Pamangkot sang mga Pamatan-on . . .

Ngaa Adoptibo Lamang Ako?

“Daw nagakabuhi ka nga isa ka inutil. Isa ini ka balatian sa tagipusuon nga indi mag-ayo.”​​—⁠Robert.

AMO sini ang paglaragway sang isa ka tawo sa iya kabuhi, nga ginpaadoptar pagkabun-ag gid niya. Nagsiling pa sia: “Halos kada adlaw sang imo kabuhi, handum mo gid nga masabat ang mga pamangkot subong sang, Sin-o ang matuod ko nga pamilya? Diin sila nagaistar? Ngaa ginpabay-an nila ako?”

Si Chantial, nga ang iya amay adoptibo, nanganduhoy nga wala niya makilala ang iya kinaugali nga lolo kag lola. Sia nagsiling: “Nagbatyag ako nga gindingutan bangod wala ako makapakig-upod sa akon mga tiyo, mga tiya, kag mga pakaisa.” Indi tanan nga gin-adoptar nga mga kabataan nagabatyag sing subong sini. Apang ang pila may amo sini nga balatyagon. Ngaa?

Gintunaan sang Kaakig

Ang paghibalo nga ginbulag ang isa sa iya kinaugali nga pamilya makatuga sing daku nga problema sa emosyon sang bata. Si Catrina, nga bata pa sang ginpaadoptar, nagsiling: “May ginahuptan ako nga kaakig bangod wala ko mahangpi kon ngaa ginpaadoptar ako sang akon matuod nga iloy. Nagbatyag ako nga ginpabayaan ako sang akon iloy bangod malaw-ay ako kag di-hiligugmaon. Kon ginhatagan lamang niya ako sing kahigayunan, nahibaluan ko nga mapabugal gid niya ako. Ang pagpamensar sa akon matuod nga iloy nagapaakig pa gid sa akon.”

Ang kaangtanan ni Catrina sa iya nag-adoptar nga mga ginikanan nangin mahuol man. “Ginbatyag ko nga gin-agaw ako sang nag-adoptar sa akon gikan sa akon matuod nga iloy,” siling niya. “Gani sa ila ko ginpaupok ang akon kaakig.” Huo, ang kaakig amo kon kaisa ang reaksion sang ginpaadoptar.

Makatalagam ini nga kaakig. Kon kaisa, subong sang natabo kay Catrina, mahimo ipautwas mo ang imo kaakig sa indi nagakaigo nga mga paagi ukon ipaupok ini sa wala sing sala nga mga tawo. Ang  Biblia nagalaygay: “Likawi ang kaakig kag bayai ang kasingkal.” (Salmo 37:⁠8) Paano ini mangin posible? Bueno, ang Pulong sang Dios nagasiling man: “Ang paghantop sang tawo nagapahinay gid sang iya kaakig.” (Hulubaton 19:11) Ang paghantop sa imo kaugalingon nga kahimtangan magabulig sa pagpahaganhagan sang imo kaakig. Paano?

Pagtadlong sa Sayop nga mga Haumhaum

Ang paghantop makabulig sa imo nga usisaon ang mga haumhaum nga nagpasilabo sang imo kaakig. Halimbawa, kon gin-adoptar ka, ginahaumhaum mo bala nga ginpaadoptar ka sang imo kinaugali nga mga ginikanan bangod may mga butang nga indi maayo sa imo? Amo sini ang nabatyagan ni Catrina. Apang, amo bala sini pirme ang kabangdanan? Mahimo nga imposible mahibaluan kon ano ang nagpahulag sa imo mga ginikanan, apang may maayo nga mga rason nga likawan ining negatibo nga mga haumhaum. Kay man, ngaa bala ginapaadoptar sang mga ginikanan ang ila mga kabataan? Sing masami, bangod wala na sila sing mahimo.

