Paglaragway sa Isa ka Relihioso nga Komunidad

Subong bahin sang iya hayskul nga asignatura sa geograpiya, ang 15-anyos nga si Philip ginpahimo sang panalawsaw kag report tuhoy sa isa sang mga komunidad sang hampang, politika, kultura, ukon relihion sa Sydney, Australia, ang iya gindak-an nga siudad. Ginpili ni Philip nga magreport tuhoy sa lokal nga kongregasyon sang mga Saksi ni Jehova, diin sia kag ang iya pamilya mga katapo. Ginsugo ang mga estudyante nga makigsugilanon sa 20 ka miembro sang ila napilian nga komunidad agod makahimo sila sing report nga magalakip sang paglaragway sa “mga kinaiya nga nagarepresentar sa komunidad.”

Pagkatapos tipunon ang mga resulta sang iya pagpakigsugilanon sa mga katapo sang kongregasyon, si Philip nagsulat: “[Ang lokal] nga kongregasyon sang mga Saksi ni Jehova isa ka relihioso nga organisasyon nga nagatipon sing tingob agod magtuon gikan sa Biblia. Sa sini nga mga pagtinipon, ginabasa kag ginapaathag ang mga teksto sa Biblia. Ginatudluan man kami sa mga pagtinipon kon paano pinakamaayo nga matudluan ang iban tuhoy sa Biblia. Ini nga pagpanudlo ginahimo paagi sa pagpamalaybalay agod masugilanon ang mga tawo sa ila mga puluy-an, diin pinakakomportable sila. Ang tanan nga katapo sang kongregasyon nagapakigbahin sing regular sa sini nga hilikuton, sa nanuhaytuhay nga kasangkaron, suno sa ila mga kahimtangan. Luwas nga ginatun-an nila ang Biblia kag ginatudluan ang iban tuhoy sini, ang komunidad nagapanagtag man sing impormatibo kag suno sa tion nga mga magasin nga Ang Lalantawan kag Magmata! nga may madamo sing interesante nga mga artikulo tuhoy sa aton pisikal nga palibot, maragtas, kag internasyonal kag lokal nga mga isyu. Nagatinguha man kami nga maghatag sing emosyonal nga bulig sa mga tawo nga nasit-an pagkatapos sang makahalanguyos nga mga hitabo sa kalibutan, subong sang Septiembre 11, kag nagabalhag man kami sing mapuslanon nga mga publikasyon sa mga topiko subong sang pag-asawahay, pagkabuhi sa pamilya, kag pagkapamatan-on.”

Bangod sa kalidad sang iya panalawsaw kag sa paagi sang iya pagpresentar sini, ginhatagan si Philip sing pinakamataas nga grado para sa iya report. Kon luyag mo mahibaluan sing dugang ang hilikuton sang mga Saksi ni Jehova, makighambal sa ila sa liwat nila nga pagduaw sa imo ukon makig-angot sa ila paagi sa pagsulat sa pinakamalapit sa imo nga direksion nga nalista sa pahina 5.

[Retrato sa pahina 31]

Si Philip

[Retrato sa pahina 31]

Italya

[Retrato sa pahina 31]

Australia

[Retrato sa pahina 31]

Brazil

[Retrato sa pahina 31]

Netherlands