Kon Paano Makabulig ang Biblia sa mga Tawo nga May Diabetes

ANG pagpugong sa kaugalingon kag ang positibo nga pagtamod importante gid sa kapagros kag sa ikaayong lawas sang mga tawo nga may diabetes. Apang agod mapalambo ini nga mga kinaiya, kinahanglan sang mga tawo nga may diabetes ang padayon nga bulig. Gani indi dapat pagsulayon sang mga katapo sang pamilya kag mga abyan ang tawo nga may diabetes sa pagkaon sing kalan-on nga malain sa iya, ayhan nagasiling, ‘Indi ka maano kon karon ka lang magkaon sini.’ “Ginbuligan ako sang akon asawa,” siling ni Harry, nga may balatian sa tagipusuon kag Type 2 diabetes. “Wala sia nagadala sa balay sing pagkaon nga indi ko dapat kaunon. Apang ang iban indi makahangop, kag wala sila makahibalo kon daw ano ini kabudlay kon kaisa.”

Kon regular nga kaupod mo ang isa ka tawo nga may diabetes, dumduma ang masunod nga duha ka matahom nga prinsipio sa Biblia: “Padayon nga pangitaon sang kada isa, indi ang kaugalingon nga kaayuhan, kundi ang iya sang iban nga tawo,” kag “Ang gugma . . . wala nagapangita sang kaugalingon nga kaayuhan.”​—⁠1 Corinto 10:24; 13:​4, 5.

Ang tanan nga nabalaka sa ila kapagros​​—⁠may diabetes man sila ukon wala⁠​—⁠dapat magkontrol sa pagkaon. Makabulig ang Biblia sa sining bahin, kay ginapakita sini nga ang tagsatagsa sa aton dapat magpalambo sing pagpugong sa kaugalingon. Nagdesisyon ka bala nga palambuon ini nga kinaiya sa imo kabuhi? (Galacia 5:​22, 23) Matigayon ang dugang pa nga bulig gikan sa mga halimbawa sa Biblia, subong sang Cristiano nga si apostol Pablo. “May permanente sia nga ungon sa unod,” siling sang isa ka tawo nga may diabetes, “apang nag-alagad gihapon sia sa Dios sing matutom kag bug-os. Gani mahimo ko man ini!”

Huo, ginbaton ni Pablo ang butang nga indi na niya mabag-⁠o kag nagmadinalag-on sia subong isa ka misyonero. (2 Corinto 12:​7-9) Si Dustin, 18 anyos, bulag halin sa pagkatawo, kag may diabetes halin sa edad nga 12 anyos. Sia nagsulat: “Nahibaluan ko nga wala sing bisan sin-⁠o sa sining kalibutan ang may yara sang tanan nga butang. Ginapaabot ko nga madula ang akon diabetes sa bag-ong kalibutan sang Dios. Para sa akon, temporaryo lamang ini. Mas madugay ini sangsa kataro ukon trangkaso, apang madula ini sa ulihi.”

Sa pagsiling sini, ginhunahuna ni Dustin ang pasad-sa-Biblia nga paglaum nga matigayon ang himpit nga panglawas sa isa ka paraiso nga duta sa idalom sang Ginharian sang Dios. (Bugna 21:​3, 4) Ang Pulong sang Dios nagasaad nga sa idalom sini nga paggahom sang Dios, “wala sing pumuluyo nga magasiling: ‘Nagamasakit ako.’ ” (Isaias 33:24; Mateo 6:​9, 10) Luyag mo bala makatuon sing dugang pa tuhoy sa sining napasad sa Biblia nga saad? Pakig-anguti ang mga Saksi ni Jehova sa inyo duog, ukon magsulat sa mga manugbalhag sini nga magasin sa nagakaigo nga direksion nga nalista sa pahina 5.

[Retrato sa pahina 12]

Importante ang pagpugong sa kaugalingon kag positibo nga pagtamod