Ang Pagtamod sang Biblia

Paano Naton Dapat Gamiton ang Aton Kahilwayan sa Pagpili?

GINHATAGAN sang Dios ang unang mga tawo, sanday Adan kag Eva, sing ikasarang sa pagdesisyon. Ginpadumalahan niya kay Adan ang hardin sang Eden. Ang katungdanan ni Adan naglakip sa paghingalan sa mga sapat. (Genesis 2:​15, 19) Sing mas importante, makadesisyon sanday Adan kag Eva kon bala tumanon nila ang Dios ukon indi.​—Genesis 2:​17, 18.

Sugod sadto, ang mga tawo nakahimo sing di-maisip nga binilyon ka desisyon​—ang madamo sini maayo, ang pila indi nagakaigo, kag ang iban pa malaut gid. Ang pila sang indi maayo nga mga desisyon sang tawo nagbunga sing malaglagon nga mga resulta. Apang, ang Dios wala nagapasilabot sa aton kinamatarong sa pagpili. Subong isa ka mahigugmaon nga Amay, ginabuligan kita sang Dios sa paghimo sing maayo nga mga desisyon paagi sa Biblia. Ginapaandaman man niya kita tuhoy sa malain nga mga resulta sang sayop nga pagpili. Ang Biblia nagasiling nga anihon naton ang aton ginasab-ug.​—Galacia 6:7.

Pagdesisyon sa Personal nga mga Butang

Sa pila ka butang maathag nga ginapahibalo sang Dios ang iya kabubut-on, nga nagahatag sa aton sing espesipiko nga panuytoy. Apang, sa kalabanan nga butang, wala sing pagsulundan sa Biblia nga magkontrol sa tanan naton nga personal nga mga hilikuton. Sa baylo, nagahatag ini sing masangkad nga panuytoy nga nagatugot sa mga tawo nga sundon ang ila mga naluyagan ukon  ginahandum. Halimbawa, talupangda ang ginasiling sini tuhoy sa kalingawan.

Ginatawag sang Kasulatan si Jehova nga “malipayon nga Dios.” (1 Timoteo 1:​11) Ang iya Pulong nagasambit tuhoy sa “tion sa pagkadlaw” kag “tion sa paglukso.” (Manugwali 3:​1, 4) Ang Biblia nagasugid sa aton nga si Hari David nagtokar sing musika para sa kaayuhan sang iban. (1 Samuel 16:16-​18, 23) Nagtambong si Jesus sa isa ka punsion sang kasal, kag may ginhimo sia nga butang para sa okasyon, nga amo ang paghimo sa tubig nga mangin alak.​—Juan 2:1-10.

Apang nagapaandam gid ang Biblia: “Sia nga nagalakat upod sa maalam nga mga tawo magaalam, apang sia nga nagapakig-angot sa mga buangbuang magaantos.” (Hulubaton 13:20) “Ang malaw-ay nga linahog” kag ang imoral nga mga hilikuton nagapaakig sa Dios kag sarang makaguba sang aton kaangtanan sa iya. (Efeso 5:​3-5) Kon ang alkoholiko nga ilimnon wala ginakontrol sa sosyal nga mga pagtilipon, mahimo mag-utwas ang serioso nga mga problema. (Hulubaton 23:29-​35; Isaias 5:​11, 12) Ginadumtan man ni Jehova nga Dios ang kasingki.​—Salmo 11:5; Hulubaton 3:​31.

Ining mga bersikulo sa Biblia magabulig sa aton nga tamdon ang kalingawan suno sa pagtamod sang Dios. Sa pagpili, ginabinagbinag sang mga Cristiano ang Biblia. Sa pagkamatuod, tanan kita magaatubang sang maayo ukon malain nga mga resulta sang aton pagpili.​—Galacia 6:​7-​10.

Sing kaanggid, ginapalig-on ang mga Cristiano nga maghimo sing maalamon nga mga desisyon nahisuno sa mga prinsipio sang Biblia sa mga butang kaangay sang panapton, pag-asawahay, pagkaginikanan, kag negosyo. Nagalakip ini sang mga butang nga wala ginhinambitan sing espesipiko sa Kasulatan, apang ang mga prinsipio nga masapwan sa sini magabulig sa ila nga magdesisyon suno sa ila konsiensia. (Roma 2:​14, 15) Ang masunod nga talaksan dapat naaplikar sa tanan nga personal nga mga desisyon sang mga Cristiano: “Bisan nagakaon kamo ukon nagainom ukon bisan ano ang inyo ginahimo, himua ang tanan nga butang sa kahimayaan sang Dios.”​—1 Corinto 10:31.

