Ang Pagtamod sang Biblia

Ang Hipnotismo Bala Para sa mga Cristiano?

“Indi dapat masapwan sa imo ang bisan sin-o nga . . . manugtiwtiw.”​—DEUTERONOMIO 18:10, 11.

ANG hipnotismo nangin topiko sang madamo nga debate kag kontrobersia. * Bisan ang mga eksperto sa hipnotismo nabudlayan magpaathag sini. Ang paghangop sang kalabanan amo nga ang hipnotismo isa ka ginbag-o nga kahimtangan sang pamensaron, ukon isa ka kahimtangan diin ang isa ka tawo daw wala sa kaugalingon (trance). Apang, mas interesado ang kalabanan nga tawo sa kon ano ang mahimo sang hipnotismo sangsa kon ano ini.

Sining karon lang nangin kinaandan na sa mga doktor sa pila ka kadutaan nga irekomendar subong bulong ang hipnotismo. Halimbawa, ang magasin nga Psychology Today nagasiling: “Mapaayo sang hypnotherapy (pagbulong sa balatian paagi sa hipnotismo) ang sakit sa ulo, mapahaganhagan ang sakit sa pagpanganak, makabulig sa imo nga untatan ang pagpanigarilyo, mahimo gamiton nga tal-us sa anesthesia, kag makapauswag sa kinabatasan sa pagtuon​—nga wala sing malain nga epekto.” Sa pihak nga bahin, madamo ang nagakonektar sang hipnotismo sa espiritismo kag okultismo.

Ano ang pagtamod sang Biblia? Matuod, ang Biblia indi isa ka reperensia sa ikaayong-lawas, kag wala ini sing direkta nga ginasiling tuhoy sa hipnotismo. Apang ang mga prinsipio nga masapwan sa Pulong sang Dios makabulig sa aton nga hibaluon ang pagtamod sang Dios.

 Ang Hipnotismo kag Okultismo​—May Koneksion Bala?

Himuhimo lamang bala ang pangangkon nga may kaangtanan ang hipnotismo sa okultismo? Mahimo ginapalambo ini nga ideya sang pantasya nga mga istorya sa mga sine kag mga nobela, apang mapamatud-an gid ang koneksion sa tunga sang hipnotismo kag espiritismo. Tuhoy sa hipnotismo, ang Encyclopedia of Occultism and Parapsychology nagapaathag: “Ang maragtas sang hipnotismo suod nga naangot sa okultismo.” Ang relihioso nga mga trance, nga nangin bahin sang binabaylan kag salamangka sa bug-os nga maragtas sang tawo, kinaandan nga ginatamod subong isa ka porma sang hipnotismo. Subong man, ang mga pari sang una sa Egipto kag Gresya nagatuga sing katulad-hipnotismo nga kahimtangan kon nagabulong sang mga balatian sa ngalan sang ila butig nga mga dios.

Ang insiklopedia nga ginkutlo kaina nagsiling: “Bisan sa karon madamo nga hipnotismo ang ginakabig nga ‘Espiritismo.’ ” Bisan pa mabudlay hibaluon kon tubtob gid diin ang kaangtanan sang nagkalainlain nga porma sang hipnotismo sa okultismo, ang katunayan amo nga ang Dios maathag nga nagpakamalaut sa tanan nga porma sang espiritismo. (Deuteronomio 18:​9-​12; Bugna 21:8) Gani, indi mahimo magpabulagbulag lang ang mga Cristiano sa maathag di-makasulatanhon nga mga aspekto sang hipnotismo.

Epekto sa Batasan

Ano naman ang epekto sang hipnotismo sa pamensaron kag batasan sang isa ka tawo? May mga risgo bala? Ang isa nga dapat kabalak-an amo nga samtang yara sa idalom sang hipnotismo mahimo madula sang isa ka tawo ang pagkontrol sa iya ginahimo. Ginagamit ini sang mga hipnotista nga nagapasundayag sa entablado, nga ginapahimo sa mga boluntaryo ang mga butang nga indi nila paghimuon sa kinaandan, kag daw hubog pa gani sila kon tan-awon.

