Pamangkot sang mga Pamatan-on . . .

Paano Ako Makahalin sa Landong sang Akon Magulang?

“Luyag ko nga mangin tuhay, apang nabatyagan ko pirme nga dapat mangin pareho man ako sa akon mga magulang nga babayi. Sa banta ko indi ko gid mailog ang ila mga hinimuan.”​​—⁠Clare.

MAY magulang ka bala nga daw madinalag-on sa halos tanan nga butang? Pirme ka bala ginahambalan sang imo mga ginikanan nga ilugon ining imo magulang? Kon amo, mahimo kabalak-an mo nga mangin yara ka lang pirme sa iya landong​​—⁠nga ang imo balor pirme takson sa kon daw ano ka madinalag-on nga mailog mo ang mga hinimuan sang imo magulang.

Ang mga magulang nga lalaki ni Barry⁠ * lunsay gradwado sa ginatahod gid nga Ministerial Training School⁠ * kag kilala subong maayo gid nga mga Cristiano. Si Barry nagsiling: “Naapektuhan ang akon kompiansa sa kaugalingon, bangod sa banta ko indi ko gid mailog ang ila ikasarang sa pagbantala ukon indi ako mangin subong nila ka sampaton nga manugpamulongpulong. Nabudlayan ako mangita sang akon mismo mga abyan bangod nagatabidtabid lang ako sa akon mga magulang kon may kadtuan sila. Sa pamatyag ko nagapakig-abyan lang sa akon ang mga tawo bangod sa akon mga magulang.”

Mabudlay nga indi ka mahisa kon may utod ka nga pirme lang ginadayaw. Sang panahon sang Biblia, ang lamharon nga si Jose nangin talalupangdon gid sa tunga sang iya mga utod nga lalaki. Ano ang epekto sa iya mga magulang? “Gindumtan nila sia, kag indi sila makapakighambal sa iya sing mahidaiton.” (Genesis 37:​1-4) Siempre, si Jose maugdang. Apang basi pukawon sang imo utod ang pagkompetensiahanay ukon kahisa paagi sa pirme nga pagpadayawdayaw sa imo sang iya mga hinimuan.

Pagrebelde ang reaksion sang pila ka pamatan-on sa sini tanan​​—⁠ayhan hungod nga ginapanubo ang ila mga grado, ginabuhinan ang ila partisipasyon sa Cristianong mga hilikuton, ukon nagagawi sing di-nagakaigo. Ayhan nagapanghunahuna sila nga kon indi nila matupungan ang ila magulang, mas maayo nga indi na lang sila magtinguha. Apang sa ulihi, mahalitan ka lamang sang pagrebelde. Paano ka makahalin sa landong sang imo magulang sa paagi nga indi mahalitan ang imo respeto sa kaugalingon ?

 Indi Sila Pag-ibutang sa Pedestal

Bangod nakita mo ang tanan nga atension nga ginaagom sang imo magulang, mahimo patihan mo nga perpekto sia kag indi mo gid mailog. Apang matuod gid bala ina? Prangka nga nagasiling ang Biblia: “Ang tanan nagpakasala kag nakulangan sing himaya sang Dios.”​​—⁠Roma 3:⁠23.

Huo, bisan ano pa ang mga abilidad ukon mga talento sang aton mga magulang, sila gihapon ‘mga tawo nga may mga kaluyahon’ kaangay man naton. (Binuhatan 14:15) Wala sing rason nga ibutang sila sa pedestal ukon idolohon sila. Ang lamang nga tawo nga nagpahamtang sing perpekto nga halimbawa sa aton amo si Jesucristo.​​—⁠1 Pedro 2:⁠21.

Magtuon sa Ila!