Tuhoy sa pagpili kag pagdesisyon dapat binagbinagon man naton ang prinsipio nga ‘asikasuhon ang kaugalingon nga hilikuton.’ (1 Tesalonica 4:​11)Masami nagaatubang ang mga Cristiano sing madamo nga pililian nga wala nagasumpakil sa kabubut-on sang Dios. Gani, ang luyag sang isa ka Cristiano mahimo tuhay sa ila sang iban. Wala nahamuot ang Dios nga makita ang iya mga alagad nga nagahusgar sa isa kag isa. (Santiago 4:​11, 12) Ang Biblia maalamon nga nagalaygay: “Walay bisan sin-o sa inyo nga mag-antos . . . subong nga mahilabtanon sa mga butang sang iban.”​—1 Pedro 4:​15.

Ang Desisyon nga Alagaron ang Dios

Ginapadaku sang Biblia ang mga benepisyo sang pagkamatinumanon sa Dios. Apang, wala ginapilit sang Dios ang mga tawo nga simbahon sia. Sa baylo, ginaagda niya ang iya tawhanon nga mga tinuga nga mangin mga sumilimba niya. Halimbawa, ang Biblia nagasiling: “O kari kamo, magsimba kita kag magyaub; magluhod kita sa atubangan ni Jehova nga aton Magbubuhat.”​—Salmo 95:6.

Ini nga pangagda ginhatag sa dumaan nga Israel. Kapin sa 3,500 ka tuig ang nagligad, ang pungsod sang Israel yara sa tiilan sang Bukid Sinai, kag ginpahibalo sang Dios sa minilyon ka tawo ang sistema sang matuod nga relihion nga makita sa Mosaikong Kasuguan. Dapat sila karon magpili: Alagaron bala nila ang Dios ukon indi? Ano ang ila sabat? Sing nahiusa sila nagsiling: “Ang tanan nga pinamulong ni Jehova handa namon nga himuon kag mangin matinumanon.” (Exodo 24:7) Sila ang nagdesisyon nga alagaron si Jehova.

Sang unang siglo, ginsugdan ni Jesus ang pagbantala sing maayong balita sang Ginharian sang Dios. (Mateo 4:​17; 24:14) Wala niya ginpilit ang bisan sin-o sa pagbuylog sa sining hilikuton. Sa baylo, mainayuhon nga gin-agda niya ang iban, nga nagasiling: “Kari magsunod sa akon.” (Marcos 2:​14; 10:21) Madamo ang nagbaton sang iya pangagda kag nagbantala kaupod niya. (Lucas 10:​1-9) Pagligad sang panahon, ginpili sang iban nga magbiya kay Jesus. Ginpili ni Judas nga luiban sia. (Juan 6:​66; Binuhatan 1:​25) Sang ulihi, sa panuytoy sang mga apostoles, madamo pa ang nangin disipulo, indi bangod nga ginpahog sila sing espada, kundi paagi sa paggamit sang ila kahilwayan sa pagbuot. Sila tanan “husto nga nahuyog” kag “nangin mga tumuluo.” (Binuhatan 13:48; 17:34) Karon man, ang matuod nga mga Cristiano kinabubut-on nga nagatuman sa Pulong sang Dios kag nagasunod sa mga panudlo ni Jesus.

Maathag nga handum sang Dios nga gamiton naton ang aton ikasarang sa pagpili. Naghatag man sia sing panuytoy sa Biblia nga nagabulig sa aton sa paghimo sing maalamon nga mga desisyon. (Salmo 25:12) Kon nagahimo sing personal nga mga desisyon, dapat mahalungon nga binagbinagon sang tagsa ka Cristiano ang diosnon nga mga prinsipio. Paagi lamang sa sini makahatag kita sa Dios sing ‘sagrado nga pag-alagad lakip ang aton ikasarang sa pagpangatarungan.’​—Roma 12:1.