Pagbantay sa Kalibutan

Ang Positibo nga Panimuot Nagapalawig sang Kabuhi

Natukiban sa isa ka bag-o lang natapos nga panalawsaw nga ang kabuhi sang mga tigulang nga may positibo nga pagtamod sa kabuhi kag pagtigulang “mas malawig sing 7.5 ka tuig sangsa mga may indi tanto ka positibo nga pagtamod sa pagtigulang,” siling sang isa ka artikulo nga ginbalhag sa Journal of Personality and Social Psychology. Ang panalawsaw, nga ginhimo sa sulod sang 23 ka tuig sa 660 ka tawo nga nagapangidaron sing 50 anyos kag kapin, nagpamatuod sing duha ka butang: Ang negatibo nga pagtamod sa pagtigulang “makapalip-ot sang kabuhi,” kag ang positibo nga panimuot “makapalawig sang kabuhi.” Sa pagkamatuod, ang positibo nga panimuot mas makapalawig sang kabuhi sangsa diutay nga cholesterol sa dugo kag maayo nga presyon, siling sang report. Sa hingapusan ginpalig-on sini ang mga tawo sa kabilugan nga tamdon sing positibo ang mga tigulang paagi sa paglakip sa ila sa mga hilikuton kag “indi paghupot sang kinaandan negatibo nga pagtamod sa pagtigulang,” nga ginahuptan sang kalabanan​​—⁠bisan sing di-hungod⁠​—⁠sa ila kahalitan.

Ang Aspirin kag ang mga Pasyente nga Gin-operahan sing Bypass

“Ang pagpatomar sing aspirin sa mga pasyente sa sulod sang 48 oras pagkatapos sang heart bypass nga operasyon makapanubo gid sa risgo sang kamatayon kag grabe nga mga komplikasyon sa tagipusuon, utok, mga batobato kag tulunawan sang pagkaon.” Amo ini ang konklusion sang panalawsaw nga ginreport sa The New York Times. Ang insidente sang kamatayon sa mga pasyente nga ginpatomar sing aspirin mas manubo sing 67 porsiento sangsa wala ginpatomar sini. Ang insidente sang stroke kag atake sa tagipusuon nabuhinan sing katunga, ang insidente sang balatian sa batobato mas manubo sing 74 porsiento, kag ang insidente sang grabe nga mga komplikasyon sa tinai nagnubo sing 62 porsiento. Ini nga panalawsaw, nga espesipiko nga nag-obserbar sa mga pasyente suno sa kon paano sila ginabulong sang ila mga doktor, nag-obserbar sa 5,065 ka pasyente nga gin-operahan sa 70 ka ospital sa 17 ka pungsod. Sang una, ang nagaopera nga mga doktor wala nagapatomar sing aspirin sa mga pasyente sa sulod sang pila ka adlaw antes sang operasyon ukon pagkatapos gid sini, bangod nahadlok sila nga magsulog ang pagdugo sang pilas sang pasyente. Apang, ginpakita sang panalawsaw nga mas malaka ang insidente sang pagdugo sa mga pasyente nga ginpatomar sang aspirin pagkatapos gid sang operasyon kag ang manubo nga dosis​​—⁠subong sang aspirin para sa mga bata⁠​—⁠bastante na. Ginabanabana nga masalbar ang mga 27,000 ka kabuhi sa bug-os nga kalibutan kada tuig kon iaplikar ining mga natukiban.

Ang Tulog Importante sa Pagtuon sing Bag-o nga Pisikal nga mga Abilidad

Ang mahamuok nga tulog sa gab-i pagkatapos makatuon sang bag-o nga pisikal nga abilidad importante agod indi ini malipatan, siling sang mga sientipiko. Bisan pa madugay na nila nahibaluan ang importansia sang bastante nga tulog sa pagsaulo sa mga hitabo kag iban pa nga mga impormasyon, nagpabilin ang palamangkutanon tuhoy sa kon ano ang epekto sang tulog sa pisikal nga mga abilidad, nga ginakontrol sang iban nga bahin sang utok. Ang bag-o nga mga pagtuon sa Alemanya kag Estados Unidos naghinakop nga bisan pa ang tulog importante agod madumduman sing maayo ining bag-o natun-an nga pisikal nga mga abilidad, kinahanglan makatulog dayon ang isa “sa sulod sang isa ka partikular nga tion pagkatapos makatuon sini,” suno sa dyurnal nga Proceedings of the National Academy of Sciences. Ang mga tawo nga gintudluan sing isa ka abilidad sa gab-i kag gintilawan liwat pagkatapos nga makatulog sa bilog nga gab-i nakahimo sing mas maayo sangsa mga ginhanas sa aga kag gintilawan pagligad sang 12 ka oras, antes magtulog.

“Indi Na Luyag Kabigon nga Katoliko”

Sa Italya mapapanas na karon sang isa ka tawo nga ginbunyagan nga Katoliko nga “indi na luyag kabigon nga miembro sang Simbahan Katoliko” ang iya ngalan sa rehistro sang simbahan, report sang pamantalaan nga Il Sole-24 Ore. Sang una, ginbalibaran ang mga pangabay nga panason ang ngalan sang isa ka tawo sa rehistro sa bunyag sa rason nga “isa ini ka pagguba sa ‘mga pamatuod’ sang maragtas sang Simbahan.” Apang, pagkatapos sang mga pag-apelar sang madamo nga tawo nga nagpangabay nga panason sila sa opisyal nga mga listahan sang simbahan, ang garantor para sa Pagtipig sang Personal nga mga Impormasyon nag-awtorisar nga tadlungon ang rehistro sa bunyag sang parokya paagi sa sini nga nota: “Indi na luyag kabigon nga Katoliko.” Ang garantor nagsugo na sa mga pari nga tumanon ang mga pangabay sang indi magkubos tatlo ka tawo nga indi na luyag magpabilin nga Katoliko.