Masunod, tilawi nga kabigon ang imo sitwasyon subong oportunidad nga makatuon sing pila ka butang. Binagbinaga, halimbawa, ang mga manghod ni Jesucristo. (Mateo 13:​55, 56) Hunahunaa kon ano kuntani ang matun-an nila gikan sa ila perpekto nga magulang! Apang, “sa katunayan, ang iya mga utod wala nagtuo sa iya.” (Juan 7:5) Ayhan ang bugal kag ang kahisa nag-upang sa ila pagtuo. Ang espirituwal nga mga kauturan ni Jesus​​—⁠ang iya mga disipulo​​—⁠amo ang nagbaton sa iya maalwan nga pangagda: “Magtuon kamo sa akon.” (Mateo 11:29) Naapresyar gid man sang ulihi si Jesus sang iya undanon nga mga utod sang sa tapos na sia mabanhaw. (Binuhatan 1:14) Amo kon ngaa, madamo sila sing nawasi nga malahalon nga oportunidad agod makatuon kuntani gikan sa ila tumalagsahon nga magulang.

Amo man ini ang sayop ni Cain. Si Abel, nga iya manghod, talalupangdon nga alagad sang Dios. Ang Biblia nagasiling nga “gintan-aw ni Jehova nga may kahamuot si Abel kag ang iya halad.” (Genesis 4:4) Apang, sa pila ka rason, “wala niya gintan-aw nga may bisan ano nga kahamuot si Cain kag ang iya halad.” Kuntani nagpakita si Cain sing pagkamapainubuson kag nagtuon sa iya utod. Sa baylo, “si Cain nagsingkal sing tuman” kag ginpatay niya si Abel.​​—⁠Genesis 4:​5-8.

Pat-od nga indi ka maugot sing subong sini sa imo utod. Apang madula mo man ang hamili nga mga oportunidad kon tugutan mo nga punggan ka sang bugal kag kahisa. Kon ang imo magulang maabtik sa matematika, maalam sa maragtas, eksperto sa paborito mo nga isport, may talalupangdon nga ihibalo sa Kasulatan, ukon maayo maghambal sa publiko, batui ang kahisa! Bangod “ang kahisa amo ang pagkagabok sang mga tul-an” kag makahalit lang sa imo. (Hulubaton 14:30; 27:4) Sa baylo nga maugot, tinguhai nga magtuon gikan sa imo utod. Batuna ang kamatuoran nga may mga abilidad kag mga talento sia nga wala sa imo. Obserbahi ang imo magulang​​—⁠ukon, mas maayo pa, magpatudlo sa iya.

 Si Barry, nga nahinambitan kaina, nakabenepisyo gikan sa maayo nga mga halimbawa nga ginpahamtang sang iya mga magulang. Sia nagsiling: “Nakita ko kon daw ano ka malipayon ang akon mga magulang bangod handa sila magbulig sa mga tawo sa kongregasyon kag sa pagbantala nga hilikuton. Gani namat-od ako nga sundon ang halimbawa sang akon mga magulang, kag nagtrabaho ako sa konstruksion sing mga Kingdom Hall kag mga pasilidad sang Bethel. Ang eksperiensia naghatag sa akon sing kompiansa sa kaugalingon kag nagbulig sa akon nga mag-uswag sa akon kaangtanan kay Jehova.”

Tukiba ang Imo mga Abilidad

Ayhan nahangawa ka nga basi madula mo ang imo pagkaindibiduwal kon sundon mo ang maayo nga mga kinaiya sang imo magulang. Apang indi ini matabo. Si apostol Pablo nagpalig-on sa unang siglo nga mga Cristiano: “Mangin manug-ilog ko kamo.” (1 Corinto 4:16) Nagakahulugan bala ini nga luyag ni Pablo nga madula nila ang ila pagkaindibiduwal? Indi gid. Madamo sing oportunidad nga mangin tuhay. Kon indi ka maabtik sa matematika kaangay sang imo utod, indi buot silingon nga may depekto ka na. Nagakahulugan lamang ini nga tuhay ka.

Si Pablo nagahatag sining praktikal nga laygay: “Pamatud-an sang kada isa kon ano ang iya kaugalingon nga binuhatan, kag nian ang rason niya sa pagpabugal mangin sa iya kaugalingon lamang, kag indi sa pagpaanggid sa iban.” (Galacia 6:4) Ngaa indi himakasan nga palambuon ang imo pinasahi nga mga kalantip kag mga abilidad? Ang pagtuon sing iban nga lenguahe, pagtokar sing instrumento sa musika, ukon paggamit sing kompyuter mahimo makabulig sa imo nga maangkon ang dugang nga respeto sa kaugalingon, kag makahatag man ini sa imo sing mapuslanon nga mga abilidad. Indi pagpaligbi kon paano maperpekto ang mga butang! Tun-i nga mangin mauti, mapisan, kag sangkol. (Hulubaton 22:29) Mahimo nga wala ka sing duna nga talento sa isa ka butang, apang “ang kamot sang mapisan amo ang magagahom,” siling sang Hulubaton 12:24.

