Ang Paglaum Para sa Paghidait Nagadulom Bala?

“Ginabatyag naton karon nga daw nagakabuhi kita . . . sa sentro sang isa ka buhawi, isa ka walay tupong nga kahalitan.”​—⁠“La Repubblica” nga pamantalaan, Roma, Italya.

PAGKATAPOS sang pagsalakay sang mga terorista sang nagligad nga tuig sa New York City kag sa Washington, D.C., kapin nga mga tawo karon ang nagapalibog kon ano ang palaabuton sang katawhan. Ang mga laragway sa TV sang Twin Towers samtang nagakarusdak ini sa nagakarabkarab nga kalayo​​—⁠subong man ang mga laragway sang nagasalangisag nga mga nakalampuwas⁠​—⁠sulitsulit nga ginpaguwa. Ini nga mga laragway nagpalisang sa mga tawo sa bug-os nga kalibutan. Upod sini nga kalisang amo ang pagbatyag nga ang kalibutan nagbag-⁠o na gid. Amo bala?

Nagdabdab ang inaway pagkatapos sang Septiembre 11, 2001. Wala madugay, ang mga pungsod nga sang una nagakontrahanay nagbuligay agod sumpuon ang terorismo. Sa tapos mabinagbinag ang tanan, madamo ang napatay kag daku gid ang halit. Apang ayhan ang mas talalupangdon nga pagbag-o para sa madamo nga tawo sa bug-os nga kalibutan amo ang pagkadula sang ginabatyag nga kasiguruhan, ang nagadugang nga pagpati nga wala sing bisan sin-⁠o, bisan diin man, ang may kasiguruhan gid.

Ang mga lider sang kalibutan ginaatubang sang daku nga mga problema. Ang mga dyurnalista kag mga komentarista nagapalibog kon paano mapunggan ang terorismo sa paglapnag kaangay sang nagaharahara nga kalayo, kay daw ginapadabdab ini sang kaimulon kag panatisismo​​—⁠mga problema nga daw wala sing nakahibalo kon paano lubaron. Lapnag kaayo ang inhustisya sa kalibutan amo kon ngaa yara gid ang tanan nga kabangdanan nga mahimo tunaan sang kinagamo. Nagapalibog ang tanan nga tawo kon bala madula pa ang mga problema sang katilingban. Madula ayhan ang inaway​​—⁠upod ang tanan nga pag-antos, kamatay, kag kalaglagan nga ginadala sini?

Minilyon ang nagaliso sa organisado nga relihion upod ining mga pamangkot. Apang, ang iban naman maduhaduhaon. Kamusta ka naman? Sa banta mo ayhan masabat sang relihioso nga mga lider ining mga pamangkot? Makabulig gid bala sila para sa paghidait paagi sa ila mga pangamuyo?