Binagbinaga ang halimbawa ni Moises. Ang rekord sang Biblia sa Exodo kapitulo 2 nagasugid sa aton nga sang ginmando sang Paraon sa Egipto nga patyon ang Israelinhon nga mga lapsag nga lalaki, gintago ni Jocabed ang iya lapsag nga bata, nga si Moises, sa sulod sang tatlo ka bulan. Sang ulihi, indi na niya matago ang iya bata, apang indi niya mabatas nga makita nga patyon ini. Gani, ‘sang indi na niya matago ang bata, nagkuha sia sing isa ka arka nga papiro kag ginhibuan ini sang aspalto kag balaw kag ginsulod sa sini ang bata kag ginbutang ini sa kabagaasan sa pangpang sang suba sang Nilo.’​​—⁠Exodo 2:⁠3.

Ang pagbiya sa iya bata sa sini nga paagi wala sing duhaduha nga isa ka mabudlay nga butang nga iya himuon. Apang, ano ang iya mahimo? Ang gugma sa iya anak amo ang nagpahulag sa iya nga himuon ang iya ginhunahuna nga labing maayo para sa iya anak. Sing makawiwili, ang iya anak nga babayi nagbantay sa malapit kag nagpabilin didto tubtob nakita niya nga ang iya manghod nga lapsag ginkuha nga hilway sa katalagman. Mahimo nga ginhimo niya ini sa pagpangabay sang iya nagakabalaka nga iloy.

Sa pagkamatuod, indi tanan nga pagpaadoptar ginapahulag sang kaangay sini nga mga emerhensia, apang ang motibo masami nga pareho. Si Robert nagsiling: “Ginpanamkon ako sa guwa sang pag-asawahay. Ang pagpadaku sa akon mahimo magpabug-at sa panimalay sang akon iloy, bangod may iban pa nga kabataan sa pamilya. Mahimo nangatarungan sia nga para gid sa akon kaayuhan kon ipaadoptar na lang niya ako.”

Matuod, may madamo nga rason kon ngaa ang kabataan ginpaadoptar agod padakuon sang iban  nga pamilya. Apang, subong sang ginapakita sini nga mga halimbawa, indi gid man ini bangod nga naugot ang iloy ukon may nakita sia nga pila ka depekto sa iya bata. Sa madamong kaso, ang iloy sinsero nga nagapati nga mangin mas maayo ang kahimtangan sang bata kon padakuon sia sang iban nga pamilya.

Ang Importansia sang Ginahigugma

Ang pagtigayon sing paghantop mahimo magbulig pa sa imo kon ginapaligban mo kon ngaa nga ginpaadoptar ka. Binagbinaga liwat ang halimbawa ni Moises. Sang ulihi, “ginkuha sia sang anak nga babayi ni Paraon kag ginpadaku sia subong iya kaugalingon nga anak.” (Binuhatan 7:21) Ano ang nagpahulag sa anak nga babayi ni Paraon nga sapupuhon ang isa ka bata nga nahibaluan niya nga isa ka palatyon nga Hebreo? “Yari karon, ang bata nagahibi,” siling sang Biblia. “Kag naluoy sia sa iya.” (Exodo 2:⁠6) Huo, ginpaadoptar si Moises, indi bangod ginkaugtan ukon ginsikway sia, kundi bangod ginhigugma sia.

Nahisayran sang madamo nga adoptibo nga kabataan nga wala sila ginpabay-an lamang sang ila kinaugali nga mga ginikanan​​—⁠bisan pa amo sini ang masami nga nagakatabo karon ​—⁠kundi gintugyan sila sa pila ka ahensia nga nagapat-od nga maatipan sila sing nagakaigo. Kag ang pag-adoptar sa ila natabo bangod nga may nagahigugma gid sa ila nga maluyag mag-atipan sa ila. Amo man bala sini sa imo? Ang pagtalupangod sa gugma nga imo nabaton kag ang pagpabalor sa sini magabulig sa imo sa pagpahaganhagan sang kasakit nga imo nabatyagan.