Apang, ang imo espirituwalidad amo ang mas luyag mo palambuon. Ang espirituwal nga mga kalantip may mapinadayunon nga balor sangsa ano man nga mga talento nga makapadayaw sa iban. Binagbinaga ang kapid nga sanday Esau kag Jacob. Gindayaw gid sang iya amay si Esau bangod sia “isa ka tawo nga makahibalo mangayam, isa ka tawo sang latagon.” Sa umpisa, ayhan mahapos nga di-matalupangdan ang iya manghod, si Jacob, bangod sia “isa ka tawo nga walay kasawayan, nga nagapuyo sa mga layanglayang.” (Genesis 25:27) Napaslawan si Esau nga palambuon ang iya espirituwalidad kag nawasi ang mga pagpakamaayo. Nagpalambo si Jacob sang gugma sa espirituwal nga mga butang kag bugana sia nga ginpakamaayo ni Jehova. (Genesis 27:​28, 29; Hebreo 12:​16, 17) Ano ang leksion? Palambua ang imo espirituwalidad, ‘paiwaga ang imo kapawa,’ kag ang imo “pag-uswag madayag sa tanan nga tawo.”​​—⁠Mateo 5:​16; 1 Timoteo 4:⁠15.

Si Clare, nga ginsambit kaina, nagasiling: “Kontento na anay ako nga magpabilin sa landong sang akon mga magulang nga babayi. Apang nagdesisyon ako nga tumanon ang laygay sang Kasulatan nga ‘magpasangkad’ sa akon pagpalangga. Nag-alagad ako sa ministeryo sa latagon upod sa nanuhaytuhay nga mga kauturan sa kongregasyon, kag nangita ako sing praktikal nga mga paagi agod mabuligan ang mga nagakinahanglan sa kongregasyon. Gin-agda ko man sa amon puluy-an ang mga kauturan nga may nanuhaytuhay nga edad kag ginlutuan ko sila. May madamo na ako karon nga mga abyan, kag mas may kompiansa ako sa akon kaugalingon.”​​—⁠2 Corinto 6:⁠13.

Kon kaisa, basi malipat ang imo mga ginikanan kag laygayan ka nga ilugon ang imo utod. Apang mahaganhagan ang sakit sang imo buot kon marealisar mo nga nagaulikid gid ang imo mga ginikanan sa imo kaayuhan. (Hulubaton 19:11) Apang, maayo nga hambalan mo sing matinahuron ang imo mga ginikanan kon ano ang imo nabatyagan sa sining mga pagkomparar. Ayhan mangita sila sing iban nga mga paagi sa pagpabutyag sang ila pag-ulikid.

Indi pagkalimti nga si Jehova nga Dios mismo magatalupangod sa imo kon mag-alagad ka sa iya. (1 Corinto 8:3) Ginsumaryo ini ni Barry paagi sa pagsiling: “Nadiskobrehan ko nga samtang mas nagadugay ako sa pag-alagad kay Jehova, mas malipayon ako. Nakita na karon sang mga tawo nga isa ako ka tuhay nga indibiduwal kag nagustuhan nila ako, subong nga nagustuhan man nila ang akon mga magulang.”

[Mga nota]

^ par. 5 Ang pila ka ngalan gin-islan.

^ par. 5 Gin-organisar sang mga Saksi ni Jehova.

[Retrato sa pahina 23]

Ang imo bala utod sentro pirme sang atension?

[Retrato sa pahina 24]

Tukiba ang imo mga talento kag mga interes

[Retrato sa pahina 24]

‘Paiwaga ang imo kapawa’ paagi sa pagpalambo sang imo espirituwal nga mga kalantip