Tuhoy sa sini nga mga hipnotismo nga ginapasundayag sa publiko, ang The Encyclopedia Americana nagasiling: “Ang isa ka tawo nga yara sa idalom sang hipnotismo mahapos papatihon sa bisan indi direkta nga mga panugyan sang hipnotista, mahapos man niya mabatyagan ang kinaandan mas natago niya nga mga kailigbon, kag samtang yara sia sa idalom sang hipnotismo mahimo sia magbatyag nga nahilway sia sa mga sosyal kag personal nga mga pagsulundan sang pamatasan.” Ang Collier’s Encyclopedia nagasiling: “Nakakonsentrar gid ang igbalatyag kag hunahuna sang isa nga ginapaidalom sa hipnotismo, amo nga tuman sia ka atentibo sa mga panugyan sang hipnotista kag masinulundon sa pagtuman sang mga panugyan.”

Daw indi bala ini makahalalit? Dapat bala nga tugutan sang isa ka matuod nga Cristiano nga impluwensiahan sang hipnotiko nga mga panugyan ang iya hunahuna? Batok ini sa laygay ni apostol Pablo: “Ipresentar ninyo ang inyo mga lawas nga isa ka halad nga buhi, balaan, kalahamut-an sa Dios, isa ka sagrado nga pag-alagad lakip ang inyo ikasarang sa pagpangatarungan. Kag indi na kamo magpadihon suno sa sining sistema sang mga butang, kundi magbalhin kamo paagi sa pagbag-o sang inyo painuino, agod nga mapamatud-an ninyo sa inyo kaugalingon ang maayo kag kalahamut-an kag himpit nga kabubut-on sang Dios.”​—Roma 12:​1, 2.

Mahuptan bala sang isa ka Cristiano ang isa ka “maayo nga konsiensia,” kon ginabutang niya ang iya kaugalingon sa kahimtangan diin indi na niya makontrol sing bug-os ang iya mga panghunahuna ukon mga kailigbon ukon bisan ang iya mga ginahimo? (1 Pedro 3:​16) Ang Biblia nagalaygay: “Hibaluon sang tagsa sa inyo kon paano panag-iyahan ang iya kaugalingon nga suludlan sa pagkabalaan kag kadungganan.” (1 Tesalonica 4:4) Maathag nga maupangan sang hipnotismo ang pagtuman sa sini nga laygay.

Paglaum Para sa Himpit nga Panglawas

Bangod sang nasambit na nga mga prinsipio sa Biblia, ginalikawan sang mga Saksi ni Jehova ang mga pamaagi nga may kaangtanan sa hipnotismo ukon self-hypnosis. Ginatuman nila ang laygay sa Deuteronomio 18:10, 11: “Indi dapat masapwan sa imo ang bisan sin-o nga . . . manugtiwtiw.” Para sa mga may problema sa lawas, madamo sang iban pa nga paagi sa pagbulong ang wala nagadalahig sa pagpaidalom sang kaugalingon sa mga peligro sang okultismo ukon nagatugot sa pagmaniobra sang iban sa hunahuna sang isa ka tawo.

Paagi sa paglikaw sa mga buhat nga supak sa mga prinsipio sang Biblia, makalaum ang mga Cristiano nga mabuhi sing walay katapusan sa matarong nga bag-ong kalibutan sang Dios. Sa sina nga tion maangkon sang katawhan ang himpit nga panglawas kag hunahuna nga wala nagagamit sing hipnotismo.​—Bugna 21:​3, 4.

[Nota]

^ par. 4 Ang hipnotismo nagakahulugan sing “isa ka daw nagakatulog nga kahimtangan nga gintuga sang iban nga tawo diin ang isa nga napaidalom sa hipnotismo makadumdom sang iya nalipatan ukon ginkalimtan sing hungod nga mga inagyan, makaeksperiensia sing mga halusinasyon, kag nagasunodsunod sa panugyan sang hipnotista.”​—The American Heritage Dictionary.