Dugang pa, makabaton ka sing gugma indi lamang gikan sa pamilya nga nag-adoptar sa imo. Kon katapo ka sang Cristianong kongregasyon, makaagom ka sing madamong espirituwal nga mga iloy, mga amay, mga utod nga babayi, kag mga utod nga lalaki nga nagahigugma sa imo. (Marcos 10:29-​30) Ang Cristianong mga gulang nangin “subong sang palalipdan sa hangin kag palanaguan sa unos, subong sang mga ilig sang tubig sa duog nga kigas, subong sang landong sang daku nga igang sa duta nga lamgod.” (Isaias 32:2) Indi magpangalag-ag sa pagpalapit sa hamtong nga mga Cristiano kag magpautwas sa ila. Pahibalua sila sang imo ginahunahuna kag ginabatyag.

Nagapati si Robert nga importante gid ang pagpalambo sang suod nga kaangtanan sa sulod sang Cristianong kongregasyon. “Ang kasubo nga akon nabatyagan yara pa gihapon,” baton niya. “Apang, ang gugma sang akon espirituwal nga pamilya nagpahaganhagan sini.”

Mahimo ka Magmadinalag-on

Gani batui ang sayop kag negatibo nga panghunahuna. Nagalakip ini sa ideya nga indi ka gid magmadinalag-on bangod adoptibo ka lamang. Ining negatibo nga panghunahuna makapaluya gid sing buot! (Hulubaton 24:10) Dugang pa, wala gid ini sing sadsaran.

Dumduma, ginkalitan gid ni Moises ang mga kahigayunan nga naangkon niya. Ang Biblia nagasiling: “Bangod sini gintudluan si Moises sa tanan nga kaalam sang mga taga-Egipto. Sa katunayan, gamhanan sia sa iya mga pulong kag mga buhat.” (Binuhatan 7:22) Sing labi pa ka importante, natigayon ni Moises ang espirituwal nga instruksion​​—⁠amo kon ngaa ang iya langitnon nga Amay, si Jehova, nangin matuod gid sa iya. (Hebreo 11:27) Nagmadinalag-on bala sia sa iya kabuhi?

Bueno, sang ulihi nangin lider si Moises sang isa ka gamhanan nga pungsod sang mga tatlo ka milyon ukon kapin pa. Nangin isa sia ka manalagna, hukom, kumandante, istoryador, manugpatunga sa Kasuguan nga katipan, kag manunulat sang nahauna nga lima ka libro sang Biblia. Dugang pa, ginkilala sia sa pagsulat sa libro sang Job kag Salmo 90. Huo, nangin madinalag-on gid ang kabuhi ni Moises. Madamo sang gin-adoptar nga kabataan ang nagmadinalag-on man, kag mahimo man ikaw.

Madinalag-on nga ginpadaku ni Robert ang iya duha ka kabataan kag nagaalagad sia karon subong isa ka gulang sa Cristianong kongregasyon. Sa paghinumdom sa mga tinuig sang iya pagdaku nga isa ka adoptibo, sia nagsiling: “Natun-an ko nga indi magsagad pamensar sa kon ano ang indi ko mabag-o kundi mangin mapinasalamaton sa mga pagpakamaayo nga akon nabaton.”

Kon yara ka karon sa isa ka foster home ukon gin-adoptar sang isa ka pamilya, ang negatibo nga mga panghunahuna mahimo kon kaisa magtublag sa imo. Apang tinguhai nga bayluhan ini sang positibo. Ang Filipos 4:​8, 9 nagasaad nga ‘ang Dios sang paghidait mangin kaupod mo’ kon ‘padayon mo nga ginabinagbinag’ ang mga butang nga kalahamut-an sa Dios. Apang, ano ang pila ka dugang pa nga praktikal nga mga tikang nga imo mahimo agod magmadinalag-on ka samtang nagakabuhi upod sa pamilya nga nag-adoptar sa imo? Sabton ini nga pamangkot sang palaabuton nga artikulo sini nga serye.

[Mga retrato sa pahina 24]

Ang pag-adoptar sa imo nagapamatuod nga may nagahigugma gid sa imo amo kon ngaa ginbaton ka subong katapo sang ila pamilya kag gin-atipan ka