHAN sing kapin pa sangsa iban nga mga apostoles, nagpangabudlay gid sing lakas si Pablo agod palig-unon ang iban nga sundon ang mataas nga mga prinsipio sang Cristianismo. (1 Corinto 15:​9, 10) Apang, tampad niya nga ginbaton ang ginsambit sa ibabaw. Naeksperiensiahan niya ang padayon nga pagsumpakilay sang iya hunahuna kag sang iya malain nga mga handum. Nabatyagan mo man bala ang ginbatyag ni apostol Pablo? Sa pagkamatuod, subong di-himpit nga mga tinuga, sin-o sa aton ang wala makaeksperiensia sini nga pagsumpakilay?

Para sa madamo, ang pagpakigbato nga malandas ang malain nga mga handum mabaskog gid. Ang iban nagapakigbato sa mga handum sa pagpaayaw sa seksuwal nga imoralidad. Ang iban nagiyan sa sugal, tabako, ginadumilian nga mga droga, ukon alkohol. Kon nagahandum kita sing makahalalit kag indi maayo nga mga handum, paano naton ini mapamatukan? Ano nga bulig ang matigayon? Madula pa ayhan ang pagpakigbato sa malain nga mga handum?

Gugma​​—⁠Ang Yabi sa Pagpamatok sa Malain nga mga Handum

Ginpatalupangod ni Jesus ang duha ka pinakadaku nga sugo sa Mosaikong Kasuguan. Ang una amo sini: “Higugmaa si Jehova nga imo Dios sa bug-os mo nga tagipusuon kag sa bug-os mo nga kalag kag sa bug-os mo nga hunahuna.” (Mateo 22:37) Kon ginahigugma naton ang Dios suno sa ginsiling ni Jesus nga himuon naton, indi bala nga ang pagpahamuot sa Iya amo dapat ang aton labing daku nga handum? Kon amo, ining matarong nga handum makabulig  sa aton sa pagpakig-away bisan sa labing mabaskog nga malain nga mga handum! Indi ini sugidsugid lamang. Minilyon ka Cristiano ang madinalag-on nga napamatukan ang malain nga mga handum kada adlaw. Paano mo mapalambo ining mabakod nga kaangtanan sa Dios? Paagi sa mainapresyahon nga pagpamalandong sa iya pagkaayo nga makita sa iya mga tinuga, sa Biblia, kag sa iya mga pagpakig-angot sa aton subong indibiduwal.​—⁠Salmo 116:​12, 14; 119:​7, 9; Roma 1:⁠20.

Ang ikaduha nga pinakadaku nga sugo nga ginsambit ni Jesus amo: “Higugmaa ang imo isigkatawo subong sang imo kaugalingon.” (Mateo 22:39) Si apostol Pablo nagsiling nga ang gugma “wala nagagawi sing di-nagakaigo” kag “wala nagapangita sang kaugalingon nga kaayuhan.” Sa amo, ining di-makagod nga gugma nagabulig sa aton nga likawan ang bisan ano nga paggawi nga mahimo maghalit sa iban. (1 Corinto 13:4-8) Paano ini mapalambo? Paagi sa pagbutang sang aton kaugalingon sa lugar sang iban kag sinsero nga ginakabalak-an ang ila balatyagon kag dayon nga kaayuhan.​—⁠Filipos 2:4.

Ano nga Bulig ang Matigayon?

Bangod nahangpan sang Dios kon daw ano kabudlay sa aton nga himuon ang maayo, naghatag sia sing bulig sa pila ka paagi. Paagi sa iya nasulat nga Pulong, ang Biblia, ginatudluan niya kita nga dumtan ang malain kag palambuon ang pagtahod sa iya. (Salmo 86:11; 97:10) Ang Biblia nagaunod sing matuod nga mga kasaysayan sang kabuhi nga nagapakita sing malaglagon nga resulta sang pagpadala sa malain nga mga handum. Dugang pa, si Jesus nagsiling nga kon pangayuon naton ini, hatagan kita sang Dios sang Iya balaan nga espiritu, ang pinakamabaskog nga puersa sa uniberso. (Lucas 11:13) Makapabakod ini sang aton pamat-od nga himuon ang matarong. Ang isa pa ka aman amo ang pagsakdag kag pagpalig-on nga mabaton naton gikan sa iban nga mga Cristiano nga nagapamatok man sa malain nga mga handum. (Hebreo 10:​24, 25) Kon ginabuslan sining positibo nga mga impluwensia ang mga negatibo, mabuligan kita sa aton pagpanikasog nga himuon ang matarong. (Filipos 4:8) Epektibo gid bala ini nga paagi?

Binagbinaga si Fidel, nga kilala sa ila lugar subong isa ka palahubog. Nagapanabako sia, nagasugal, kag nagapakig-away sa iban kon mahubog. Ang iya pagtuon sa Biblia kag pagpakig-upod sa mga Saksi ni Jehova nagbulig sa iya nga malandas yadtong mga buhat. Mas maayo na karon ang iya pagkabuhi upod sa iya asawa kag duha ka anak.

Ang isa mahimo mamangkot, ‘Ano abi kon maglukmat ang akon malain nga mga buhat?’ Ginpatuhuyan ni apostol Juan ini nga posibilidad. Sia nagsulat: “Mga hinigugma ko, ginasulat ko sa inyo ining mga butang agod indi kamo makahimo sing sala. Apang, kon ang bisan sin-o makahimo sing sala, may mananabang kita upod sa Amay, si Jesucristo, isa nga matarong. Kag sia ang nagatumbas nga halad para sa aton mga sala, apang indi lamang para sa aton kundi para man sa bug-os nga kalibutan.” (1 Juan 2:​1, 2) Huo, ang halad ni Jesus nagatabon sa mga sayop sang isa ka tawo nga nagahinulsol kag sinsero nga nagatinguha nga magbag-o agod pahamut-an ang Dios. Bangod sini nga aman, ano pa ang makatarunganon nga marason sang isa nga mag-untat sa pagpakig-away sa paghimo sing matarong?

Malandas ang Malain nga mga Handum

Kon palambuon naton ang aton gugma sa Dios kag sa isigkatawo kag panginpuslan ang bulig sang Dios, mangin madinalag-on kita bisan karon sa aton pagpakig-away batok sa malain nga mga handum. Dugang pa, ang Pulong sang Dios nagapasalig sa aton nga ini nga pagpakigbato indi magpadayon tubtob san-o. Sa malapit nga palaabuton, ang mga nagapanginpulos sa espirituwal nga mga aman sang Dios bug-os nga ayuhon, sa pisikal kag sa espirituwal. (Bugna 21:​3-5; 22:​1, 2) Hilwayon sila gikan sa sala kag sa kamatayon nga ginatuga sini. (Roma 6:23) Sa pihak nga bahin, ang mga determinado sa pagtuman sang ila indi maayo kag makahalalit nga mga handum indi makaagom sining mga pagpakamaayo.​—⁠Bugna 22:15.

Makalulugpay gid mahibaluan nga indi kita magpakigbato sa malain nga mga handum tubtob san-o. Dulaon ini sing bug-os kag sing permanente. Isa gid ini ka kaumpawan!